ಸ್ಕೂರು ಹಾಗೂ ಇಗ್ಗಲೂರು ಗ್ರಾಮವನ್ನು ಸವಿತಾ ಸಮಾಜದ ದೊರೆಯೊರ್ವ ಆಳುತ್ತಿದ್ದರು ಎನ್ನುವ ಇತಿಹಾಸವೂ ಸಹ ಈ ಗ್ರಾಮಕ್ಕಿದೆ.
ಧಾರ್ಮಿಕ ನೆಲೆವೀಡು!
ಗ್ರಾಮದಲ್ಲಿ ಪುರಾತನವಾದ ಸೋಮೇಶ್ವರ, ಶಂಭುಲಿಂಗೇಶ್ವರ, ಬಸವೇಶ್ವರ, ಆಂಜನೇಯಸ್ವಾಮಿ ದೇವಾಲಯಗಳಿವೆ. ಕೋಣನ ಮಾರಮ್ಮ ತಾಯಿ ಗ್ರಾಮದೇವತೆಯಾಗಿ ನೆಲೆಸಿದ್ದಾರೆ. ಈ ಹಿಂದೆ ಈ ದೇವರಿಗೆ ಕೋಣನ ಬಲಿಕೊಡುವ ಸಂಪ್ರದಾಯವಿತ್ತು. ಆದರೆ, ಕಾಲಕ್ರಮೇಣ ಅದು ನಿಷೇಧವಾಗಿದೆ. ಇದರೊಂದಿಗೆ, ಅಂತರಹಳ್ಳಿ ಸಿದ್ದೇಶ್ವರ, ದೇವಮ್ಮ, ಮಾರಮ್ಮ, ಗುಜ್ಜಮ್ಮ, ದೊಡ್ಡಮ್ಮ, ಚಿಕ್ಕಮ್ಮ ಸೇರಿದಂತೆ ಹಲವಾರು ದೇವಾಲಯಗಳಿವೆ. ಗ್ರಾಮದಲ್ಲಿ ಹಲವಾರು ಹಬ್ಬಹರಿದಿನಗಳನ್ನು ಶ್ರದ್ಧಾಭಕ್ತಿಯಿಂದ ಆಚರಿಸಿಕೊಂಡು ಬರಲಾಗುತ್ತಿದೆ. ವರ್ಷಕೊಮ್ಮೆ ಗ್ರಾಮದ ಎಲ್ಲಾ ದೇವರುಗಳನ್ನು ಪಕ್ಕದ ಮಳ್ಳವಳ್ಳಿ ತಾಲೂಕಿನ ಅಂತರಹಳ್ಳಿ ಬೆಟ್ಟಕ್ಕೆ ತೆಗೆದುಕೊಂಡು ಹೋಗಿ ಪೂಜೆ ಸಲ್ಲಿಸಿಕೊಂಡು ಬರಲಾಗುತ್ತದೆ. ಮೂರುದಿನಗಳ ಕಾಲ ಊರ ಹಬ್ಬವನ್ನು ಸಂಭ್ರಮದಿಂದ ಆಚರಿಸಲಾಗುತ್ತದೆ. ಈ
ಅದ್ದೂರಿ ಹಬ್ಬವನ್ನು ಗ್ರಾಮದ ಎಲ್ಲಾ ಜಾತಿ ಜನಾಂಗದವರು ಒಗ್ಗೂಡಿ ಆಚರಿಸುವುದು ವಿಶೇಷ ಎನ್ನುತ್ತಾರೆ ಗ್ರಾಮದ ಮುಖಂಡರಾದ ನಿರಾಂಜನಸ್ವಾಮಿ, ರೇಣುಕಾಪ್ರಸಾದ್ ಹಾಗೂ ಇಗ್ಗಲೂರು ಲೋಕೇಶ್.
ಮಂಡ್ಯ ನಂಟು.., ಈ ಭಾಗದ ತಾಯಿಬೇರು!!!
ಈ ಭಾಗದಲ್ಲಿ ಕೋಡಂಬಳ್ಳಿ ನಂತರ ಎರಡನೇ ವಾಣಿಜ್ಯಕೇಂದ್ರ ಎಂಬ ಹೆಗ್ಗಳಿಕೆಯನ್ನು ಈ ಗ್ರಾಮ ಹೊಂದಿದೆ. ಪ್ರಾಥಮಿಕದಿಂದ ಹಿಡಿದು ಪದವಿಪೂರ್ವವರೆಗೆ ಶೈಕ್ಷಣಿಕ ವ್ಯವಸ್ಥೆ ಇದೆ. ಪ್ರಾಥಮಿಕ ಆರೋಗ್ಯಕೇಂದ್ರ ಸೇರಿದಂತೆ ವಿವಿಧ ಬ್ಯಾಂಕುಗಳು ಕಾರ್ಯನಿರ್ವಹಿಸುತ್ತಿವೆ. ಸರ್ವ ಜನಾಂಗದವರು ಸಹಬಾಳ್ವೆಯಿಂದ ವಾಸಿಸುತ್ತಿರುವ ಈ ಗ್ರಾಮ ಅಕ್ಕಪಕ್ಕದ ಊರುಗಳಿಗೆ ತಾಯಿಬೇರು ಎನ್ನಬಹುದು. ಗ್ರಾಮ ಆರ್ಥಿಕವಾಗಿ ಸಮೃದ್ಧವಾಗಿದ್ದು, ಪಕ್ಕದ ಮಂಡ್ಯ ಜಿಲ್ಲೆಯ ಒಡನಾಟ ಹೆಚ್ಚಾಗಿದೆ. ಬೌಗೋಳಿಕವಾಗಿ ಚನ್ನಪಟ್ಟಣವಾದರೂ, ಭಾವನಾತ್ಮಕವಾಗಿ ಮಂಡ್ಯದೊಂದಿಗೆ ಬೆಸೆದುಕೊಂಡಿದೆ. ಇಲ್ಲಿನ ಜನರ ಭಾಷೆಯಲ್ಲೂ ಸಹ ಮಂಡ್ಯ ಸೊಗಡು ಕಾಣಬಹುದು.
ನೀರಾವರಿ ಯೋಜನೆಗೆ ಮೊದಲ ಮೆಟ್ಟಿಲು!
ಈ ಭಾಗ ಸೇರಿದಂತೆ ಇಡೀ ಜಿಲ್ಲೆಯ ನೀರಾವರಿ ಯೋಜನೆಗಳಿಗೆ ಮೊದಲ ಮೆಟ್ಟಿಲು ಎಂಬ ಹೆಗ್ಗಳಿಕೆ ಗ್ರಾಮಕ್ಕಿದೆ. ಅದಕ್ಕೆ ಕಾರಣ ಗ್ರಾಮದಲ್ಲಿ ಶಿಂಷಾ ನದಿಗೆ ಅಡ್ಡಲಾಗಿ ಕಟ್ಟಿರುವ ಎಚ್.ಡಿ.ದೇವೇಗೌಡ ಬ್ಯಾರೇಜ್. ಇಗ್ಗಲೂರು ಬಳಿ ಹರಿದುಹೋಗುತ್ತಿದ್ದ ಶಿಂಷಾ ನದಿಗೆ ಅಡ್ಡಲಾಗಿ ಬ್ಯಾರೇಜ್ ನಿರ್ಮಿಸಿ ಈ ಭಾಗವನ್ನು ಹಸಿರು ಮಾಡಿದ ಹೆಗ್ಗಳಿಕೆ ಮಾಜಿ ಪ್ರಧಾನಿಗಳದ್ದಾಗಿದೆ. ಇಗ್ಗಲೂರಿನಲ್ಲಿ 1996ರಲ್ಲಿ ಶಿಂಷಾ ನದಿಗೆ ಕೇವಲ ಬ್ರೀಡ್ಜ್ ಅಷ್ಟೇ ಅಲ್ಲದೇ ಬ್ಯಾರೇಜ್ ಸಹ ನಿರ್ಮಾಣ ಮಾಡಿ, ತಾನು ಪ್ರಧಾನಮಂತ್ರಿಯಾಗಿದ್ದ ವೇಳೆ ಸ್ವತಃ ದೇವೇಗೌಡರೇ ಈ ಜಲಾಶಯದ ಉದ್ಘಾಟನೆ ನೇರವೇರಿಸುತ್ತಾರೆ. ಈ ಕಾರಣದಿಂದಲೇ ಈ ಜಲಾಶಯಕ್ಕೆ ಎಚ್.ಡಿ.ದೇವೇಗೌಡ ಬ್ಯಾರೇಜ್ ಎಂದೇ ಹೆಸರಿಡಲಾಗಿದೆ.
20 ಅಡಿ ಎತ್ತರದ ಈ ಬ್ಯಾರೇಜ್ 0.18 ಟಿಎಂಸಿ ಅಡಿ ನೀರು ಸಂಗ್ರಹ ಸಾಮರ್ಥ್ಯ ಹೊಂದಿದೆ. ವಿಸ್ತೀರ್ಣದಲ್ಲಿ ಇದು ಚಿಕ್ಕದು ಎನಿಸಿದರೂ ಇದರ ಕೊಡುಗೆ ಮಾತ್ರ ಅನನ್ಯ. ಈ ಬ್ಯಾರೇಜ್ ನೀರು ಸಂಗ್ರಹದ ಜೊತೆಗೆ, ಜಿಲ್ಲೆಯ ನೀರಾವರಿ ಯೋಜನೆಗೆ ಮೊದಲ ಮೆಟ್ಟಿಲಾಗಿದ್ದು ಈಗ ಇತಿಹಾಸ. ಸಾವಿರಾರು ಎಕ್ಟೇರ್ ಭೂಮಿಗೆ ನೀರುಣಿಸುತ್ತಿರುವ ಕೀರ್ತಿ ಈ ಬ್ಯಾರೇಜಿಗಿದೆ. ತಾಲ್ಲೂಕಿನ ಗರಕಹಳ್ಳಿ ಏತ ನೀರಾವರಿ ಹಾಗೂ ಕಣ್ವ ಏತ ನೀರಾವರಿ ಯೋಜನೆಯನ್ನು ರೂಪಿಸಿ ತಾಲ್ಲೂಕಿನ ನೂರಾರು ಕೆರೆಗಳಿಗೆ ನೀರು ಹರಿಸಲು ಕಾರಣವಾಗಿದ್ದೆ ಈ ಜಲಾಶಯ. ಈ ಜಲಾಶಯ ಈ ಭಾಗಕ್ಕೆ ಜೀವಸೆಲೆಯಾಗಿದೆ. ಇಡೀ ಜಿಲ್ಲೆಯ ನೀರಾವರಿಗೆ ಯೋಜನೆಗೂ ಇದು ಮೊದಲ ಮೆಟ್ಟಿಲು ಎನ್ನುವುದು ನಮ್ಮ ಗ್ರಾಮದ ಹೆಮ್ಮೆ ಎನ್ನುತ್ತಾರೆ ಗ್ರಾಮದ ಮುಖಂಡರಾದ ಇ.ತಿ.ಶ್ರೀನಿವಾಸ್ ಮತ್ತು ಡಿಎಂಕೆ ಕುಮಾರ್.
