ಸಮೀಕ್ಷೆ ಏಕೆ: ಜಿಲ್ಲೆಯಲ್ಲಿ ಈವರೆಗೂ ಕರೊನಾ ಸೋಂಕು ಪತ್ತೆಯಾಗಿಲ್ಲ ಎಂಬುವುದು ಸಮಾಧಾನದ ಸಂಗತಿ. ಆದರೆ, ಈವರೆಗೂ ಜಿಲ್ಲಾಡಳಿತ ತಪಾಸಣೆ ಹಾಗೂ ಕ್ವಾರಂಟೈನ್ ಮಾಡಿರುವುದು ಜಿಲ್ಲೆಗೆ ಹೊರಗಿನಿಂದ ಬಂದವರಿಗೆ ಮಾತ್ರ. ಅವರಲ್ಲಿ ಪ್ರಾಥಮಿಕ ಹಂತದಲ್ಲಿ ಎಲ್ಲಿಯೂ ಕರೊನಾ ಸೋಂಕು ಪತ್ತೆಯಾಗಿಲ್ಲ. ಆದರೆ, ಕೆಲ ಜಿಲ್ಲೆಗಳಲ್ಲಿ ಕರೊನಾ ಮಹಾಮಾರಿ ಎಲ್ಲಿಗೂ ಪ್ರವಾಸ ನಡೆಸದವರಲ್ಲಿಯೂ ಕಂಡುಬಂದಿದೆ. ಹೀಗಾಗಿ ಅಂತಹ ಯಾವುದಾದರೂ ಪ್ರಕರಣಗಳಿದ್ದರೆ, ಅವುಗಳ ಮಾಹಿತಿ ಶೀಘ್ರದಲ್ಲಿ ದೊರೆಯದೇ ಸೋಂಕು ಅನೇಕರಿಗೆ ಹರಡುವ ಸಾಧ್ಯತೆಗಳಿರುತ್ತದೆ. ಆರೋಗ್ಯ ತಪಾಸಣೆ ಸಮೀಕ್ಷೆಯಿಂದ ಯಾರಲ್ಲಿ ಕರೊನಾ ಲಕ್ಷಣಗಳಲ್ಲಿ ಪ್ರಮುಖವಾಗಿರುವ ಜ್ವರ, ಶೀತ, ಕೆಮ್ಮು, ಉಸಿರಾಟದ ತೊಂದರೆ ಇದೆ ಎಂಬ ಕುರಿತು ಮಾಹಿತಿ ತಿಳಿಯಲಿದೆ. ಅಂತಹವರನ್ನು ವಿಶೇಷ ತಪಾಸಣೆಗೆ ಒಳಪಡಿಸಿದರೆ ಕರೊನಾ ಮಹಾಮಾರಿಯು ಹೆಚ್ಚಾಗಿ ಹರಡದಂತೆ ತಡೆಯುವುದು ಸುಲಭವಾಗಲಿದೆ ಎಂಬ ಉದ್ದೇಶದಿಂದ ಈ ಸಮೀಕ್ಷೆ ನಡೆಸಲಾಗುತ್ತಿದೆ.
