ರಾಮನಗರ: ಜಿಲ್ಲೆಯಲ್ಲಿ ಕಳೆದ ಎರಡು ದಿನಗಳಿಂದ ಸುರಿಯುತ್ತಿರುವ ಜಿಟಿ ಜಿಟಿ ಮಳೆಗೆ ಜನಜೀವನ ಅಸ್ತವ್ಯಸ್ತವಾಗಿದ್ದು, ಕೃಷಿ ಸೇರಿ ವಾಣಿಜ್ಯ ವ್ಯಾಪಾರಕ್ಕೂ ಮಳೆ ತೊಡಕುಂಟಾಗುವಂತೆ ಮಾಡಿದೆ.
ಸೋಮವಾರ ರಾತ್ರಿಯಿಂದ ಎಡೆಬಿಡದೆ ಮಳೆ ಸುರಿಯುತ್ತಿದ್ದು, ಒಂದೊಂದು ಭಾರಿ ಜೋರಾದ ಮಳೆಯೂ ಬರುತ್ತಿದೆ. ದಿನನಿತ್ಯ ಕೆಲಸ ಕಾರ್ಯಗಳಿಗೆ ಹೋಗುವವರು, ಕಾಲೇಜು ವಿದ್ಯಾರ್ಥಿಗಳು, ಪೇಟೆ ಬೀದಿ ಬದಿಯಲ್ಲಿ ವ್ಯಾಪಾರ ಮಾಡುವವರು ಮಳೆಯಿಂದ ತೊಂದರೆ ಅನುಭವಿಸಿದರು.
ರೈತರು ಜಿಟಿ ಜಿಟಿ ಮಳೆಯಿಂದ ಮನೆಯಿಂದ ಹೊರಗೆ ಹೋಗಲು ಸಾಧ್ಯವಾಗದೆ ಪರಿತಪಿಸಿದರು. ಪೇಟೆ ಬೀದಿಯಲ್ಲಿ ಕೊಡೆ ಹಿಡಿದು ಜನರು ಕೆಲಸ ಕಾರ್ಯಗಳಿಗೆ ತೆರಳುತ್ತಿದ್ದ ದೃಶ್ಯಗಳು ಕಂಡುಬಂದವು. ಮಳೆ ಒಂದೇ ಸಮನೆ ಸೋಮವಾರ ರಾತ್ರಿಯಿಂದಲೂ ಜಿನುಗುತ್ತಿರುವ ಕಾರಣ ಬಿಸಿಲಿನ ಚಿತ್ರಣ ಕಾಣದೆ ಇಡೀ ವಾತಾವರಣ ಮಲೆನಾಡನ್ನು ಜ್ಞಾಪಿಸುವಂತೆ ಕಾಣುತ್ತಿದೆ.
