ಕಾಡಾನೆ ಉಪಟಳಕ್ಕೆ ಟ್ರಾನ್ಸ್‌ಮೀಟರ್ ಕಡಿವಾಣ

ಬೇಲೂರು, ಸಕಲೇಶಪುರ ಭಾಗದಲ್ಲಿ ಕಾಡಾನೆಗಳ ಉಪಟಳ ಮಿತಿಮೀರಿದ್ದು, ಸಾರ್ವಜನಿಕರ ನೆಮ್ಮದಿಗೆ ಭಂಗ ಉಂಟಾಗಿದೆ. ಕಾಫಿ ತೋಟಗಳನ್ನೇ ಆವಾಸ ಸ್ಥಾನವಾಗಿಸಿಕೊಂಡಿರುವ ಆನೆಗಳು ಯಾವಾಗ ಬೇಕೆಂದಾಗ ರಸ್ತೆಗೆ ಬರುತ್ತವೆ. ಇಂತಹ ಸಮಯದಲ್ಲಿ ವಾಹನ ಸವಾರರು ಸಿಲುಕಿದರೆ ಅಪಾಯ ಕಟ್ಟಿಟ್ಟ ಬುತ್ತಿ. ಕಾಡಾನೆಗಳ ಸಂಚಾರದ ವಿಡಿಯೋಗಳು ನಿತ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವುದು ಮಲೆನಾಡಿನ ಜನರ ಸಮಸ್ಯೆಗೆ ನಿದರ್ಶನವಾಗಿದೆ.

ಆನೆಯ ಕುತ್ತಿಗೆಗೆ ಅಳವಡಿಸುವ ಕಾಲರ್‌ನಲ್ಲಿ ಜಿಪಿಎಸ್, ವಿಎಚ್‌ಎಫ್ ರೇಡಿಯೋ ಟ್ರಾನ್ಸ್‌ಮೀಟರ್ ಅಳವಡಿಸಲಾಗಿರುತ್ತದೆ. ಪ್ರತಿ ಗಂಟೆಗೊಮ್ಮೆ ಆನೆಯ ಚಲನವಲನಗಳ ಬಗ್ಗೆ ಡೇಟಾ ಸ್ಯಾಟಲೈಟ್ ಮೂಲಕ ಅರಣ್ಯ ಇಲಾಖೆಯ ಸರ್ವರ್‌ಗೆ ರವಾನೆಯಾಗಲಿದೆ. ಫಾರೆಸ್ಟ್ ಸಿಬ್ಬಂದಿ ಹ್ಯಾಂಡ್-ಹೆಲ್ಡ್ ಆಂಟೆನಾ ಮೂಲಕ 5-10 ಕಿಮೀ ವ್ಯಾಪ್ತಿಯಲ್ಲಿ ಆನೆ ಪತ್ತೆ ಮಾಡಬಹುದು. ಜತೆಗೆ ಮೊಬೈಲ್ ಆ್ಯಪ್‌ನಲ್ಲಿ ರಿಯಲ್‌ಟೈಮ್ ಮ್ಯಾಪ್‌ನಲ್ಲಿ ಆನೆಗಳ ಚಲನೆ ಗೊಚರಿಸುವಂತೆ ಆ್ಯಪ್ ಅಭಿವೃದ್ಧಿ ಪಡಿಸಲಾಗಿದೆ. ಆನೆ ಜನವಸತಿ ಪ್ರದೇಶಗಳ ಕಡೆ ಬಂದರೆ ತಕ್ಷಣ ಅಲರ್ಟ್ ಮಾಡುತ್ತದೆ. ಇದಲ್ಲದೆ ವಲಸೆ ಮಾರ್ಗ ಅಧ್ಯಯನ, ಆರೋಗ್ಯ ಮಾನಿಟರಿಂಗ್, ಕಳ್ಳ ಬೇಟೆ ತಡೆಗೂ ಸಹಕಾರಿಯಾಗಲಿದೆ.

ಬೇಲೂರು, ಆಲೂರು, ಸಕಲೇಶಪುರ, ಅರಕಲಗೂಡು ಭಾಗದಲ್ಲಿ ಕಾಡಾನೆಗಳ ಹಾವಳಿ ಹೆಚ್ಚಿದೆ. ಒಟ್ಟು 85 ರಿಂದ 90 ಆನೆಗಳಿದ್ದು, ಈ ಪೈಕಿ 30ಕ್ಕೂ ಹೆಚ್ಚು ಆನೆಗಳು ಸಕಲೇಶಪುರ ತಾಲೂಕಿನ ಯಸಳೂರು ಭಾಗದಲ್ಲಿ ಸಂಚರಿಸುತ್ತಿವೆ ಎಂದು ಅರಣ್ಯ ಇಲಾಖೆ ಅಂದಾಜಿಸಿದೆ. ಕಾಡಾನೆ ಹಾಗೂ ಮಾನವ ಸಂಘರ್ಷ ತಡೆಗೆ ಅರಣ್ಯ ಇಲಾಖೆ ಶಕ್ತಿ ಮೀರಿ ಶ್ರಮಿಸುತ್ತಿದೆ. ಜಿಲ್ಲೆಯಲ್ಲಿ 140 ಇಟಿಎಫ್ ಸಿಬ್ಬಂದಿ ಹೊರಗುತ್ತಿಗೆ ಆಧಾರದಡಿ ಕೆಲಸ ಮಾಡುತ್ತಿದ್ದು, ಆನೆಗಳ ಚಲನವಲನಗಳ ಮೇಲೆ ನಿಗಾ ಇಟ್ಟಿದ್ದಾರೆ. 54 ಲಕ್ಷ ರೂ. ವೆಚ್ಚದಲ್ಲಿ 3 ಕ್ಯಾಂಪರ್ಸ್‌ ಹಾಗೂ 10 ಬೈಕ್‌ಗಳನ್ನು ಅರಣ್ಯ ಇಲಾಖೆಗೆ ನೀಡಲಾಗಿದೆ. ಜತೆಗೆ ಆನೆ ಸಂಚಾರ ಪ್ರದೇಶದ 35 ಕಿ.ಮೀ. ರೈಲ್ವೆ ಬ್ಯಾರಿಕೇಡ್ ಅಳವಡಿಸಲಾಗಿದೆ. ಆದಾಗ್ಯೂ ಸಂಘರ್ಷಕ್ಕೆ ತಡೆ ಬಿದ್ದಿಲ್ಲ.

ಕಾಡಾನೆಗಳ ದಾಳಿಗೆ 2023-24ರಿಂದ 2026-27ರವರೆಗೆ 14 ಜನರು ಮೃತಪಟ್ಟಿದ್ದಾರೆ. ಕಾಡಾನೆಗಳ ಜತೆಗೆ ಕರಡಿ, ಕಾಡುಕೋಣ, ಕಾಡು ಹಂದಿ ಉಪಟಳವು ಮಲೆನಾಡಿನ ಜನರ ನಿದ್ದೆಗೆಡಿಸಿದೆ. ಮೂರು ವರ್ಷಗಳಲ್ಲಿ ವನ್ಯಪ್ರಾಣಿಗಳ ದಾಳಿಯಿಂದ ಹಾನಿಗೀಡಾದ ಬೆಳೆ ಹಾಗೂ ಮೃತ ಕುಟುಂಬಕ್ಕೆ ಪರಿಹಾರ ಸೇರಿ ರಾಜ್ಯ ಸರ್ಕಾರ 15.16 ಕೋಟಿ ರೂ. ಬಿಡುಗಡೆ ಮಾಡಿದೆ. 2023ರಲ್ಲಿ 4.76 ಕೋಟಿ ರೂ., 2024ರಲ್ಲಿ 4.19 ಕೋಟಿ ರೂ., 2025ರಲ್ಲಿ 6.6 ಕೋಟಿ ರೂ. ಹಾಗೂ ಈ ವರ್ಷ 75 ಲಕ್ಷ ರೂ. ಪರಿಹಾರ ನೀಡಲಾಗಿದೆ. ಇನ್ನು 60 ಲಕ್ಷ ರೂ. ಪರಿಹಾರದ ಧನ ಬಾಕಿ ಇದೆ. ಇಷ್ಟು ವರ್ಷಗಳ ಕಾಲ ಪರಿಹಾರ ಮೊತ್ತವನ್ನು ಖಜಾನೆಯಿಂದ ನೇರವಾಗಿ ನೀಡಲಾಗುತ್ತಿತ್ತು. ಇನ್ನು ಮುಂದೆ ಡಿಬಿಟಿ ಮೂಲಕ ಕೊಡುವ ವ್ಯವಸ್ಥೆ ಮಾಡಿಕೊಂಡಿದ್ದು ಫಲಾನುಭವಿಗಳು ಕಚೇರಿಗೆ ಅಲೆದಾಡುವುದು ತಪ್ಪಲಿದೆ.