ಜನ್ಮ ಜನ್ಮಾಂತರಕ್ಕೂ ಕಾಡಲಿದೆ ಸಾಧು, ಸಂತರ ಶಾಪ

ತಾಲೂಕಿನ ಮಾಡಾಳು ಗ್ರಾಮದ ಮೂಲ ಸ್ವರ್ಣಗೌರಿ ಅಮ್ಮನವರ ದೇವಾಲಯದ ಆವರಣದಲ್ಲಿ ಬುಧವಾರ ಆಯೋಜಿಸಿದ್ದ ಶ್ರೀಶಿವಲಿಂಗ ಸ್ವಾಮೀಜಿ ಅವರ 139ನೇ ವರ್ಷದ ಸ್ಮರಣಾರಾಧನೆ ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿ ಮಾತನಾಡಿದರು.

ಸರ್ವ ಸಂಘ ಪರಿತ್ಯಾಗಿಗಳಾಗಿರುವ ಸಾಧು, ಸಂತರಿಗೆ ಮಾಡುವ ನೋವು ಅವರ ವಂಶವನ್ನೇ ನಿರ್ನಾಮ ಮಾಡುತ್ತದೆ. ಹಾಗಾಗಿ ಗುರು ಪರಂಪರೆಯ ಮೇಲೆ ಭಕ್ತಿ ಭಾವದಿಂದ ನಡೆದುಕೊಳ್ಳುವ ಮನುಷ್ಯನನ್ನು ಹರ ಮುನಿದರೂ ಗುರು ಕಾಯುವನು ಎಂಬಂತಹ ಮಹತ್ವದ ಸ್ಥಾನ ನೀಡಲಾಗಿದೆ ಎಂದರು.

ಶ್ರೀಮಠವು ಯಾವುದೇ ಒಂದು ಜಾತಿ, ಧರ್ಮ ಮತಕ್ಕೆ ಸೀಮಿತವಾಗಿಲ್ಲ, ಸರ್ವಧರ್ಮೀಯರಿಗೂ ಹರಸಿ ಹಾರೈಸುವ ಮಠವಾಗಿದೆ ಎಂದರು.

ಶ್ರೀಶಿವಯೋಗಿ ಶಿವಾಚಾರ್ಯ ಸ್ವಾಮೀಜಿ ಮಾತನಾಡಿ, 12ನೇ ಶತಮಾನದಲ್ಲಿ ಬಸವಣ್ಣ ಕಟ್ಟಿದ ಮಠಗಳು, ಇಂದಿಗೂ ಅದೇ ತತ್ವ ಸಿದ್ಧಾಂತದಡಿ ಸಮಾಜಕ್ಕೆ ಸೇವೆ ಸಲ್ಲಿಸುತ್ತ ಬಂದಿವೆ. ಅದರಲ್ಲಿ ವಿಶೇಷವಾಗಿ ಕೋಡಿಮಠವು ಜಾತ್ಯತೀತವಾಗಿ ತನ್ನನ್ನು ನಂಬಿ ಬರುವ ಎಲ್ಲ ಭಕ್ತರಿಗೂ ಸನ್ಮಾರ್ಗ ತೋರುತ್ತಿದ್ದು, ಪೀಠಾಧ್ಯಕ್ಷ ಶ್ರೀ ಶಿವಾನಂದ ಶಿವಯೋಗಿ ರಾಜೇಂದ್ರ ಸ್ವಾಮೀಜಿ ಅವರು ಬಸವಣ್ಣನವರ ಆಶಯದಂತೆ ಜಾತಿ, ಮತ, ಪಂಥ, ಭೇದ ಎಣಿಸದೆ ಎಲ್ಲರಿಗೂ ಸಹಬಾಳ್ವೆಯ ಸಂದೇಶ ಸಾರುತ್ತಿರುವುದು ಇತರ ಮಠಗಳಿಗೆ ಆದರ್ಶವಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ಸ್ವರ್ಣಗೌರಮ್ಮ ದೇವಿಯ ಇಚ್ಛೆಯಂತೆ ನೂತನವಾಗಿ ನಿರ್ಮಾಣ ಆಗುತ್ತಿರುವ ದೇವಾಲಯವು ದೇಶದ 18 ಶಕ್ತಿಪೀಠಗಳಿವೆಯೋ ಅಂತೆಯೇ ಇದು 19ನೇ ಶಕ್ತಿಪೀಠವಾಗಿ ಬೆಳೆಯಲಿದ್ದು, ನೊಂದು ಬರುವ ಭಕ್ತರಿಗೆ ಜಗನ್ಮಾತೆ ಸ್ವರ್ಣಗೌರಮ್ಮ ದೇವಿ ಉದ್ಧರಿಸಲಿದ್ದಾಳೆ ಎಂದು ಹೇಳಿದರು.

ಬೊಮ್ಮನಹಳ್ಳಿ ಮಠದ ಶ್ರೀಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ, ಮಾಡಾಳು ನಿರಂಜನ ಮಠದ ಶ್ರೀರುದ್ರಮುನಿ ಸ್ವಾಮೀಜಿ, ಮೂರು ಕಳಶ ಮಠದ ಜ್ಞಾನಪ್ರಭು ಸಿದ್ಧರಾಮ ದೇಶಿಕೇಂದ್ರ ಸ್ವಾಮೀಜಿ, ಕೋಡಿಮಠದ ಉತ್ತರಾಧಿಕಾರಿ ಚೇತನ್ ಮರಿದೇವರು, ಎಚ್‌ಡಿಸಿಸಿ ಬ್ಯಾಂಕ್ ಉಪಾಧ್ಯಕ್ಷ ರಾಂಪುರ ಶೇಖರಪ್ಪ, ಬಿಜೆಪಿ ಮುಖಂಡ ಜಿವಿಟಿ ಬಸವರಾಜ್, ಕೆವಿಎನ್ ಶಿವು, ಜೆಡಿಎಸ್ ಮುಖಂಡ ಚಂದ್ರಶೇಖರ್, ಶೇಖರಪ್ಪ, ತಾಪಂ ಮಾಜಿ ಸದಸ್ಯೆ ಲಕ್ಷ್ಮೀ ಶ್ರೀಧರ್, ಮಾಡಾಳು ಮೂಲ ಸ್ವರ್ಣಗೌರಿ ದೇವಾಲಯದ ಅಭಿವೃದ್ಧಿ ಸಮಿತಿ ಅಧ್ಯಕ್ಷ ನಟರಾಜ್, ದಲಿತ ಮುಖಂಡ ಶಂಕರರಾಜು ಇತರರು ಇದ್ದರು.

ಸಭಾ ಕಾರ್ಯಕ್ರಮಕ್ಕೂ ಮುನ್ನ ಮೂಲ ಸ್ವರ್ಣಗೌರಮ್ಮ ದೇವಾಲಯ ಆವರಣದಲ್ಲಿ ಉತ್ಸವ ಜರುಗಿತು. ಇದರೊಂದಿಗೆ ಕಳೆದ 6 ದಿನಗಳಿಂದ ನಡೆಯುತ್ತಿದ್ದ ಶಿವಲಿಂಗಜ್ಜಯ್ಯ ಅವರ ಪುಣ್ಯ ಪ್ರವಚನ ಮುಕ್ತಾಯವಾಯಿತು. ಸಾವಿರಾರು ಭಕ್ತರಿಗೆ ಅನ್ನಸಂತರ್ಪಣೆ ಮಾಡಲಾಯಿತು.