ಗೋಮಾಳದಲ್ಲಿ ಅಕ್ರಮ ರಸ್ತೆ ನಿರ್ಮಾಣ?

ಮಂಚೇನಹಳ್ಳಿ ಗ್ರಾಮಸ್ಥರಿಂದ ಪ್ರತಿಭಟನೆ ಗಣಿ ಮಾಲೀಕರಿಂದ ತನಿಖೆಗೆ ಆಗ್ರಹ

ಮಂಚೇನಹಳ್ಳಿ: ಪಟ್ಟಣ ಸಮೀಪದ ಸರ್ವೇ ನಂ.188ರ ಗೋಮಾಳ ಜಮೀನಿನಲ್ಲಿ ಗಣಿಗಾರಿಕೆಗೆ ಅಕ್ರಮವಾಗಿ ರಸ್ತೆ ನಿರ್ಮಿಸುತ್ತಿದ್ದಾರೆ ಎಂದು ಆರೋಪಿಸಿ ಸುತ್ತಲಿನ ಗ್ರಾಮಸ್ಥರು ಸೋಮವಾರ ಮಂಚೇನಹಳ್ಳಿಯಲ್ಲಿ ಪ್ರತಿಭಟಿಸಿದರು.

ಆರಂಭದಲ್ಲಿ ಮಂಚೇನಹಳ್ಳಿ ಮಹೇಶ್ವರಿ ಸರ್ಕಲ್ನಿಂದ ಗಣೇಶ ದೇವಸ್ಥಾನದವರೆಗೂ ಘೋಷಣೆ ಕೂಗುತ್ತ ಪ್ರತಿಭಟನಾ ಮೆರವಣಿಗೆ ನಡೆಸಿದರು.

ಈ ವೇಳೆ ವಕೀಲ ಲಕ್ಷ್ಮಿ ನಾರಾಯಣ್ ಮಾತನಾಡಿ, ರಸ್ತೆ ಮಾಡುತ್ತಿರುವುದು ಸಾರ್ವಜನಿಕರಿಗಾಗಿ, ರೈತರಿಗಾಗಿ ಎಂದು ಹೇಳುತ್ತಾರೆ. ಆದರೆ, ಬಳಸುವುದು ಮಾತ್ರ ಗಣಿಗಾರಿಕೆಗಾಗಿ. ಇದು ರೈತರಿಗೆ, ಸಾರ್ವಜನಿಕರಿಗೆ ಉಪಯುಕ್ತವಾಗಲಿ ಎಂಬ ಉದ್ದೇಶದಿಂದ ನಿರ್ಮಿಸುತ್ತಿರುವ ರಸ್ತೆಯಲ್ಲ. ಗಣಿಗಾರಿಕೆ ಹಿತಾಸಕ್ತಿ ಈಡೇರಿಸಿಕೊಳ್ಳುವ ದಾರಿಯಾಗಿದೆ. ಇಲ್ಲಿನ ಎಷ್ಟೋ ಹೊಲಗಳಿಗೆ ಹೋಗಲು ಹಲವು ವರ್ಷಗಳಿಂದ ದಾರಿಯೇ ಇಲ್ಲ. ಆದರೆ, ರಾತ್ರೋರಾತ್ರಿ ಗಣಿಗಾರಿಕೆಗೆ ಮಾತ್ರ ರಸ್ತೆ ತಯಾರಾಗುತ್ತಿದೆ. ಮೇಲಿನ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳು ಪರಿಶೀಲಿಸಿ ನ್ಯಾಯ ಒದಗಿಸಬೇಕು ಎಂದು ಒತ್ತಾಯಿಸಿದರು.

ಮಾಜಿ ಜಿಪಂ ಪಿ.ಎನ್.ಪ್ರಕಾಶ್, ಬಿಜೆಪಿ ಮುಖಂಡರಾದ ನಾರಾಯಣಸ್ವಾಮಿ, ಜಿ.ವಿ.ರಾಜಶೇಖರ್, ಬಾಲಕೃಷ್ಣ, ಗ್ರಾಪಂ ಅಧ್ಯಕ್ಷ ನರಸಿಂಹ ರೆಡ್ಡಿ, ಕಾಂಗ್ರೆಸ್ ಮುಖಂಡರಾದ ಮಾರುತಿ, ಪ್ರಿಯಾಂಕಾ, ರವಿ ಇತರರು ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದರು.