ಆರೋಗ್ಯ ಬದುಕಿಗೆ ಆಟೋಟ ಸಹಕಾರಿ

ನಗರದ ಜಿಲ್ಲಾ ಕ್ರೀಡಾಂಗಣದಲ್ಲಿ ಗುರುವಾರ ಆದಿಚುಂಚನಗಿರಿ 28ನೇ ರಾಜ್ಯ ಸಮಟ್ಟದ ಕ್ರೀಡಾಕೂಟಕ್ಕೆ ಚಾಲನೆ ನೀಡಿ ಮಾತನಾಡಿ, ಉಸಿರು ಇಲ್ಲದೆ ದೇಹ ಬದುಕಲ್ಲ. ನೂರು ವರ್ಷದ ಮನುಷ್ಯನ ಬದುಕು ಆರೋಗ್ಯದಿಂದ ಇರಬೇಕಾದರೆ ಆಟೋಟ ಸಹಾಯಕಾರಿ. ಇದನ್ನು ಮನಗಂಡು 28 ವರ್ಷಗಳ ಹಿಂದೆಯೇ ಭೈರವೈಕ್ಯ ಡಾ.ಬಾಲಗಂಗಾಧರನಾಥ ಸ್ವಾಮೀಜಿ ಈ ಕ್ರೀಡಾಕೂಟ ಆರಂಭಿಸಿದ್ದರು. ಮೊದಲು ಶಿವಮೊಗ್ಗದಿಂದ ಆರಂಭವಾಗಿ ನಡುವೆ ಎರಡು ವರ್ಷ ಹೊರತುಪಡಿಸಿದರೆ, ಆರಂಭದಿಂದ ಇಲ್ಲಿಯವರೆಗೂ ನಿರಂತರವಾಗಿ ನಡೆದುಕೊಂಡು ಬರುತ್ತಿದೆ ಎಂದರು.

ವರ್ಷಕ್ಕೆ ಒಂದೊಂದು ಜಿಲ್ಲೆಯಲ್ಲಿ ಸ್ಪರ್ಧೆ ನಡೆಸಲಾಗುತ್ತಿದೆ. ಈ ಹಿಂದೆ 13ನೇ ರಾಜ್ಯಮಟ್ಟದ ಕ್ರೀಡಾಕೂಟ ಹಾಸನದಲ್ಲಿ ನಡೆದಿತ್ತು. ಈಗ 28ನೇ ವರ್ಷದ ಕ್ರೀಡಾಕೂಟ ನಡೆಯುತ್ತಿದೆ. ಭಕ್ತರು, ಅಧಿಕಾರಿಗಳ ಸಹಕಾರದಿಂದ ಶ್ರೀ ಶಂಭುನಾಥ ಸ್ವಾಮೀಜಿ ಅವರ ನೇತೃತ್ವದಲ್ಲಿ ಚೆನ್ನಾಗಿ ಸಂಘಟನೆ ಆಗಿದೆ ಎಂದು ಶ್ರೀಗಳು ಪ್ರಶಂಸೆವ್ಯಕ್ತಪಡಿದರು.

ಕ್ರಿಕೆಟ್ ದಂತಕತೆ ಸಚಿನ್ ತೆಂಡೂಲ್ಕರ್ ಅವರ ಮಾತು ಉದ್ಧರಿಸಿದ ಶ್ರೀಗಳು, ನಾವು ಭಾರತೀಯರು ಕ್ರೀಡೆಗೆ ಸಾಕಷ್ಟು ಬೆಂಬಲ, ಉತ್ತೇಜನ ನೀಡುತ್ತೇವೆ. ಅಭ್ಯಾಸ, ತರಬೇತಿ ಪಡೆಯುವಲ್ಲಿ ಹಿಂದೆ ಇದ್ದೇವೆ. ಇದೇ ಕಾರಣಕ್ಕೆ ನಮ್ಮಲ್ಲಿ ವಿಶ್ವದಲ್ಲೇ ಹೆಚ್ಚು ಮಾನವ ಸಂಪನ್ಮೂಲ ಇದ್ದರೂ ಗಣನೀಯ ಸಾಧನೆ ಮಾಡಲಾಗುತ್ತಿಲ್ಲ. ಇನ್ನು ಮುಂದೆ ನೀವೆಲ್ಲ ಹೆಚ್ಚು ಹೆಚ್ಚು ವಿವಿಧ ಕ್ರೀಡಾಭ್ಯಾಸ ಮಾಡಿ, ಭಾಗಿಯಾಗಿ ಸಾಧನೆ ಮಾಡಿ ಎಂದು ಹರಸಿದರು.

ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ ಮಾತನಾಡಿ, ಕ್ರೀಡೆ ನನ್ನ ಬದುಕಿನಲ್ಲಿ ಸಾಕಷ್ಟು ಪ್ರಭಾವ ಬೀರಿದೆ. ಇದರಲ್ಲಿ ಸೋಲು-ಗೆಲುವು ಇರುವಂತೆ, ನಾನೂ ರಾಜಕೀಯ ಏಳುಬೀಳು ಕಂಡಿದ್ದೇನೆ. ಆದರೆ ಕ್ರೀಡಾ ಮನೋಭಾವನೆಯಿಂದ ಸಮಚಿತ್ತದಿಂದ ಸ್ವೀಕಾರ ಮಾಡಿದ್ದೇನೆ. ಇದು ನನಗೆ ಶ್ರೀಮಠ ಕಲಿಸಿದ ಸಂಸ್ಕಾರ. ಹಾಗಾಗಿ ನೀವೆಲ್ಲರೂ ಕ್ರೀಡೆಯಲ್ಲಿ ಹೆಚ್ಚು ಹೆಚ್ಚು ತೊಡಗಿಸಿಕೊಳ್ಳಿ ಎಂದು ಕರೆ ನೀಡಿದರು.

ಶಾಸಕ ಎಚ್.ಪಿ.ಸ್ವರೂಪ್ ಪ್ರಕಾಶ ಮಾತನಾಡಿ, ಹಿಂದೆ ಹಾಸನದಲ್ಲಿ ಕ್ರೀಡಾಕೂಟ ನಡೆದಾಗ ನನ್ನ ತಂದೆ ದಿ.ಎಚ್.ಎಸ್.ಪ್ರಕಾಶ್ ಶಾಸಕರಾಗಿದ್ದರು. ಈಗ ನಾನು ಎಂಎಲ್‌ಎ ಆಗಿದ್ದು, ಇದು ನನ್ನ ಸೌಭಾಗ್ಯ ಎಂದರು.

ಶ್ರವಣಬೆಳಗೊಳ ಶಾಸಕ ಸಿ.ಎನ್.ಬಾಲಕೃಷ್ಣ ಮಾತನಾಡಿ, 1.60 ಲಕ್ಷ ಮಕ್ಕಳಿಗೆ ಜಾತಿ, ಧರ್ಮ, ಬೇಧ ಇಲ್ಲದೆ ಶಿಕ್ಷಣ ನೀಡುತ್ತಿರುವ ಶ್ರೀಮಠವು, ಇದರ ಜತೆಗೆ ಆರೋಗ್ಯ, ಕ್ರೀಡೆಗೂ ಒತ್ತು ನೀಡಿರುವುದು ಸ್ವಾಗತಾರ್ಹ. ಕ್ರೀಡೆಗಳು ಸಂಬಂಧ ಬೆಳೆಸುತ್ತವೆ. ಹಾಗಾಗಿ ಸರ್ಕಾರಗಳು ಕ್ರೀಡೆಗೆ ಸಂಬಂಧಪಟ್ಟ ಇಲಾಖೆಗಳಿಗೆ ಸೂಚಿಸಿ ಕ್ರೀಡಾಪಟುಗಳಿಗೆ ಅನುದಾನದ ಜತೆಗೆ ಪ್ರೋತ್ಸಾಹ ನೀಡಬೇಕು. ಸ್ವಾಮೀಜಿ ಅವರೂ ಒತ್ತಡ ಹಾಕಬೇಕೆಂದರು.

ಸರಸ್ವತಿ, ಭಾರ್ಗವಿ, ನೇಹಾ, ರೇವತಿ ಸೇರಿದಂತೆ ವಿವಿಧ ಆಟಗಳಲ್ಲಿ ಸಾಧನೆ ಮಾಡಿರುವ ಆಟಗಾರ್ತಿಯರು ತಂದ ಕ್ರೀಡಾಜ್ಯೋತಿಯನ್ನು ಅಂತಾರಾಷ್ಟ್ರೀಯ ಕ್ರೀಡಾಪಟುಗಳಾದ ಪೂನಂ ಬೆಳ್ಳಿಯಪ್ಪ, ಹರ್ಷಿತ್, ಇಂಚರಾ ಸ್ವೀಕರಿಸಿದರು. ನಂತರ ಕ್ರೀಡಾ ಪ್ರತಿಜ್ಞೆ ಬೋಧಿಸಲಾಯಿತು. ಶಾಸಕ ಸ್ವರೂಪ್ ಪ್ರಕಾಶ್, ಬಾಲಕೃಷ್ಣ ಹಾಗೂ ಹತ್ತಾರು ತಂಡಗಳಿಂದ ಗೌರವ ವಂದನೆ ಸ್ವೀಕರಿಸಿದರು. ಈ ಸಂದರ್ಭದಲ್ಲಿ ಬಿಜಿಎಸ್ ಕ್ರೀಡಾ ಸಂಭ್ರಮ ಪುಸ್ತಕ ಬಿಡುಗಡೆ ಮಾಡಲಾಯಿತು.

ಚಿಕ್ಕಬಳ್ಳಾಪುರ-ಕೋಲಾರ ಶಾಖಾ ಮಠದ ಶ್ರೀ ಮಂಗಳನಾಥ ಸ್ವಾಮೀಜಿ, ಮೈಸೂರಿನ ಶ್ರೀ ಸೋಮನಾಥ ಸ್ವಾಮೀಜಿ, ತಿಪಟೂರು ದಸರೀಘಟ್ಟದ ಶ್ರೀ ಚಂದ್ರಶೇಖರನಾಥ ಸ್ವಾಮೀಜಿ, ಬೆಂಗಳೂರು ವಿಜಯನಗರದ ಶ್ರೀ ಸೌಮ್ಯನಾಥ ಸ್ವಾಮೀಜಿ, ಶೃಂಗೇರಿ ಮಠದ ಶ್ರೀಗುಣನಾಥ ಸ್ವಾಮೀಜಿ, ರಾಮನಗರದ ಅನ್ನದಾನೇಶ್ವರ ಸ್ವಾಮೀಜಿ, ಉತ್ತರ ಕನ್ನಡದ ಶ್ರೀ ನಿಶ್ಚಲಾನಂದನಾಥ ಸ್ವಾಮೀಜಿ, ಆದಿಚುಂಚನಗಿರಿ ಶಿಕ್ಷಣ ಟ್ರಸ್ಟ್‌ನ ಪ್ರಧಾನ ಕಾರ್ಯದರ್ಶಿ ಶ್ರೀ ಪುರುಷೋತ್ತಮಾನಂದನಾಥ ಸ್ವಾಮೀಜಿ, ಬಿ.ಜಿ.ನಗರದ ಶ್ರೀ ಸತ್ಯಕೀರ್ತಿನಾಥ ಸ್ವಾಮೀಜಿ, ಹಾಸನದ ಶ್ರೀ ಶಂಭುನಾಥ ಸ್ವಾಮೀಜಿ, ಕಬ್ಬಳಿ ಮಠದ ಶ್ರೀ ಶಿವಪುತ್ರನಾಥ ಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು.

ಮಠದ ಟ್ರಸ್ಟಿ ದೇವರಾಜು, ಜಿಲ್ಲಾ ಒಕ್ಕಲಿಗರ ಸಂಘದ ಅಧ್ಯಕ್ಷ ಮುದ್ದೇಗೌಡ, ಜಿಲ್ಲಾ ಕಸಾಪ ಅಧ್ಯಕ್ಷ ಡಾ.ಎಚ್.ಎಲ್. ಮಲ್ಲೇಶಗೌಡ, ಸೋಮಶೇಖರ್, ಬೇಲೂರು ನಾಗರಾಜ್, ಸೋಮವಾರಪೇಟೆ ಒಕ್ಕಲಿಗರ ಸಂಘದ ಅಧ್ಯಕ್ಷ ಎ.ಆರ್. ಮುತ್ತಣ್ಣ, ಗೋಪಾಲಯ್ಯ, ಭರತ್ ಕುಮಾರ್, ಆನಂದ್, ಎಸ್.ಎಸ್. ರಘುಗೌಡ, ಅನಂತ್‌ಕುಮಾರ್, ಜಿ.ಡಿ.ನಾರಾಯಣ, ಎಚ್.ಎಸ್. ಅನಿಲ್‌ಕುಮಾರ್ ಇತರರಿದ್ದರು.

ಇದಕ್ಕೂ ಮುನ್ನ ಸ್ವಾಗತ ಕೋರಿ ಪ್ರಾಸ್ತಾವಿಕವಾಗಿ ಮಾತನಾಡಿದ ಶ್ರೀ ಶಂಭುನಾಥ ಸ್ವಾಮೀಜಿ, ಶ್ರೀಕ್ಷೇತ್ರವು ಶೈಕ್ಷಣಿಕ, ಸಾಂಸ್ಕೃತಿಕ, ಸಂಗೀತ, ಆಧ್ಯಾತ್ಮಿಕ ಉತ್ತೇಜನ ಜತೆಗೆ ಪ್ರತಿ ವರ್ಷ ಕ್ರೀಡಾಕೂಟ ಆಯೋಜನೆ ಮೂಲಕ ಕ್ರೀಡೆಗೂ ಉತ್ತೇಜನ ನೀಡುತ್ತಿದೆ. ಓದಿನ ಜತೆಗೆ ಎಲ್ಲ ಮಕ್ಕಳು ಕ್ರೀಡೆಯಲ್ಲೂ ಸಾಧನೆ ಮಾಡಬೇಕು ಎಂಬುದು ಶ್ರೀ ಮಠದ ಉದ್ದೇಶ. ಅದಕ್ಕೆ ಪೂರಕವಾಗಿ ನಮ್ಮ ಸಂಸ್ಥೆಗಳ ಮಕ್ಕಳು ದೇಶ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಉತ್ತಮ ಸಾಧನೆ ಮಾಡುತ್ತಿದ್ದು, ಈ ಮೂಲಕ ನಮ್ಮ ಸ್ವಾಮೀಜಿ ಅವರು ಕಂಡ ಕನಸು ನನಸಾಗಿದೆ ಎಂದರು.