ಹಳ್ಳಿ ಸೊಗಡಿನ ಅರಸಿ ಚೆನ್ನಮ್ಮ ವಿಧಿವಶ

ಎಚ್.ಡಿ. ದೇವೇಗೌಡರ ಕುಟುಂಬ ರಾಜಕೀಯವಾಗಿ ಎಷ್ಟೇ ಎತ್ತರಕ್ಕೆ ಬೆಳೆದರೂ ಚೆನ್ನಮ್ಮ ಮಾತ್ರ ಬಾಗಿದರೇ ಹೊರತು ಬಳುಕಲಿಲ್ಲ. ತಲೆ ತಗ್ಗಿಸಿ ನಡೆದರೇ ಹೊರತು, ಹಮ್ಮು-ಬಿಮ್ಮಿನಿಂದ ಬೀಗಲಿಲ್ಲ. ಗ್ರಾಮೀಣ ಜೀವನ, ಕೃಷಿ ಮತ್ತು ಸರಳತೆಗೆ ಅನ್ವರ್ಥವಾಗಿ ಬದುಕಿದರು.

ದೇವೇಗೌಡರು ಹುಟ್ಟೂರು ಬಿಟ್ಟು ಮಕ್ಕಳ ವಿದ್ಯಾಭ್ಯಾಸ ನಿಮಿತ್ತ ಬೆಂಗಳೂರು ಸೇರಿದಾಗ ಚೆನ್ನಮ್ಮ ಅವರು ಜತೆಯಾಗಿ ಹೆಜ್ಜೆ ಹಾಕಿದರೇ ಹೊರತು, ಯಾವುದಕ್ಕೂ ಮರುಮಾತು ಆಡಿದವರಲ್ಲ.

ದೇವೇಗೌಡರು ಪ್ರಧಾನಿ ಆದಾಗ ಕೆಲ ತಿಂಗಳು ದೆಹಲಿಯಲ್ಲಿ ಇದ್ದರೂ ಚೆನ್ನಮ್ಮ ಎಂದೂ ತಾವು ಉಸಿರಾಗಿಸಿಕೊಂಡಿದ್ದ ಗ್ರಾಮೀಣ ಜೀವನವನ್ನು ಕಿಂಚಿತ್ತೂ ಮರೆಯಲಿಲ್ಲ ಎಂಬುದು ಈಗ ಇತಿಹಾಸ.

ಚೆನ್ನಮ್ಮ ಅವರು ಜೀವನದ ಉದ್ದಕ್ಕೂ ಮಕ್ಕಳ ಜತೆಗೆ ಪತಿಯ ಶ್ರೇಯೋಭಿವೃದ್ಧಿಯನ್ನು ಹೆಚ್ಚು ಬಯಸಿದವರು. ಇಳಿವಯಸ್ಸಿನಲ್ಲೂ ಪತಿಯ ಆರೋಗ್ಯದ ಬಗ್ಗೆ ಹೆಚ್ಚು ಕಾಳಜಿ ವಹಿಸುತ್ತಿದ್ದರು. ಅವರ ಊಟ-ಉಪಚಾರ, ಮಾತ್ರೆ ಸೇವನೆಯಿಂದ ಹಿಡಿದು ಅವರ ಕಲ್ಯಾಣಕ್ಕಾಗಿಯೇ ಸದಾ ಪ್ರಾರ್ಥಿಸುತ್ತಿದ್ದರು. ದೇವೇಗೌಡರೂ ಅಷ್ಟೇ ಕಾಳಜಿ-ಗೌರವವನ್ನು ಪತ್ನಿಯ ಬಗ್ಗೆ ಹೊಂದಿದ್ದರು. ಹೀಗಾಗಿಯೇ 72 ವರ್ಷಗಳ ಸುದೀರ್ಘ ದಾಂಪತ್ಯ ಜೀವನದಲ್ಲಿ ಇಬ್ಬರೂ ಮಾದರಿ ಸತಿ-ಪತಿಗಳಾಗಿ ಬಾಳಿದರು.

ಪತಿ ದೇವೇಗೌಡರ ಹುಟ್ಟೂರು ಹರದನಹಳ್ಳಿಗೆ ಹತ್ತಿರವೇ ಇರುವ ಮುತ್ತಿಗೆ ಹಿರೆಹಳ್ಳಿಯ ಚೆನ್ನಮ್ಮ ಅವರ ತಂದೆ ಹೆಸರೂ ದೇವೇಗೌಡ, ತಾಯಿ ಕಾಳಮ್ಮ. ಆಗಲೇ ಚೆನ್ನಮ್ಮ ಎಸ್‌ಎಸ್‌ಎಲ್‌ಸಿವರೆಗೂ ಶಿಕ್ಷಣ ಪಡೆದಿದ್ದರು. ದೇವೇಗೌಡ-ಕಾಳಮ್ಮ ದಂಪತಿಯ ಹಿರಿಯ ಮಗಳಾಗಿದ್ದ ಚೆನ್ನಮ್ಮ ಅವರಿಗೆ ನಾಲ್ವರು ತಮ್ಮಂದಿರು. ಮೂವರು ತಂಗಿಯರು. ಹಿರಿಯ ಮಗಳಾಗಿ ಒಡಹುಟ್ಟಿದವರನ್ನು ಸಾಕ್ಷಾತ್ ತಾಯಿಯಂತೆ ಸಾಕಿ ಸಲಹಿದ್ದು ಇದೇ ಚೆನ್ನಮ್ಮ.

ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರು ಹುಟ್ಟಿದ್ದು ಹೊಳೆನರಸೀಪುರ ತಾಲೂಕಿನ ಹರದನಹಳ್ಳಿಯಲ್ಲಿ. ಕಾಕತಾಳೀಯ ಎಂಬಂತೆ ಅವರ ಪತ್ನಿ ಚೆನ್ನಮ್ಮ ಅವರು ಹುಟ್ಟಿದ್ದೂ ಹರದನಹಳ್ಳಿಯಲ್ಲಿಯೇ. ದೇವೇಗೌಡರ ತಂದೆ ದೊಡ್ಡೇಗೌಡರ 2ನೇ ಪತ್ನಿ ದೇವಮ್ಮ ಅವರ ಮಗ ಎಚ್.ಡಿ.ದೇವೇಗೌಡರು. ಹಾಗೆಯೇ ಚೆನ್ನಮ್ಮ ಕೂಡ ಮುತ್ತಿಗೆ ಹಿರೇಹಳ್ಳಿಯ ಸಿರಿವಂತ ಪಟೇಲ್ ದೇವೇಗೌಡರ 2ನೇ ಹೆಂಡತಿ ಕಾಳಮ್ಮ ಅವರ ಮಗಳು. ಚೆನ್ನಮ್ಮ ಅವರ ತವರು ಮನೆ ಹಾಸನ ತಾಲೂಕು ಮುತ್ತಿಗೆ ಹಿರೇಹಳ್ಳಿ. ಚೆನ್ಮಮ್ಮ ಅವರ ತಾಯಿಯ ತವರೂರು ಹರದನಹಳ್ಳಿ. ಹರದನಹಳ್ಳಿ ಮತ್ತು ಮುತ್ತಿಗೆ ಹಿರೇಹಳ್ಳಿ ನಡುವಿನ ಅಂತರ ಕೇವಲ 4 ಕಿಮೀ ಮಾತ್ರ. ಚೆನ್ನಮ್ಮ ಅವರು ಹಬ್ಬ, ಹರಿದಿನಗಳಿಗೆ ಹರದನಹಳ್ಳಿಯ ಅಜ್ಜ - ಅಜ್ಜಿಯ ಮನೆಗೆ ಹೋಗಿ ಬರುತ್ತಿದ್ದರು. ಹಾಗಾಗಿ ವಿವಾಹದ ಪೂರ್ವದಲ್ಲೇ ದೇವೇಗೌಡರು ಹಾಗೂ ಚನ್ನಮ್ಮ ಅವರಿಗೆ ಪರಿಚಯವಿತ್ತು.

ಚೆನ್ನಮ್ಮ -ಎಚ್.ಡಿ.ದೇವೇಗೌಡ ವಿವಾಹ ನಡೆದದ್ದು 1954ರ ಮೇ 25ರಂದು ಮುತ್ತಿಗೆ ಹಿರೇಹಳ್ಳಿಯಲ್ಲಿ. ಆಗ ಎಚ್.ಡಿ.ದೇವೇಗೌಡರ ವಯಸ್ಸು 21, ಚೆನ್ನಮ್ಮ ಅವರ ವಯಸ್ಸು 17. ಅಂದು ದೇವೇಗೌಡರು ಸಿವಿಲ್ ಕಂಟ್ರಾೃಕ್ಟರ್ ಆಗಿದ್ದರು. ಎಚ್.ಡಿ.ದೇವೇಗೌಡ - ಚೆನ್ನಮ್ಮ ದಂಪತಿಗೆ ನಾಲ್ವರು ಪುತ್ರರು, ಇಬ್ಬರು ಪುತ್ರಿಯರು ಸೇರಿ 6 ಮಂದಿ ಮಕ್ಕಳು. ಹಿರಿಯ ಮಗ ಎಚ್.ಡಿ.ಬಾಲಕೃಷ್ಣಗೌಡ, 2ನೇ ಮಗ ಎಚ್.ಡಿ.ರೇವಣ್ಣ, 3ನೇ ಮಗ ಎಚ್.ಡಿ.ಕುಮಾರಸ್ವಾಮಿ, 4ನೇ ಮಗ ಡಾ.ಎಚ್. ಡಿ. ರಮೇಶ್, ಅನಸೂಯ ಹಿರಿಯ ಮಗಳು, ಶೈಲಜಾ 2ನೇ ಮಗಳು.

ಈ ಪೂಜಾ ಕಾರ್ಯಕ್ರಮವೇ ಚೆನ್ನಮ್ಮನವರ ಅಂತಿಮ ಭೇಟಿ ಆಗಿತ್ತು. ದೇವೇಗೌಡರ ಅಂದಿನ ರಾಜಕೀಯ ದಿನಗಳಲ್ಲಿ ತಾಲೂಕಿನಲ್ಲಿ ಹಲವು ಕುಟುಂಬಗಳ ಜತೆ ಉತ್ತಮ ಒಡನಾಟ ಹೊಂದಿದ್ದರು. ಮುಖಂಡರು, ಕಾರ್ಯಕರ್ತರು ಆಹ್ವಾನಿಸಿದ ಶುಭ ಸಮಾರಂಭಗಳಿಗೆ ಚಾಚು ತಪ್ಪದೆ ಭಾಗವಹಿಸುತ್ತಿದ್ದರು. ಇಂದೂ ಕೂಡ ತಾಲೂಕಿನ ಹಲವು ಕುಟುಂಬಗಳು ಚೆನ್ನಮ್ಮನವರು ಆಗಮಿಸಿದ ದಿನಗಳನ್ನು ಸ್ಮರಿಸುತ್ತಾರೆ. ಅವರ ಒಡನಾಟ, ಸರಳತೆ, ಪ್ರೀತಿ ಎಲ್ಲವನ್ನೂ ನೆನೆದು ಹೃದಯತುಂಬಿ ಗುಣಗಾನ ಮಾಡುತ್ತಾರೆ.