ಡಿಪಿಆರ್ ಪಟ್ಟಿಯಲ್ಲಿಲ್ಲದ ಕೆರೆ-ಕಟ್ಟೆಗಳಿಗೆ ನೀರು

ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ಮುಖಂಡ ನಾಗರಾಜು ಮಾತನಾಡಿ, ಏತ ನೀರಾವರಿ ಯೋಜನೆಯಡಿ ಎಡದಂಡೆ ನಾಲೆಯ ಮೂಲಕ ಕೆರೆ ಕಟ್ಟೆಗಳಿಗೆ ನೀರು ಹರಿಸುತ್ತಿರುವುದು ಸಂತಸದ ವಿಚಾರ. ಆದರೆ, ಡಿಪಿಆರ್ ಮೂಲಕ ಯೋಜನೆ ರೂಪಿಸಿದ ಕೆರೆಗಳಿಗೆ ಪ್ರಥಮವಾಗಿ ಆದ್ಯತೆ ನೀಡದೆ ರಾಜಕೀಯ ಪ್ರೇರಿತರಾಗಿರುವ ಅಧಿಕಾರಿಗಳು, ಡಿಪಿಆರ್ ನಂತರದಲ್ಲಿ ಪಟ್ಟಿಗೆ ಸೇರಿದ ಸಣ್ಣಪುಟ್ಟ ಕೆರೆಕಟ್ಟೆಗಳಿಗೆ ನೀರು ತುಂಬಿಸಲು ಮುಂದಾಗಿರುವುದು ಸರಿಯಲ್ಲ ಎಂದು ಆರೋಪಿಸಿದರು.

ಹಿರೀಸಾವೆ ಭಾಗದ ರೈತ ಮುಖಂಡರ 42 ವರ್ಷಗಳ ಹೋರಾಟದ ಫಲವಾಗಿ ಯೋಜನೆ ರೂಪುಗೊಂಡು ಎರಡು ವರ್ಷಗಳಿಂದ ಹಿರೀಸಾವೆ ಹಾಗೂ ಜುಟ್ಟನಹಳ್ಳಿ ವ್ಯಾಪ್ತಿಯ ಕೆರೆಗಳಿಗೆ ಸರ್ಕಾರದ ಆದೇಶದಂತೆ 15 ದಿನಗಳಿಂದ ಕೆರೆ ತುಂಬಿಸುವ ಕಾರ್ಯಕ್ಕೆ ಚಾಲನೆ ನೀಡಲಾಗಿದೆ. ಆದರೆ ಯೋಜನೆಗೆ ಡಿಪಿಆರ್ ಮೂಲಕ ಸೇರ್ಪಡೆಗೊಂಡಿರುವ ಕೆರೆಗಳಿಗೆ ನೀರು ಹರಿಸದೆ ನಂತರದಲ್ಲಿ ಸೇರ್ಪಡೆಗೊಂಡ ಕೆರೆಗಳಿಗೆ ತುಂಬಿಸಲಾಗುತ್ತಿದೆ. ಇದರಲ್ಲಿ ಅಧಿಕಾರಿಗಳ ಲೋಪದೋಷ ಹಾಗೂ ರಾಜಕೀಯ ಪ್ರೇರಿತ ಕಾಣುತ್ತಿದೆ ಎಂದು ದೂರಿದರು.

ದಲಿತಪರ ಸಂಘಟನೆಗಳ ಮುಖಂಡ ಮತಿಘಟ್ಟ ರಂಗಸ್ವಾಮಿ ಮಾತನಾಡಿ, ಬರ ಪರಿಸ್ಥಿತಿ ಮುಂದುವರಿದರೆ ಈ ಭಾಗದ ರೈತರ ಗತಿ ಏನಾಗಬಹುದು ಎಂಬುದನ್ನು ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ತಿಳಿಯಬೇಕಿದೆ. ಎಲ್ಲ್ಲ ರೈತರಿಗೂ ಅನುಕೂಲವಾಗುವ ನಿಟ್ಟಿನಲ್ಲಿ ನೀರನ್ನು ಹಂಚಿಕೆಯೊಂದಿಗೆ ಹರಿಸುವುದು ಸೂಕ್ತ ಎಂದು ತಿಳಿಸಿದರು.

ಈಗಾಗಲೇ 15 ದಿನಗಳಿಂದ ನೀರು ಹರಿಸಲಾಗುತ್ತಿದೆ. ಆದರೆ ಮೂಲ ಕೆರೆಗಳಿಗೆ ನೀರು ಬಿಡುತ್ತಿಲ್ಲ. ಇದು ಅನ್ಯಾಯದ ವಿಚಾರ. ಏತ ನೀರಾವರಿ ಯೋಜನೆ ಸಲುವಾಗಿ ಹೋರಾಡಿದ ನಿಜವಾದ ರೈತರು ಇಂದು ನೀರಿಗಾಗಿ ಮತ್ತೆ ಹೋರಾಡುತ್ತಿದ್ದೇವೆ. ಆದರೆ ಹೋರಾಟಕ್ಕೆ ಬಾರದ ಕೆಲ ಇವತ್ತಿನ ಮುಖಂಡರು ರಾಜಕೀಯ ಮಾಡಿ ತಮ್ಮ ವ್ಯಾಪ್ತಿಯ ಕೆರೆಗಳಿಗೆ ನೀರು ತುಂಬಿಸಿಕೊಳ್ಳುವಲ್ಲಿ ಮಗ್ನರಾಗಿದ್ದಾರೆ ಎಂದು ಕಿಡಿ ಕಾರಿದರು.

ಮತಿಘಟ್ಟ ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ಪ್ರಕಾಶ್, ರೈತ ಮುಖಂಡರಾದ ಶಾಮಿಲ್ ರಘು, ಪಾಪಣ್ಣ, ಅಣ್ಣಪ್ಪ, ಪೂಮುಡಿಹಳ್ಳಿ ರವಿಕುಮಾರ್, ಹೊನ್ನೇನಹಳ್ಳಿ ಶಶಿಕುಮಾರ್, ಹೊನ್ನಶೆಟ್ಟಿಹಳ್ಳಿ ಮಂಜೇಗೌಡ, ರಾಶಿಕ್ ಗೌಡ, ಬ್ಯಾಂಗಲ್ಸ್ ಮಹೇಶ್, ಸತೀಶ್, ಮಂಜುನಾಥ್ ಮೌರ್ಯ, ರಾಮಸ್ವಾಮಿ, ಕುಮಾರ್, ವೆಂಕಟೇಶ್, ರಾಮೇಗೌಡ ಹಾಗೂ ಇತರರು ಇದ್ದರು.