ಹಾಸನದಲ್ಲಿ ನೂತನ ಶೀತಲ ಘಟಕ

ಜಿಲ್ಲೆಯ ರೈತರ ಅನುಕೂಲಕ್ಕಾಗಿ ಹಾಸನ ಜಿಲ್ಲಾ ತೋಟಗಾರಿಕೆ ಇಲಾಖೆಯಿಂದ ನಗರದ ಎಪಿಎಂಸಿ ಆವರಣದ ಪಕ್ಕದಲ್ಲಿರುವ ತೋಟಗಾರಿಕೆ ಕ್ಷೇತ್ರದಲ್ಲಿ 10 ಕೋಟಿ ರೂ. ವೆಚ್ಚದಲ್ಲಿ 2 ಸಾವಿರ ಮೆಟ್ರಿಕ್ ಟನ್ ಸಾಮರ್ಥ್ಯದ ಶೀತಲ ಘಟಕ (ಕೋಲ್ಡ್ ಸ್ಟೋರೇಜ್) ನಿರ್ಮಾಣ ಮಾಡಲಾಗುತ್ತಿದೆ.

ಹಾಸನ ಜಿಲ್ಲೆ ರಾಜ್ಯದ ಕೃಷಿ ಪ್ರಧಾನ ಜಿಲ್ಲೆಗಳಲ್ಲಿ ಒಂದಾಗಿದ್ದು, 4 ಕೃಷಿ ವಲಯಗಳನ್ನೊಳಗೊಂಡಿದೆ. ಜಿಲ್ಲೆಯು 6,66,602 ಹೆ. ಭೌಗೋಳಿಕ ವಿಸ್ತೀರ್ಣ ಹೊಂದಿದ್ದು, ಶೇ.70 ರಷ್ಟು ಜನರು ಕೃಷಿಯಲ್ಲಿ ತೊಡಗಿಕೊಂಡಿದ್ದಾರೆ. ಒಟ್ಟು 4,16,402 ಹೆಕ್ಟೇರ್ ಸಾಗುವಳಿ ಪ್ರದೇಶದಲ್ಲಿ 1,80,976 ಹೆಕ್ಟೇರ್ ವಿಸ್ತೀರ್ಣವು ತೋಟಗಾರಿಕೆ ಬೆಳೆಗಳಿಂದ ಆವರಿಸಿದೆ. ಹಾಸನವು ರಾಜ್ಯದಲ್ಲಿ 2ನೇ ತೆಂಗು ಬೆಳೆಯುವ ಜಿಲ್ಲೆಯಾಗಿದ್ದು, ಆಲೂಗಡ್ಡೆ, ಟೊಮ್ಯಾಟೊ, ಬಾಳೆ, ಕಾಫಿ, ಅಡಕೆ, ಕಾಳುಮೆಣಸು ಮತ್ತು ಸಾಂಬಾರು ಬೆಳೆಗಳನ್ನು ಇಲ್ಲಿ ಪ್ರಮುಖವಾಗಿ ಬೆಳೆಯಲಾಗುತ್ತಿದೆ.

ಆಲೂಗಡ್ಡೆ ಬೆಳೆಯು ಜಿಲ್ಲೆಯ ಪ್ರಮುಖ ವಾಣಿಜ್ಯ ತರಕಾರಿ ಬೆಳೆಯಾಗಿದ್ದು, ಕಳೆದ 20 ವರ್ಷಗಳಿಂದ 35,000-40000 ಹೆಕ್ಟೇರ್ ಪ್ರದೇಶದಲ್ಲಿ ಬೆಳೆಯಲಾಗುತ್ತಿತ್ತು. ಕಾಲಕ್ರಮೇಣ ಹವಮಾನ ವೈಪರೀತ್ಯ, ರೋಗ, ಕೀಟಬಾಧೆ, ಮಾರುಕಟ್ಟೆ ಬೆಲೆ ಏರಿಳಿತ ಮತ್ತಿತರ ಕಾರಣಗಳಿಂದ ಪ್ರಸ್ತುತ 4000-5000 ಹೆಕ್ಟೇರ್ ಪ್ರದೇಶಕ್ಕೆ ಬೆಳೆ ಸೀಮಿತವಾಗಿದೆ.

ಆಲೂಗಡ್ಡೆಯು ಹಸಿ ತರಕಾರಿಯಾಗಿದ್ದು, ದೀರ್ಘಕಾಲದವರೆಗೆ ಶೇಖರಿಸಲು ಕಷ್ಟಸಾಧ್ಯ. ಅದರಂತೆ ಆಲೂಗಡ್ಡೆ ಕೊಳೆಯುವಿಕೆ ಹಾಗೂ ಮೊಳಕೆ ಬಾರದಂತೆ ತಡೆಯಲು ಶೈತ್ಯಾಗಾರದಲ್ಲಿ ಇಡುವುದು ಉತ್ತಮ ಪರಿಹಾರವಾಗಿದೆ. ಶೈತ್ಯಾಗಾರದಿಂದ ಉತ್ಪನ್ನಗಳ ಗುಣಮಟ್ಟನ್ನು ರಕ್ಷಿಸುವುದರ ಜತೆಗೆ ಮಾರುಕಟ್ಟೆ ಬೆಲೆ ನಿಯಂತ್ರಣ ಸಾಧ್ಯವಿದ್ದು, ರೈತರಿಗೆ ಬೆಲೆ ಹೆಚ್ಚಾದಾಗ ಮಾರುವ ಅವಕಾಶವಿದೆ.

1969 ರಲ್ಲಿ ಅಂದಿನ ತೋಟಗಾರಿಕೆ ನಿರ್ದೇಶಕರಾದ ಎಂ.ಎಚ್.ಮರೀಗೌಡ ಅವರು ಹಾಸನ ನಗರದ ಎ.ಪಿ.ಎಂ.ಸಿ ಆವರಣದಲ್ಲಿ 120 ಮೆಟ್ರಿಕ್ ಟನ್ ಸಾಮರ್ಥ್ಯದ ಶೀತಲ ಘಟಕವನ್ನು ಸ್ಥಾಪಿಸಿದ್ದರು. ಪ್ರಸ್ತುತ ಘಟಕವು ಹಳೆಯದಾಗಿದ್ದು ನಿರ್ವಹಣೆ ಕಷ್ಟ ಸಾಧ್ಯವಾಗಿದೆ. ಜಿಲ್ಲೆಯಲ್ಲಿ ಪ್ರಸ್ತುತ 8 ಖಾಸಗಿ ಶೀತಲ ಘಟಕಗಳಿದ್ದು, ಆಲೂಗಡ್ಡೆ, ಶುಂಠಿ, ಮೆಣಸು, ಸೇಬು, ಮೀಟ್ ಹಾಗೂ ಡೇರಿ ಉತ್ತನ್ನಗಳನ್ನು ಶೇಖರಿಸಲಾಗುತ್ತಿದೆ.

1969 ರಲ್ಲಿ ಎ.ಪಿ.ಎಂ.ಸಿ ಆವರಣದಲ್ಲಿ ನಿರ್ಮಿಸಿದ್ದ ಶೀಥಲಗೃಹ ಘಟಕ ಹಳೆಯದಾದ ಹಿನ್ನೆಲೆ ತೋಟಗಾರಿಕೆ ಇಲಾಖೆಯಿಂದ ್ಕಐಈಊ ಖ್ಕಅಘೆಇಏಅಉ29 ಯೋಜನೆಯಡಿ ಹಾಸನ ನಗರದ ಎ.ಪಿ.ಎಂ.ಸಿ ಆವರಣದಲ್ಲಿರುವ ತೋಟಗಾರಿಕೆ ಕ್ಷೇತ್ರದಲ್ಲಿ ನೂತನವಾಗಿ ಶೈತ್ಯಾಗಾರವನ್ನು ನಿರ್ಮಿಸಲಾಗುತ್ತಿದೆ.

1969ರಿಂದ ಹಾಸನದಲ್ಲಿ ಆಲು ಬೀಜ ಉತ್ಪಾದನೆಗಾಗಿ ಶೀತಲಗೃಹ ನಿರ್ಮಿಸಲಾಗಿತ್ತು. ಇದು ಹಳೆಯದಾದ ಹಿನ್ನೆಲೆಯಲ್ಲಿ 2022-23ರಲ್ಲಿ ನಬಾರ್ಡ್ ಆರ್‌ಡಿಎಫ್ ಯೋಜನೆ ಅಡಿಯಲ್ಲಿ ನೂತನ ಶೀತಲಗೃಹ ನಿರ್ಮಾಣಕ್ಕೆ ಮನವಿ ಸಲ್ಲಿಸಲಾಗಿತ್ತು. ಇದೀಗ ಅದು ಅನುಮೋದನೆಗೊಂಡು ಕಳೆದ ವರ್ಷದಿಂದ ಕಾಮಗಾರಿ ಆರಂಭವಾಗಿದೆ. ಈ ವರ್ಷದಲ್ಲೇ ಕಾಮಗಾರಿ ಪೂರ್ಣಗೊಳಿಸಿ ಸಾರ್ವಜನಿಕರ ಉಪಯೋಗಕ್ಕೆ ಕಲ್ಪಿಸಲಾಗುತ್ತದೆ. ಇದರಿಂದ ಜಿಲ್ಲೆಯ ಲಕ್ಷಾಂತರ ರೈತರಿಗೆ ಅನುಕೂಲವಾಗಲಿದೆ.