ರಾಜ್ಯದ ಆರ್ಥಿಕತೆಯ ಮೂಲವೇ ಬೆಂಗಳೂರು. ಪ್ರತಿನಿತ್ಯ ಸುಮಾರು 200 ಕೋಟಿ ರೂ.ಗಳಷ್ಟು ತೆರಿಗೆ ಬೆಂಗಳೂರಿನಿಂದಲೇ ಬರುತ್ತದೆ. ಹತ್ತು ದಿನಕ್ಕೆ ಲೆಕ್ಕ ಹಾಕಿದರೆ ಸುಮಾರು 2000 ಕೋಟಿ ರೂ.ಗಳಾಗುತ್ತದೆ. ಇಷ್ಟು ತೆರಿಗೆ ಬರಬೇಕೆಂದರೆ ಹತ್ತುಪಟ್ಟು ವಹಿವಾಟು ನಡೆಯಬೇಕಾಗುತ್ತದೆ ಎಂದು ಎಫ್ಕೆಸಿಸಿಐ ಅಧ್ಯಕ್ಷ ಸಿ.ಆರ್. ಜನಾರ್ದನ ‘ವಿಜಯವಾಣಿ’ಗೆ ತಿಳಿಸಿದ್ದಾರೆ. ಬೆಂಗಳೂರಿನಲ್ಲಿಯೆ 4 ಲಕ್ಷ ಕೈಗಾರಿಕೆಗಳಿವೆ, ಹೋಟೆಲ್, ಥಿಯೇಟರ್, ಬಾರ್, ಮಾಲ್, ಜವಳಿ ಅಂಗಡಿ, ಕಲ್ಯಾಣ ಮಂಟಪ, ಆಟೋಮೊಬೈಲ್, ಸಗಟು ದಿನಸಿ ಮಾರಾಟಗಳೆಲ್ಲ ಸೇರಿದಂತೆ 12 ಲಕ್ಷ ಉದ್ದಿಮೆಗಳಿವೆ. ಎಲ್ಲ ಉದ್ದಿಮೆಗಳಲ್ಲಿಯೂ ವಹಿವಾಟು ಸಂಪೂರ್ಣ ನಿಂತಿದೆ. ಉದ್ದಿಮೆದಾರರಿಗೆ 5000 ಕೋಟಿ ರೂ.ಗಳಷ್ಟು ನಷ್ಟವಾಗಿರಬಹುದೆಂದು ಅಂದಾಜು ಮಾಡಲಾಗಿದೆ ಎಂದರು. ಲಾಕ್ಡೌನ್ ಒಂದೇ ಪರಿಹಾರವಲ್ಲ, ಕೈಗಾರಿಕೆಗಳಿಂದ ಕರೊನಾ ಬರುವುದಿಲ್ಲ. ಜನ ಎಚ್ಚರಿಕೆಯಿಂದ ಇರಬೇಕಾಗುತ್ತದೆ. ಕೆಲ ದೇಶಗಳಲ್ಲಿ ಲಾಕ್ಡೌನ್ ಇಲ್ಲದೆಯೇ ನಿಯಂತ್ರಣ ಮಾಡಿರುವ ಉದಾಹರಣೆ ಇದ್ದರೆ, ಇನ್ನೂ ಕೆಲ ದೇಶಗಳಲ್ಲಿ ಲಾಕ್ಡೌನ್ ತೆರವು ಮಾಡಲಾಗಿದೆ ಎಂದು ಜನಾರ್ದನ ಹೇಳಿದರು.
