ಪ್ರಯಾಣಿಕರಿಗೆ ಅಗತ್ಯ ಬಸ್ ಸೌಕರ್ಯ

ಜೆಡಿಎಸ್ ಮುಖಂಡರು ಹಾಗೂ ನಾಗರಿಕರ ಹೋರಾಟದ ಮುನ್ಸೂಚನೆ ದೊರೆತ ಹಿನ್ನೆಲೆಯಲ್ಲಿ ಡಿಪೋ ಹತ್ತಿರದ ನಿಲ್ದಾಣಕ್ಕೆ ಗುರುವಾರ ನಿಗಮದ ಅಧಿಕಾರಿಗಳ ಜತೆ ಭೇಟಿ ನೀಡಿ ಪರಿಶೀಲಿಸಿದ ಬಳಿಕ ಮಾತನಾಡಿದರು.

ಸಂಚಾರ ಹಾಗೂ ಜನದಟ್ಟಣೆಗೆ ಅನುಗುಣವಾಗಿ ಶೌಚಗೃಹ, ಕುಡಿಯುವ ನೀರು, ನೆರಳಿನ ವ್ಯವಸ್ಥೆ ಜತೆಗೆ ಸೌಕರ್ಯಗಳ ಕೊರತೆ ಸರಿಪಡಿಸಲು ಯೋಜನೆ ರೂಪಿಸಲಾಗುವುದು. ಹೆಚ್ಚುವರಿ ಶೆಲ್ಟರ್, ಮಹಿಳೆಯರು ಮತ್ತು ಮಕ್ಕಳ ಸುರಕ್ಷತೆ ಕುರಿತು ಆದ್ಯತೆ ನೀಡಬೇಕು ಎಂದು ಕೆಎಸ್‌ಆರ್‌ಟಿಸಿ ಅಧಿಕಾರಿಗಳಿಗೆ ಸೂಚಿಸಿದರು.

ಅಭಿವೃದ್ಧಿ ಕೆಲಸಗಳ ಅನುಷ್ಠಾನದ ವೇಳೆ ತೊಂದರೆ ಎದುರಾಗುವುದು ಸಹಜ. ಇದನ್ನೇ ಮುಂದಿಟ್ಟುಕೊಂಡು ಶಾಸಕ ಕೆ.ಎಂ.ಶಿವಲಿಂಗೇಗೌಡ ವಿರುದ್ಧ ಧಿಕ್ಕಾರ ಕೂಗಿದ್ದು ಸರಿಯಲ್ಲ. ಸವಲತ್ತುಗಳನ್ನು ಕಲ್ಪಿಸುವ ವಿಷಯದಲ್ಲಿ ವಿರೋಧ ಪಕ್ಷಗಳ ಮುಖಂಡರು ಸಲಹೆ, ಸೂಚನೆ ನೀಡಿದರೆ ಸ್ವೀಕರಿಸಲು ಸಿದ್ಧರಿದ್ದೇವೆ. ರಾಜಕೀಯ ಮಾಡುವ ಸನ್ನಿವೇಶವೇ ಬೇರೆ ಎಂಬುದನ್ನು ಅರ್ಥ ಮಾಡಿಕೊಂಡು ಜನಪರವಾದ ಕೆಲಸಗಳ ಅನುಷ್ಠಾನಕ್ಕೆ ಸಹಕಾರ ನೀಡಲಿ ಎಂದರು.

ಸದಸ್ಯ ಜಾಜೂರು ಸಿದ್ದೇಶ್ ಮಾತನಾಡಿ, ಬೆಂಗಳೂರು, ಹಾಸನ, ಚಿಕ್ಕಮಗಳೂರು, ಶಿವಮೊಗ್ಗ ಒಳಗೊಂಡಂತೆ ವಿವಿಧೆಡೆಗಳಿಂದ ಬರುವ ಪ್ರಯಾಣಿಕರಿಗೆ ರೈಲ್ವೆ ನಿಲ್ದಾಣಕ್ಕೆ ಹೋಗುವುದು ಸವಾಲಿನ ಕೆಲಸವಾಗಿದೆ. ಬಸ್ ಕಂಡಕ್ಟರ್‌ಗಳು ಹಳೆಯ ಬಸ್ ನಿಲ್ದಾಣ ಸಮೀಪಿಸಿದಾಗ ಮಾಹಿತಿ ನೀಡಿದರೆ ಹೆಚ್ಚು ಅನುಕೂಲವಾಗಲಿದೆ. ನಗರದ ವಾಣಿಜ್ಯ ಸಂಕೀರ್ಣದ ಬಳಿ ಸಿಬ್ಬಂದಿ ನಿಯೋಜಿಸಿ ಕಿರಿಕಿರಿ ಎದುರಾಗದಂತೆ ನೋಡಿಕೊಳ್ಳಬೇಕು ಎಂದು ಹೇಳಿದರು.

ಡಿಪೋ ಮ್ಯಾನೇಜರ್ ಕೃಷ್ಣಪ್ಪ ಮಾತನಾಡಿ, ಧೂಳು ತಡೆಯಲು ಪ್ರತಿನಿತ್ಯ ಟ್ಯಾಂಕರ್ ಮೂಲಕ ನೀರು ಹಾಕಲಾಗುತ್ತಿದೆ. ಮಹಿಳೆಯರು, ಬಾಣಂತಿಯರಿಗೆ ಮತ್ತು ಹಸುಗೂಸುಗಳ ಅನುಕೂಲಕ್ಕಾಗಿ ಪ್ರತ್ಯೇಕ ಶೆಲ್ಟರ್ ಅಳವಡಿಕೆ ಮಾಡಲಾಗುವುದು. ಗ್ರಾಮೀಣ ಭಾಗದ ಜನರ ಸಂಚಾರಕ್ಕೆ ತೊಂದರೆ ಎದುರಾಗದಂತೆ ನೋಡಿಕೊಳ್ಳಲಾಗುತ್ತಿದೆ ಎಂದು ಮಾಹಿತಿ ನೀಡಿದರು.

ಚಿಕ್ಕಮಗಳೂರು ವಿಭಾಗದ ಅರವಿಂದ್, ಗ್ಯಾರಂಟಿ ಅನುಷ್ಠಾನ ಸಮಿತಿ ಸದಸ್ಯ ಪ್ರದೀಪ್, ಸಂಚಾರ ನಿಯಂತ್ರಕ ವಿರೂಪಾಕ್ಷಯ್ಯ ಇತರರು ಹಾಜರಿದ್ದರು.