ಸೋಂಕಿತರು ರೋಗದ ವಿರುದ್ಧ ಹೋರಾಡಲು ಆರೋಗ್ಯಕರ ಪೌಷ್ಟಿಕ ಆಹಾರ ಸೇವಿಸಬೇಕು. ರೋಗ ನಿರೋಧಕ ಶಕ್ತಿ ಹೆಚ್ಚಿಸಿಕೊಳ್ಳಬೇಕು. ಇದಕ್ಕಾಗಿ ಆಯುಷ್ ಇಲಾಖೆ ಕೆಲ ಸಲಹೆಗಳನ್ನು ನೀಡಿದೆ. ಬಿಸಿ ನೀರು ಇಲ್ಲವೆ ಕಾಯಿಸಿ ಆರಿಸಿದ ನೀರು ಸೇವನೆ ಉತ್ತಮ. ನಿತ್ಯ ಬೆಳಗ್ಗೆ 10 ಗ್ರಾಂ ಚ್ಯವನ್ಪ್ರಾಶ್ ತಿನ್ನಬೇಕು. ತುಳಸಿ, ಚಕ್ಕೆ, ಕರಿಮೆಣಸು, ಒಣಶುಂಠಿ ಸೇರಿಸಿ ಕಷಾಯ ತಯಾರಿಸಿ ದಿನಕ್ಕೆ ಎರಡು (15-20 ಮಿ.ಲೀ.) ಬಾರಿ ಕುಡಿಯಬೇಕು. ಬೇಕೆನಿಸಿದರೆ ಕಷಾಯಕ್ಕೆ ಬೆಲ್ಲ ಹಾಗೂ ನಿಂಬೆ ರಸ ಬೆರೆಸಿ ಸೇವಿಸಬಹುದು. ನಿತ್ಯ ಎರಡು ಬಾರಿ ಒಂದು ಲೋಟ ಹಾಲಿಗೆ ಆರ್ಧ ಚಮಚ ಅರಿಶಿನ ಬೆರೆಸಿ ಕುಡಿಯಬೇಕು. ಮನೆ ಆರೈಕೆಯಲ್ಲಿ ರೋಗ ತೀವ್ರತೆ ಹೆಚ್ಚಿದ ಸಂದರ್ಭದಲ್ಲಿ ನಿರ್ಲಕ್ಷಿಸದೆ ಕೂಡಲೇ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆಯಬೇಕು. ಸೋಂಕು ಪ್ರಕರಣಗಳ ಏರಿಕೆ, ಸೌಲಭ್ಯಗಳ ಕೊರತೆ ಸೇರಿ ನಾನಾ ಕಾರಣಗಳಿಂದ ರಾಜ್ಯ ಸರ್ಕಾರ ಮನೆ ಆರೈಕೆ ಕ್ರಮ ಜಾರಿಗೆ ಸಜ್ಜಾಗಿದೆ.
