11ನೇ ಸ್ಥಾನಕ್ಕೆ ಕುಸಿದ ಹಾಸನ ಜಿಲ್ಲೆ

ಜಿಲ್ಲೆಯಲ್ಲಿ 14,577 ವಿದ್ಯಾರ್ಥಿಗಳು ಪರೀಕ್ಷೆ ತೆಗೆದುಕೊಂಡಿದ್ದು, 13,077 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಈ ಪೈಕಿ 8,908 ಬಾಲಕಿಯರು ಪರೀಕ್ಷೆ ತೆಗೆದುಕೊಂಡಿದ್ದು 7,917 ಜನ ಉತ್ತೀರ್ಣರಾಗಿದ್ದಾರೆ. 6,651 ಬಾಲಕರು ಪರೀಕ್ಷೆ ತೆಗೆದುಕೊಂಡಿದ್ದು, 5,496 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ.

ಕಲಾ ವಿಭಾಗದ 2,500 ವಿದ್ಯಾರ್ಥಿಗಳು ಪರೀಕ್ಷೆ ತೆಗೆದುಕೊಂಡಿದ್ದು, 1,967 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ವಾಣಿಜ್ಯ ವಿಭಾಗದ 5,249 ವಿದ್ಯಾರ್ಥಿಗಳು ಪರೀಕ್ಷೆ ತೆಗೆದುಕೊಂಡಿದ್ದು 4,685 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ವಿಜ್ಞಾನ ವಿಭಾಗದ 6,828 ವಿದ್ಯಾರ್ಥಿಗಳು ಪರೀಕ್ಷೆ ತೆಗೆದುಕೊಂಡಿದ್ದು, 6,425 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಹಾಸನ ನಗರದ ಎಪಿಜೆ ಕಾಲೇಜಿನ ಎಚ್.ಜಿ.ಅರ್ಪಿತಾ ರಾಜ್ಯದಲ್ಲಿ ರ‌್ಯಾಂಕ್ ಪಡೆಯುವುದರೊಂದಿಗೆ ಜಿಲ್ಲೆಗೆ ಪ್ರಥಮ ಪಡೆದಿದ್ದಾಳೆ.

ಹಾಸನ ನಗರದ ಎಪಿಜೆ ಕಾಲೇಜಿನ ವಿದ್ಯಾರ್ಥಿನಿ ಎಚ್.ಜಿ.ಅರ್ಪಿತಾ 600 ರಲ್ಲಿ 597(ಶೇ.99.5) ಅಂಕಗಳಿಸುವ ಮೂಲಕ ರಾಜ್ಯಕ್ಕೆ 3ನೇ ಸ್ಥಾನ ಹಾಗೂ ಜಿಲ್ಲೆಗೆ ಪ್ರಥಮ ಸ್ಥಾನ ಪಡೆದಿದ್ದಾಳೆ. ಫಲಿತಾಂಶ ಸಾಧಿಸುವ ಮೂಲಕ ರಾಜ್ಯ ಮಟ್ಟದಲ್ಲಿ ರ‌್ಯಾಂಕ್ ಪಡೆದಿದ್ದಾಳೆ. ಅರ್ಪಿತಾ ಸಂಸ್ಕೃತ, ರಸಾಯನಶಾಸ್ತ್ರ, ಗಣಿತ ಮತ್ತು ಜೀವಶಾಸ್ತ್ರ ವಿಷಯಗಳಲ್ಲಿ ನೂರಕ್ಕೆ ನೂರು ಅಂಕಗಳನ್ನು ಪಡೆದಿದ್ದಾಳೆ. ಭೌತಶಾಸ್ತ್ರ 99, ಇಂಗ್ಲಿಷ್ 98 ಅಂಕ ಗಳಿಸಿದ್ದಾಳೆ. ತಂದೆ ಎಚ್.ಆರ್.ಗೋಪಾಲಸ್ವಾಮಿ ಹಾಸನದ ಡಿಪ್ಲೊಮಾ ಕಾಲೇಜಿನ ಎಫ್‌ಡಿಸಿ ಆಗಿದ್ದಾರೆ. ತಾಯಿ ಮೀನಾಕ್ಷಿ ಗೃಹಿಣಿಯಾಗಿದ್ದಾರೆ. ಅರ್ಪಿತಾ ವೈದ್ಯಕೀಯ ಶಿಕ್ಷಣ ಪಡೆಯುವ ಆಸಕ್ತಿಹೊಂದಿದ್ದಾರೆ.

ಅಂದು ಪಾಠ ಮಾಡಿದ್ದನ್ನು ಅಂದೇ ಓದಿ ಮುಗಿಸುತ್ತಿದ್ದೆ. ಓದು ಮುಗಿದ ಮೇಲೆಯೇ ಮಲಗುತ್ತಿದ್ದೆ. ಪಾಲಕರು ಹಾಗೂ ಶಿಕ್ಷಕರ ಮಾರ್ಗದರ್ಶನದಿಂದ ಉತ್ತಮ ಅಂಕಗಳಿಸಲು ಸಹಕಾರಿಯಾಯಿತು. ಪೂರ್ವ ಪರೀಕ್ಷೆಗಳು ಹಾಗೂ ನಿರಂತರ ಅಧ್ಯಯನದಿಂದ ಇದು ಸಾಧ್ಯವಾಗಿದೆ.