ಚನ್ನಕೇಶವಸ್ವಾಮಿ ಉತ್ಸವದಲ್ಲಿ ಪೌರ ಕಾರ್ಮಿಕರ ಸೇವೆ ಅಪಾರ

ಶ್ರೀ ಚನ್ನಕೇಶವಸ್ವಾಮಿ ಜಾತ್ರಾ ಮಹೋತ್ಸವ ಹಾಗೂ ರಥೋತ್ಸವದಲ್ಲಿ 70 ರಿಂದ 80 ಸಾವಿರಕ್ಕೂ ಹೆಚ್ಚು ಜನರು ಪಾಲ್ಗೊಂಡು ದೇವರ ದರ್ಶನ ಪಡೆದಿದ್ದಾರೆ. ರಥೋತ್ಸವದ ಸಂದರ್ಭದಲ್ಲಿ ಪೌರ ಕಾರ್ಮಿಕರು ಹಗಲು ರಾತ್ರಿ ಎನ್ನದೆ ತಮ್ಮ ಸ್ವಂತ ಮನೆಯ ಕಾರ್ಯಕ್ರಮ ಎಂಬಂತೆ ಬೇಸರ ಮಾಡಿಕೊಳ್ಳದೆ ದೇಗುಲ ಆವರಣ ಸೇರಿದಂತೆ ಪಟ್ಟಣವನ್ನು ಸ್ವಚ್ಛವಾಗಿಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ಯುಗಾದಿ ಹಬ್ಬದ ದಿನದಿಂದ ಪ್ರಾರಂಭವಾದ ದೇವರ ಉತ್ಸವಗಳಿಗೆ ಪ್ರತಿನಿತ್ಯ ಸಾವಿರಾರು ಜನರು ಭಾಗಿಯಾಗುತ್ತಿದ್ದರು. ಜತೆಗೆ ಜಾತ್ರಾ ಮಹೋತ್ಸವಕ್ಕೆ ಆಗಮಿಸಿದವರು ತಾವು ತಂದಿದ್ದ ಆಹಾರ ತಿಂದು ಎಲ್ಲೆಂದರಲ್ಲಿ ಬಿಸಾಕಿ ಹೋಗುತ್ತಿದ್ದರು. ಆದರೆ ಬೆಳ್ಳಂಬೆಳಗ್ಗೆ ಎದ್ದು ಬರುತ್ತಿದ್ದ ಕಾರ್ಮಿಕರು ಬೀದಿಗಳನ್ನೆಲ್ಲ ಗುಡಿಸಿ ಸ್ವಚ್ಛಗೊಳಿಸಿ ಪಟ್ಟಣವನ್ನು ಅಂದವಾಗಿಡುತ್ತಿದ್ದರು.

ಎರಡು ದಿನ ನಡೆದ ಬ್ರಹ್ಮರಥೋತ್ಸವ ಹಾಗೂ ನಾಡ ರಥೋತ್ಸವದಂದು ಭಕ್ತರು ರಥದ ಬಾಳೆಹಣ್ಣು, ದವನ, ಕಾಳು ಮೆಣಸು ಎಸೆದು ಭಕ್ತಿ ಪ್ರದರ್ಶಿಸುತ್ತಿದ್ದರು. ಆದರೆ ರಥಕ್ಕೆ ಎಸೆದ ಬಾಳೆ ಹಣ್ಣುಗಳು ನೆಲಕ್ಕೆ ಬಿದ್ದು ಅಪ್ಪಚ್ಚಿಯಾಗುತ್ತಿತ್ತು. ಇದನ್ನು ಭಕ್ತರು ತುಳಿಯುತ್ತಿದ್ದರಿಂದ ಮತ್ತಷ್ಟು ಕೆಸರಾಗುತ್ತಿತ್ತು. ಆದರೆ ರಥ ನಿಂತು ಭಕ್ತರು ತೆರಳಿದ ನಂತರ ಇದನ್ನೆಲ್ಲ ಪೌರ ಕಾರ್ಮಿಕರ ತಂಡ ಕ್ಷಣಾರ್ಧದಲ್ಲಿ ಸ್ವಚ್ಛಗೊಳಿಸಿ ಎಂದಿನಂತೆ ಕಾಣುವಂತೆ ಮಾಡುತ್ತಿದ್ದರು. ಜತೆಗೆ ಪ್ರಮುಖ ರಸ್ತೆ, ಬೀದಿಗಳಲ್ಲಿಯೂ ಹಾಕುತ್ತಿದ್ದ ಕಸವನ್ನೆಲ್ಲ ಗುಡಿಸಿ ತೆಗೆದು ಹಾಕುವ ಮೂಲಕ ಪಟ್ಟಣವನ್ನು ಅಂದವಾಗಿ ಕಾಣುವಂತೆ ಮಾಡಿ 13 ದಿನಗಳು ನಿರಂತರವಾಗಿ ನಡೆದ ಜಾತ್ರಾ ಮಹೋತ್ಸವಕ್ಕೆ ಕಳೆ ತರುತ್ತಿದ್ದದ್ದು ಎದ್ದು ಕಾಣುತ್ತಿತ್ತು. ಇದನ್ನು ಗಮನಿಸಿದ ದೇಗುಲದ ಅಧಿಕಾರಿಗಳು, ತಾಲೂಕು ಆಡಳಿತ ಹಾಗೂ ಪುರಸಭೆ ಅಧಿಕಾರಿಗಳು ಸೇರಿದಂತೆ ಭಕ್ತರು, ಪ್ರವಾಸಿಗರು ವಿವಿಧ ಸಂಘಟನೆಗಳ ಮುಖಂಡರು ಪೌರ ಕಾರ್ಮಿಕರ ಕಾರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.