ಪ್ರತಿ ಶನಿವಾರ ಮತ್ತು ಭಾನುವಾರ, ರಜೆಯ ವಿಶೇಷ ದಿನಗಳಂದು ರಾಜಧಾನಿ ಬೆಂಗಳೂರು ಸುತ್ತಲಿನಿಂದ ವಿದ್ಯಾರ್ಥಿಗಳು, ಟೆಕ್ಕಿಗಳು ಸೇರಿ ಖಾಸಗಿ ಸಂಸ್ಥೆಯ ನೌಕರರು ದ್ವಿಚಕ್ರ ವಾಹನಗಳಲ್ಲಿ ಜಿಲ್ಲೆಯ ಪ್ರವಾಸಿ ತಾಣಗಳಿಗೆ ತಂಡೋಪ ತಂಡವಾಗಿ ಭೇಟಿ ನೀಡುತ್ತಿದ್ದು, ಇದೇ ವೇಳೆ ಅಡ್ಡಾದಿಡ್ಡಿಯಾಗಿ ಅತಿ ವೇಗದ ವಾಹನ ಚಾಲನೆ, ವೀಲಿಂಗ್ ಮತ್ತು ಚೇಸಿಂಗ್, ಜೋರಾಗಿ ಕೇಳಿ ಬರುವ ಕರ್ಕಶ ಶಬ್ದ, ಉತ್ಸಾಹದ ಪೈಪೋಟಿಯಲ್ಲಿ ಕಿರುಚಾಟ ಪ್ರಕರಣಗಳು ಹೆಚ್ಚಾಗಿವೆ. ಇವುಗಳ ಬಗ್ಗೆ ನಿರಂತರ ದೂರು ಸಲ್ಲಿಸಿ ಸ್ಥಳೀಯ ಜನರು, ದಂಡ ವಿಧಿಸಿ ವಾಹನಗಳನ್ನು ವಶಪಡಿಸಿಕೊಳ್ಳುತ್ತಿದ್ದರೂ ನಿಯಮ ಉಲ್ಲಂಘನೆ ನಿಲ್ಲದಿರುವುದರಿಂದ ಪೊಲೀಸರು ಹೈರಾಣರಾಗುವಂತಾಗಿದೆ. ಅಂತಾರಾಷ್ಟ್ರೀಯ ಆಧ್ಯಾತ್ಮಿಕ ತಾಣ ಈಶ ಆದಿಯೋಗಿ ಧ್ಯಾನ ಕೇಂದ್ರ, ಕರ್ನಾಟಕದ ಊಟಿ ಎಂದೇ ಹೆಸರು ಗಳಿಸಿರುವ ನಂದಿ ಗಿರಿಧಾಮ, ಮೋಡವನ್ನು ಅಪ್ಪಿಕೊಂಡ ಅನುಭವ ನೀಡುವ ಸ್ಕಂದಗಿರಿ, ಸೆಲ್ಫಿ ಬಂಡೆಯ ಆವಲಬೆಟ್ಟ, ಶ್ರೀನಿವಾಸ ಸಾಗರ, ಕೇತೇನಹಳ್ಳಿ ಫಾಲ್ಸ್ ಸೇರಿ ಜಿಲ್ಲೆಯ ಹಲವು ಆಕರ್ಷಕ ತಾಣಗಳು ಪ್ರವಾಸಿಗರನ್ನು ಇತ್ತ ಸೆಳೆಯುತ್ತಿವೆ. ಬೆಂಗಳೂರಿಗೆ ಸಮೀಪದಲ್ಲಿರುವುದರಿಂದ ವಾರಾಂತ್ಯದ ರಜೆ ಕಳೆಯಲು ಹಲವರು ಇಲ್ಲಿನ ಪ್ರವಾಸಿ ತಾಣಗಳತ್ತ ಲಗ್ಗೆ ಇಡುತ್ತಿದ್ದು, ಟ್ರಾಫಿಕ್ ಜಾಮ್ ಜತೆಗೆ ಪುಂಡರ ಅತಿರೇಕ ವರ್ತನೆ, ಕಿಡಿಗೇಡಿ ಕೃತ್ಯಗಳು ಜಾಸ್ತಿಯಾಗಿವೆ.
