ಒಂದೆಡೆ ಅಭಿವೃದ್ಧಿ ಹೆಸರಿನಲ್ಲಿ ವೃಕ್ಷ ಸಂಪತ್ತನ್ನು ನಾಶಪಡಿಸಲಾಗುತ್ತಿದೆ. ವಸತಿ ಪ್ರದೇಶಗಳ ಹೆಚ್ಚಳದಿಂದ ಕ್ರಾಂಕೀಟ್ ನಾಡು ವಿಸ್ತಾರಗೊಳ್ಳುತ್ತಿದೆ. ಮತ್ತೊಂದೆಡೆ ರಸ್ತೆಬದಿ, ಪ್ರಮುಖ ವೃತ್ತ, ಕಚೇರಿ ಮುಂಭಾಗ ಸೇರಿ ಎಲ್ಲೆಂದರಲ್ಲಿ ಅವೈಜ್ಞಾನಿಕವಾಗಿ ಗಿಡ ನೆಡುತ್ತಿದ್ದು, ಇವು ಬೆಳೆಯುವ ಹಂತದಲ್ಲಿಯೇ ರಸ್ತೆ ವಿಸ್ತರಣೆ ಮತ್ತು ಕಟ್ಟಡ ನಿರ್ಮಾಣದ ಮತ್ತಿತರ ಕಾರಣಗಳಿಂದಾಗಿ ಜೀವ ಕಳೆದುಕೊಳ್ಳುತ್ತಿವೆ. ಇದರಿಂದ ಗಿಡಮರ ರಕ್ಷಿಸುವ ಕಾರ್ಯದಲ್ಲಿ ಹಿನ್ನಡೆ ಅನುಭವಿಸುವಂತಾಗಿದೆ. ಆದರೆ, ಒಂದೆಡೆ ದೊಡ್ಡ ಪ್ರಮಾಣದಲ್ಲಿ ನಿರ್ದಿಷ್ಟ ಜಾಗ ಗುರುತಿಸಿ, ಸಸಿ ನೆಡುವ ಹಾಗೂ ಬೆಳೆಸುವ ಕೆಲಸದಿಂದ ಆಕರ್ಷಕ ಉದ್ಯಾನಗಳು, ಇವುಗಳಿಂದ ಒಳ್ಳೆಯ ವಾತಾವರಣ ನಿರ್ಮಾಣವಾಗುತ್ತದೆ. ಅದರಲ್ಲೂ ವಿಶೇಷ ದಿನದ ನೆನಪಿನಲ್ಲಿ ಜನರು ಸಹ ಗಿಡ ನೆಡುವ ಕಾರ್ಯದಲ್ಲಿ ತೊಡಗಿಸಿಕೊಳ್ಳುವುದರಿಂದ, ಉದ್ಯಾನದಲ್ಲಿ ಸಮಯವನ್ನು ಕಳೆಯುವುದರಿಂದ ಖುಷಿಯಾಗುತ್ತದೆ. ಒಳ್ಳೆಯ ಗಾಳಿಯಲ್ಲಿ ಮಾಡುವ ವಿಶ್ರಾಂತಿ ಇಲ್ಲವೇ ವಾಕಿಂಗ್ನಿಂದ ಮನಸ್ಸು ಉಲ್ಲಾಸಗೊಳ್ಳುತ್ತದೆ. ವ್ಯಾಪಕ ಹಸಿರೀಕರಣಕ್ಕೂ ಇದು ಸಹಕಾರಿಯಾಗುತ್ತದೆ.
