ಮಲ್ಲಪ್ಪನಹಳ್ಳಿ ಗ್ರಾಮದ ಸೇತುವೆ ಅವ್ಯವಸ್ಥೆ

ಹಲವು ವರ್ಷಗಳ ಹಿಂದೆ ನಿರ್ಮಾಣ ಮಾಡಿರುವ ಈ ಸೇತುವೆಯ ಕಾಂಕ್ರಿಟ್ ಕಿತ್ತು ಹೋಗಿ ಕಬ್ಬಿಣದ ಸಲಾಕೆಗಳು ಮುರಿದು ಹೋಗಿದೆ.

ಮಲ್ಲಪ್ಪನಹಳ್ಳಿ ಕೆರೆ ಕೋಡಿಯ ಹಳ್ಳಕ್ಕೆ ಅಡ್ಡಲಾಗಿ ಸುಮಾರು ಹತ್ತು ಅಡಿ ಎತ್ತರವಿರುವ ಸೇತುವೆ ನಿರ್ಮಿಸಲಾಗಿದೆ. ಈ ಸೇತುವೆ ಮೇಲೆ ನಿತ್ಯ ನೂರಾರು ಸಾರ್ವಜನಿಕರು, ಎತ್ತಿನ ಗಾಡಿ, ಆಟೋ, ಕಾರು, ಬೈಕು, ಟ್ಯ್ರಾಕ್ಟರ್ ಜತೆಗೆ ಸಾಮಗ್ರಿಗಳನ್ನು ಹೊತ್ತು ಸಾಗುವ ದೊಡ್ಡ ಲಾರಿಗಳು ಸಂಚರಿಸುತ್ತವೆ. ಶಿಥಿಲವಾಗಿರುವ ಸೇತುವೆ ಯಾವುದೇ ಕ್ಷಣದಲ್ಲಾದರೂ ಕುಸಿದು ಬೀಳುವ ಹಂತಕ್ಕೆ ತಲುಪಿದೆ.

ಮಲ್ಲಪ್ಪನಹಳ್ಳಿ ಗ್ರಾಮದಲ್ಲಿ ಗ್ರಾಮ ಪಂಚಾಯಿತಿ ಕಾರ್ಯಾಲಯ ಇರುವುದರಿಂದ ಇದರ ವ್ಯಾಪ್ತಿಗೆ ಒಳಪಡುವ ಅಂಕನಹಳ್ಳಿ, ಆಲದಹಳ್ಳಿ, ಗುಳ್ಳದಪುರ ಇತರ ಗ್ರಾಮಗಳ ನಾಗರಿಕರು ನಿತ್ಯ ಕಚೇರಿಯ ಕೆಲಸ ಕಾರ್ಯಗಳಿಗೆ ಇದೇ ಮಾರ್ಗದಲ್ಲಿ ಸಂಚರಿಸುತ್ತಾರೆ. ಸಂಚಾರದ ಸಂದರ್ಭದಲ್ಲಿ ಹಾಳಾಗಿರುವ ಸೇತುವೆ ಕುಸಿದು ಬಿದ್ದು ಅನಾಹುತ ಸಂಭವಿಸುವ ಮೊದಲು ಸಂಬಂಧ ಪಟ್ಟ ಇಲಾಖೆಯವರು ಎಚ್ಚರವಹಿಸುವ ಅಗತ್ಯವಿದೆ.

ಸೇತುವೆಯ ಮೇಲೆ ಕಾಂಕ್ರಿಟ್ ಸಂಪೂರ್ಣ ಹಾಳಾಗಿದೆ. ಪರಿಣಾಮ ಸೇತುವೆ ಮೇಲೆ ಸಂಚರಿಸುವ ವಾಹನಗಳಿಗೆ ಕಬ್ಬಿಣದ ರಾಡ್‌ಗಳಿಂದ ಅನಾಹುತಗಳು ಸಂಭವಿಸುತ್ತಿವೆ. ಸೇತುವೆ ಗಟ್ಟಿಯಾಗಿರಲು ಆಧಾರವಾಗಿರುವುದೇ ಕಬ್ಬಿಣ. ಇವುಗಳೇ ಹಾಳಾದರೆ ಸೇತುವೆಯ ಗುಣಮಟ್ಟ ಕುಸಿಯುತ್ತದೆ. ಕುಸಿದು ಬಿದ್ದು ಅಪಘಾತವಾಗುವ ಮೊದಲು ಸಂಬಂಧಪಟ್ಟ ಇಲಾಖೆಯವರು ತುರ್ತಾಗಿ ನೂತನ ಸೇತುವೆಯ ನಿರ್ಮಾಣಕ್ಕೆ ಕ್ರಮ ಕೈಗೊಳ್ಳಬೇಕೆಂದು ಸುತ್ತಮುತ್ತಲ ಹಾಗೂ ಮಲ್ಲಪ್ಪನಹಳ್ಳಿ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.

ಶಿಥಿಲವಾಗಿರುವ ಸೇತುವೆಯ ಮರು ನಿರ್ಮಾಣಕ್ಕೆ ಲೋಕೋಪಯೋಗಿ ಇಲಾಖೆ ಹಾಗೂ ನೀರಾವರಿ ಇಲಾಖೆ ಮತ್ತು ಜನಪ್ರತಿನಿಧಿಗಳಿಗೆ ಹಲವು ಬಾರಿ ಮಲ್ಲಪ್ಪನಹಳ್ಳಿ ಗ್ರಾಮಸ್ಥರು ಮನವಿ ಮಾಡಿದ್ದೇವೆ. ಆದರೂ ಸೇತುವೆ ನಿರ್ಮಾಣದ ಕೆಲಸ ಪ್ರಗತಿಯಾಗಿಲ್ಲ. ಅನಾಹುತ ಆದಾಗ ಕ್ರಮ ಕೈಗೊಳ್ಳುತ್ತಾರೆ ಎಂದೆನಿಸುತ್ತಿದೆ. ಸಾರ್ವಜನಿಕ ಕೆಲಸದ ನಿಮಿತ್ತ ನಮ್ಮ ಮನವಿಗೆ ಸ್ಪಂದಿಸದೇ ಇರುವುದು ನಮಗೆ ಬೇಸರ ತಂದಿದೆ ಎಂದು ಸಾರ್ವಜನಿಕರು ದೂರಿದ್ದಾರೆ.