ನರೇಂದ್ರ ಎಸ್.ಮರಸಣಿಗೆ ಹೆಬ್ರಿ
ನಕ್ಸಲ್ ಎನ್ಕೌಂಟರ್, ಕೂಂಬಿಂಗ್ನಿಂದ ಹೆಚ್ಚು ಸದ್ದುಮಾಡುತ್ತಿರುವ ಹೆಬ್ರಿ ವ್ಯಾಪ್ತಿಯ ಪೊಲೀಸ್ ಠಾಣೆಗೆ ಗರಿಷ್ಠ ಸುರಕ್ಷತೆ ಅಗತ್ಯವಿದೆ. ಹಳೇ ಪೊಲೀಸ್ ಠಾಣೆ ಹೆಬ್ರಿಯ ಹೃದಯಭಾಗದಲ್ಲಿತ್ತು. ಆದರೆ ಹೊಸದಾಗಿ ನಿರ್ಮಾಣವಾದ ಠಾಣೆ ಕಾಡಿನಲ್ಲಿದೆ. ಸುತ್ತಲೂ ಅರಣ್ಯಪ್ರದೇಶವೇ ಇದ್ದು, ಸೂಕ್ತ ಸುರಕ್ಷಾ ವ್ಯವಸ್ಥೆಗಳನ್ನು ಅಳವಡಿಸಬೇಕಾಗಿದೆ
ಈಗ ಇರುವ ವಾಹನ ಹಾಳಾಗಿದ್ದು, ಗಸ್ತು ತಿರುಗುವಿಕೆ, ನಿರಂತರ ಓಡಾಟ ಇರುವುದರಿಂದ ಗುಣಮಟ್ಟದ ಹಾಗೂ ಹೆಚ್ಚು ವಾಹನ ವ್ಯವಸ್ಥೆ ಪೊಲೀಸರಿಗೆ ದೊರೆಯಬೇಕಿದೆ. ಈಗ ಇರುವ ಪೊಲೀಸ್ ಕ್ವಾರ್ಟರ್ಸ್ ಕೂಡ ಹಳೆಯದಾಗಿದ್ದು, ಉತ್ತಮ ದರ್ಜೆಯ ಪೊಲೀಸ್ ಕ್ವಾರ್ಟರ್ಸ್ ಅಗತ್ಯವಿದೆ. ಠಾಣೆ ವ್ಯಾಪ್ತಿ ಸೂಕ್ಷ್ಮಪ್ರದೇಶವಾಗಿ ಗುರುತಿಸಲ್ಪಡುತ್ತಿದ್ದು, ಇಲ್ಲಿ ಅನಾಹುತಗಳ ಪತ್ತೆಹಚ್ಚುವಿಕೆ ಹಾಗೂ ತಡೆಗಟ್ಟಲು ಸಿಸಿಟಿವಿ ಅಳವಡಿಕೆ ಅಗತ್ಯವಿದೆ. ಹೆಬ್ರಿ ನಗರವಿಡೀ ಕಣ್ಗಾವಲಿಡಲು ಸಾಧ್ಯವಾಗುವಂತೆ ಸಿಸಿಟಿವಿಗಳನ್ನು ಅಳವಡಿಸಬೇಕಿದೆ.
ಹೆಬ್ರಿ ಠಾಣಾ ವ್ಯಾಪ್ತಿಯಲ್ಲಿ ಸಮಾಜಘಾತುಕ, ನಕ್ಸಲ್ ಚಟುವಟಿಕೆಗಳು ಹೆಚ್ಚಿದ್ದು, ಅವರು ಬಳಸುವ ಶಸ್ತ್ರಾಸ್ತ್ರಗಳು ಪೊಲೀಸ್ ಇಲಾಖೆಗೆ ಹೋಲಿಸಿದರೆ ಅತ್ಯಾಧುನಿಕವಾಗಿದೆ. ಪೊಲೀಸರಿಗೆ ಕಾರ್ಯಾಚರಣೆ ಸಂದರ್ಭ ಇವುಗಳನ್ನು ಎದುರಿಸಲು ಕಷ್ಟವಾಗುತ್ತಿದ್ದು, ಸರ್ಕಾರ ಖಾಕಿ ಪಡೆಗೂ ಅತ್ಯಾಧುನಿಕ ಶಸ್ತ್ರಾಸ್ತ್ರ ಪೂರೈಸುವ ಅಗತ್ಯವಿದೆ.
