ಅಧಿಕಾರಿಗಳ ಎಡವಟ್ಟಿನಿಂದ ತೊಂದರೆ ಅನುಭವಿಸಿದ್ದ ನಿಜ ಫಲಾನುಭವಿ

ತಾಲೂಕಿನ ಹಳೇಕೋಟೆ ಹೋಬಳಿಯ ಹಳೇಕುಂಚೆ ಗ್ರಾಮದ ರೈತ ಎಚ್.ಜೆ.ರಂಗಸ್ವಾಮಿ ಸಾಲ ಬಾಧೆಯಿಂದ ಕಳೆದ 2 ವರ್ಷಗಳ ಹಿಂದೆ ಮರಕ್ಕೆ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು. ಆತನ ಪತ್ನಿ ಜಯಮ್ಮ ಪರಿಹಾರ ಕೋರಿ ಅರ್ಜಿ ಸಲ್ಲಿಸಿದ್ದರು. ಇವರ  ದಾಖಲೆಗಳ ಜತೆಗೆ ಅರೆಕಲ್ಲು ಹೊಸಹಳ್ಳಿಯ ರಂಗೇಗೌಡ ಎಂಬುವರ ಪತ್ನಿ ಜಯಮ್ಮ ಎಂಬುವರ ಆಧಾರ್ ಕಾರ್ಡ್ ನಕಲು ಪ್ರತಿ ನುಸುಳಿದ್ದರಿಂದ ಅವರ  ಆಧಾರ್ ಸಂಖ್ಯೆ ಆಧರಿಸಿ ಪರಿಹಾರ ಹಣ ಸಂದಾಯವಾಗಿತ್ತು.

ಒಂದು ವರ್ಷ ಕಳೆದರೂ ಪರಿಹಾರ ಹಣ ಬರದಿದ್ದನ್ನು  ಪ್ರಶ್ನಿಸಿ ಅರ್ಹ ಫಲಾನುಭವಿ ಜಯಮ್ಮ ಮತ್ತು ಪುತ್ರ ಕೃಷಿ ಇಲಾಖೆಗೆ ಅಲೆದಾಡಿದ್ದರು. ಕಡೆಗೆ ಗ್ರಾಮಸ್ಥರು ಪ್ರತಿಭಟಿಸುವ ಎಚ್ಚರಿಕೆ ಸಹ ನೀಡಿದ್ದ ಸುದ್ದಿ ಹಿಂದೆ ಮಾಧ್ಯಮದಲ್ಲಿ ವರದಿಯಾಗಿತ್ತು. ಕಳೆದ ಜೂ.17ರಂದು ಪಟ್ಟಣದ ಕೃಷಿ ಕಚೇರಿ ಹಾಗೂ ತಾಲೂಕು ಕಚೇರಿಯಲ್ಲಿ ಅಧಿಕಾರಿಗಳನ್ನು ಭೇಟಿ ಮಾಡಿ ದಾಖಲೆ ಪರಿಶೀಲಿಸಿದಾಗ ಹಣ ವರ್ಗಾವಣೆ ಬದಲಾಗಿದ್ದರ ಸತ್ಯಾಂಶ ಹೊರಬಿದ್ದಿತ್ತು. ಜಿಲ್ಲಾಧಿಕಾರಿ ಅವರು ಗಮನ ಹರಿಸುವಂತೆ ಅಧಿಕಾರಿಗಳಿಗೆ ನೋಟಿಸ್ ನೀಡಿದ್ದರು.

ತಹಸೀಲ್ದಾರ್ ವೈ.ಎಂ.ರೇಣುಕುಮಾರ್, ಕೃಷಿ ಸಹಾಯಕ ನಿರ್ದೇಶಕಿ ಸ್ವಪ್ನಾ ಪ್ರಯತ್ನ ನಡೆಸಿ ವಾಪಸ್ ಹಣ ಕೊಡಿಸುವ ಭರವಸೆ ನೀಡಿದ್ದರು. ಕುಟುಂಬದ ಪ್ರಯತ್ನದ ಫಲವಾಗಿ ಪರಿಹಾರ ಹಣ ಬ್ಯಾಂಕ್ ಖಾತೆಯಿಂದ ಪಡೆದಿದ್ದ ಅರೆಕಲ್ಲು ಹೊಸಹಳ್ಳಿ ಜಯಮ್ಮ ಪ್ರಾಮಾಣಿಕವಾಗಿ ಹಿಂದಿರುಗಿಸಿದ್ದಾರೆ. ಪ್ರಸ್ತುತ ಅರ್ಹ ಫಲಾನುಭವಿ ಖಾತೆ ಸೇರಿದೆ. ಇದರಿಂದ ಇಡೀ ಪ್ರಕರಣ ಸುಖಾಂತ್ಯವಾಗಿದೆ. ಕಚೇರಿಗೆ ಭೇಟಿ ನೀಡಿದ ಇಬ್ಬರೂ ಜಯಮ್ಮ ಹಾಗೂ ಕೃಷಿ ಇಲಾಖೆ ವ್ಯವಸ್ಥಾಪಕ ಅಧಿಕಾರಿ ರಾಹುಲ್‌ಪ್ರಕಾಶ್, ವಿಎ ನವೀನ್ ಹಣ ಸಂದಾಯ ರಶೀದಿಗೆ ಸಹಿ ಹಾಕಿಸಿಕೊಂಡು ಹಣ ವಾಪಸ್ ಕೊಡಿಸಿದ್ದಾರೆ.