ಅಕ್ರಮ ಗಣಿಗಾರಿಕೆ ವಿರುದ್ಧ ಪ್ರತಿಭಟನೆ

ರಂಗೇನಹಳ್ಳಿ ಏತನೀರಾವರಿ ಯೋಜನೆ ಇದೇ ಜಾಗದಲ್ಲಿ ನಿರ್ಮಾಣವಾಗಬೇಕೆಂದು ಸರ್ಕಾರ ಹಾಗೂ ಆಗಿನ ಶಾಸಕ ಎ.ಮಂಜು ಭೂಮಿ ಪೂಜೆ ನಡೆಸಿದ್ದರು. ಈ ಯೋಜನೆಯಿಂದ 60 ರಿಂದ 70 ಕೆರೆಗಳಿಗೆ ನೀರು ತುಂಬಿಸುವ ಉದ್ದೇಶವಿದ್ದು, ಈ ವಿಷಯ ತಿಳಿದಿದ್ದರೂ ಗಣಿಗಾರಿಕೆಗೆ ಅನುಮತಿ ನೀಡಿರುವುದು ಎಷ್ಟು ಸರಿ ಎಂದು ಪ್ರಶ್ನಿಸಿದರು.

60-70 ವರ್ಷಗಳಿಂದ ಸಾಗುವಳಿ ಮಾಡುತ್ತಿದ್ದ ಬಡ ರೈತರಿಗೆ ಸರ್ಕಾರದ ಆದೇಶ ಇದ್ದರೂ ಜಮೀನು ಮಂಜೂರು ಮಾಡದೆ, ಅದೇ ಸರ್ಕಾರಿ ಜಾಗವನ್ನು ಮತ್ತೆ ಕ್ರಷರ್ ಮತ್ತು ಗಣಿಗಾರಿಕೆಗಾಗಿ ಮಂಜೂರು ಮಾಡಲಾಗಿದೆ. ಇದೇ ಗಣಿಮಾಲೀಕರಿಗೆ ಸರ್ವೆ ನಂ.17ರಲ್ಲಿ 3 ಎಕರೆ, ಸರ್ವೆ ನಂ. 2ರಲ್ಲಿ 5 ಎಕರೆ ಹಾಗೂ ಸರ್ವೆ ನಂ. 102ರಲ್ಲಿ 4 ಎಕರೆ ಜಮೀನು ದುರಸ್ತಿ ಮಾಡಿಕೊಡಲಾಗಿದೆ ಎಂದು ಗ್ರಾಮಸ್ಥರು ತಿಳಿಸಿದರು.

ಗಣಿಗಾರಿಕೆಯಿಂದ ಉಂಟಾಗುವ ಧೂಳು ಮತ್ತು ವಿಷಪೂರಿತ ನೀರಿನಿಂದ ಜಾನುವಾರುಗಳು ರೋಗಬಾಧಿತವಾಗಿ ಸಾವನ್ನಪ್ಪುತ್ತಿವೆ. ಪರಿಹಾರ ಕೇಳಲು ಹೋದ ರೈತರ ಮೇಲೆ ದೌರ್ಜನ್ಯ, ಅವಾಚ್ಯ ಶಬ್ದಗಳಿಂದ ನಿಂದನೆ, ಸುಳ್ಳು ಪ್ರಕರಣಗಳು, ಅಟ್ರಾಸಿಟಿ ಕೇಸುಗಳು ಹಾಗೂ ಕೊಲೆ ಬೆದರಿಕೆ ಹಾಕಲಾಗುತ್ತಿದೆ ಎಂದು ಆರೋಪಿಸಿದರು.

ಸಿ. ಹಿಂದಲಹಳ್ಳಿ, ತಾತನಹಳ್ಳಿ, ದೊಡ್ಡಕಾಡನೂರು ಸೇರಿದಂತೆ ಸುತ್ತಮುತ್ತಲಿನ ಗ್ರಾಮಗಳ ಜಂಟಿ ಸರ್ವೆ ನಡೆಸಬೇಕು. ತಪ್ಪು ಮಾಡಿದ ಅಧಿಕಾರಿಗಳಿಗೆ ಶಿಕ್ಷೆ ನೀಡಬೇಕು. ಗಣಿಗಾರಿಕೆ ಪರವಾನಗಿಗಳನ್ನು ರದ್ದುಪಡಿಸಿ, ರೈತರ ಆಸ್ತಿ ಹಾಗೂ ಜೀವನವನ್ನು ರಕ್ಷಿಸಬೇಕೆಂದು ಗ್ರಾಮಸ್ಥರು ಮನವಿ ಮಾಡಿದರು.

ಗ್ರಾಮಸ್ಥರಾದ ಬಾಗೇಗೌಡ, ವೀರಭದ್ರೇಗೌಡ, ನಿಂಗರಾಜು, ದೊಡ್ಡೇಗೌಡ, ರವಿಕುಮಾರ್ ಇತರರು ಇದ್ದರು.