ಕೇಂದ್ರ ಗೃಹ ಸಚಿವರ ಟೀಕೆ ಸರಿಯಲ್ಲ

ಚಳಿಗಾಲದ ಅಧಿವೇಶನದ ಕೊನೆಯ ದಿನ ರಾತ್ರಿ ವಿಧಾನ ಪರಿಷತ್‌ನಲ್ಲಿ ದ್ವೇಷ ಭಾಷಣ ಮಸೂದೆ ಮೇಲೆ ಚರ್ಚೆ ನಡೆಯುತ್ತಿದ್ದ ವೇಳೆ ಪ್ರಿಯಾಂಕ್ ಖರ್ಗೆ ಕೇಂದ್ರ ಗೃಹ ಸಚಿವ ಅಮಿತ್ ಶಾ ನಾಲಾಯಕ್ ಗೃಹ ಮಂತ್ರಿ ಎಂದಿದ್ದಾರೆ. ಇದು ಖಂಡನೀಯ. ಮಲ್ಲಿಕಾರ್ಜುನ ಖರ್ಗೆಗೆ ಅವರ ಪುತ್ರರಾಗಿ ಹಿರಿಯರ ಬಗ್ಗೆ ನಾಲಗೆ ಹರಿಯ ಬಿಡುವುದು ಸರಿಯಲ್ಲ. ನಿಮ್ಮ ತಂದೆಯವರು ಅರ್ಧ ಶತಮಾನ ಸಕ್ರಿಯ ರಾಜಕೀಯದಲ್ಲಿದ್ದಾರೆ. ಸಾಕಷ್ಟು ಕೊಡುಗೆ ನೀಡಿದ್ದಾರೆ ಅವರು ಎಂದೂ ಯಾರ ಬಗ್ಗೆಯೂ ಹಗುರ ಮಾತಾಡಿಲ್ಲ. ಆದರೆ ನೀವು ಬಾಯಿಗೆ ಬಂದಂತೆ ಮಾತನಾಡುವುದು ಸಲ್ಲದು ಎಂದು ಶನಿವಾರ ಸುದ್ದಿಗೋಷ್ಠಿಯಲ್ಲಿ ಹೇಳಿದರು.

ಪರಿಷತ್‌ನಲ್ಲಿ ನಡೆಯುವ ಚರ್ಚೆಯನ್ನು ನಾಡಿನ ಜನತೆ ಗಮನಿಸುತ್ತಿರುತ್ತಾರೆ. ಅದರ ಅರಿವು ನಿಮಗೂ ಇರಬೇಕು. ಅಮಿತ್ ಶಾ ಅವರು 2 ಬಾರಿ ಗೃಹಮಂತ್ರಿಯಾಗಿ ತಮ್ಮದೇ ಕೊಡುಗೆ ನೀಡಿದ್ದಾರೆ. ಅಂಥವರ ಬಗ್ಗೆ ಲಘುವಾಗಿ ಮಾತನಾಡುವುದನ್ನು ನಿಲ್ಲಿಸಿ. ಇದು ಹೀಗೆಯೇ ಮುಂದುವರಿದರೆ ಉಗ್ರಪ್ರತಿಭಟನೆ ಮಾಡಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು.

ಈ ಬಾರಿಯ ಅಧಿವೇಶನದಲ್ಲಿ ಹಲವು ವಿಚಾರ, ಸಮಸ್ಯೆಗಳ ಬಗ್ಗೆ ಸದನದಲ್ಲಿ ಪ್ರಶ್ನೆ ಎತ್ತಿದ್ದೇನೆ. ಆದರೆ ಸರ್ಕಾರ, ಸಚಿವರ ಕಡೆಯಿಂದ ಸಮಾಧಾನಕರ ಉತ್ತರ ಸಿಕ್ಕಿಲ್ಲ. ಅಭಿವೃದ್ಧಿ ಪರವಾದ, ಅನುದಾನ ನೀಡುವ ಉತ್ತರವೂ ಸಿಗಲಿಲ್ಲ. ಮೆಕ್ಕೆಜೋಳಕ್ಕೆ ಪರಿಹಾರದ ಬೇಡಿಕೆಗೆ ಸ್ಪಂದನೆ ಸಿಗಲಿಲ್ಲ. ಬದಲಾಗಿ ಮಾತೆತ್ತಿದರೆ ಅನೇಕರು ಕೇಂದ್ರ ಸರ್ಕಾರದತ್ತ ಬೊಟ್ಟು ಮಾಡಿದರು ಎಂದು ಬೇಸರ ಹೊರ ಹಾಕಿದರು. ಮುಂಗಾರು ಮಳೆ ನಷ್ಟದ ನಡೆದಿರುವ ಸರ್ವೇ ಸರಿಯಾಗಿಲ್ಲ, ಇನ್ನಾದರೂ ಸಮರ್ಪಕ ಸರ್ವೇ ನಡೆಸಿ ಆಗಿರುವ ಬೆಳೆನಷ್ಟಕ್ಕೆ ನ್ಯಾಯಯುತ ಪರಿಹಾರ ನೀಡಲಿ ಎಂದು ಆಗ್ರಹಿಸಿದರು.

ಇದೇ ವೇಳೆ ಸರ್ಕಾರದ ಕಾರ್ಯಕ್ರಮಕ್ಕೆ ಸ್ಥಳೀಯ ಶಾಸಕರೇ ಅಧ್ಯಕ್ಷರಾಗಬೇಕು ಎಂಬ ಶಿಷ್ಟಾಚಾರ ಬದಲು ಮಾಡಿರುವುದನ್ನು ಸರಿಪಡಿಸುವುದಾಗಿ ಸರ್ಕಾರದಿಂದ ಭರವಸೆ ಸಿಕ್ಕಿದೆ ಎಂದು ಮಂಜು ಹೇಳಿದರು.

ಬಿಜೆಪಿ ಎಸ್‌ಸಿ ಮೋರ್ಚಾ ಜಿಲ್ಲಾಧ್ಯಕ್ಷ ಚಂದ್ರು, ಆಲೂರು-ಕಟ್ಟಾಯ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಅಬ್ಬುನ ಕೃಷ್ಣ, ಮುಖಂಡ ರಾಜಶೇಖರ್ ಇದ್ದರು.