‘ಗ್ಯಾರಂಟಿ’ ಜನರಿಂದ ಮಾಹಿತಿ ಸಂಗ್ರಹ

ಪಟ್ಟಣದ ತಾಲೂಕು ಪಂಚಾಯಿತಿ ಸಭಾಂಗಣದಲ್ಲಿ ಶುಕ್ರವಾರ ಕರೆಯಲಾಗಿದ್ದ ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ಗ್ಯಾರಂಟಿ ಯೋಜನೆಗಳು ಅಧಿಕಾರಿಗಳ ನಿರ್ಲಕ್ಷ್ಯದಿಂದ ಎಲ್ಲ ಫಲಾನುಭವಿಗಳಿಗೂ ಸರಿಯಾಗಿ ತಲುಪುತಿಲ್ಲ ಎಂಬ ಆರೋಪ ಕೇಳಿ ಬರುತ್ತಿದ್ದು, ಅಧಿಕಾರಿಗಳು ಗಮನಹರಿಸಿ ಕ್ರಮ ಕೈಗೊಳ್ಳಬೇಕಿದೆ. ಗೃಹಲಕ್ಷ್ಮಿ ಯೋಜನೆಯಲ್ಲಿ ಸಾಕಷ್ಟು ಜನರಿಗೆ ಹಣ ಸಂದಾಯವಾಗಿಲ್ಲ ಇದಕ್ಕೆ ಏನು ಕಾರಣವೆಂಬುದನ್ನು ಪರಿಶೀಲಿಸಬೇಕು. ಮರಣ ಹೊಂದಿದವರ ಹೆಸರು ಪಡಿತರ ಚೀಟಿಯಲ್ಲಿ ಇದ್ದಲ್ಲಿ ಮಾಹಿತಿ ಪಡೆದು ತಿದ್ದುಪಡಿ ಮಾಡಿಕೊಟ್ಟರೆ ಇತರರಿಗೆ ಅನುಕೂಲವಾಗುತ್ತದೆ. ಜತೆಗೆ ಹಾಸಿಗೆಯಿಂದ ಏಳದವರು, ವಯಸ್ಸಾದವರಿಗೆ ಪಡಿತರ ಪಡೆಯಲು ಅನುಕೂಲ ಕಲ್ಪಿಸಿ, ಆಹಾರ ಇಲಾಖೆಯಲ್ಲಿನ ಜಾಗೃತಿ ಸಮಿತಿಗಳು ಕಾರ್ಯನಿರ್ವಹಿಸುತ್ತಿವೆಯೋ ಇಲ್ಲವೋ ತಿಳಿಯುತ್ತಿಲ್ಲ. ನನ್ನ ಗಮನಕ್ಕೆ ಬಂದಂತೆ ಹಳೇಬೀಡಿನಲ್ಲಿ ಒಬ್ಬರು ಗೃಹಲಕ್ಷ್ಮಿ ಹಣ ಬೇಡ ಎಂದಿದ್ದಾರೆ. ಆದರೆ ತಾಲೂಕಿನಲ್ಲಿ 156 ಜನರು ಗೃಹಲಕ್ಷ್ಮಿ ಹಣ ಬೇಡ ಎಂದಿದ್ದಾರೆ ಎಂದರೆ ಈ ಬಗ್ಗೆ ಮಾಹಿತಿ ಕೊಡಿ ಎಂದರು.

ಯುವನಿಧಿಯಲ್ಲಿ ತಾಲೂಕು ಹಿಂದೆ ಬೀಳಲು ಅಧಿಕಾರಿಗಳ ನಿರ್ಲಕ್ಷ್ಯ ಕಾರಣ. ಶಿಬಿರಗಳ ಮೂಲಕ ಜಾಗೃತಿ ಮೂಡಿಸಲು ದಿನಾಂಕ ಗೊತ್ತು ಮಾಡಿದರೆ ನಾವು ಎಲ್ಲರೂ ಬರುತ್ತೇವೆ. ತಾಲೂಕಿನ ವಿದ್ಯಾರ್ಥಿಗಳು, ನಿರುದ್ಯೋಗಿ ಯುವ ಜನತೆಯ ಅನುಕೂಲಕ್ಕಾಗಿ ಶೀಘ್ರದಲ್ಲೆ ಬೃಹತ್ ಉದ್ಯೋಗ ಮೇಳ ಆಯೋಜಿಸಲು ದಿನಾಂಕ ನಿಗದಿ ಮಾಡಿದರೆ ಬೇಕಾದ ಎಲ್ಲ ಸೌಲಭ್ಯಗಳನ್ನು ಒದಗಿಸಿ ಕೊಡುತ್ತೇವೆ. ಈ ಬಗ್ಗೆ ಜಿಲ್ಲಾ ಅಧಿಕಾರಿಗಳಿಗೆ ತಿಳಿಸಿ, ನಮಗೆ ಮಾಹಿತಿ ನೀಡಲು ಮುಂದಾಗಬೇಕು ಎಂದು ಅಧಿಕಾರಿ ಸಿದ್ದೇಶ್‌ಗೆ ತಿಳಿಸಿದರು. ಪುರಸಭೆ ವ್ಯಾಪ್ತಿಯಲ್ಲಿ ಗ್ಯಾರಂಟಿ ಯೋಜನೆಯ ಸೌಲಭ್ಯಗಳು ಫಲಾನುಭವಿಗಳಿಗೆ ಸಿಗುತ್ತಿದೆಯಾ ಎಂಬುದರ ಬಗ್ಗೆ ಅಲ್ಲಿನ ಅಧಿಕಾರಿಗಳಿಗೆ ಮಾಹಿತಿ ಕೇಳಿದರೂ ಸರಿಯಾದ ಸ್ಪಂದನೆ ಸಿಗುತ್ತಿಲ್ಲ. ಮತ್ತೊಮ್ಮೆ ಪುರಸಭೆ ಅಧ್ಯಕ್ಷರು, ಮುಖ್ಯಾಧಿಕಾರಿಗಳೊಂದಿಗೆ ಚರ್ಚಿಸಿ ಮಾಹಿತಿ ಪಡೆಯಲಾಗುವುದು ಎಂದು ಹೇಳಿದರು.

ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಸದಸ್ಯ ಹಳೇಬೀಡು ಶರತ್ ಮಾತನಾಡಿ, ಮನೆಗೆ ಗ್ಯಾಸ್ ಬುಕ್ ಮಾಡಿ ತಿಂಗಳಾಗಿದೆ. ಜತೆಗೆ ಒಟಿಪಿ ಬಂದಿದ್ದರೂ ಕುಸುಮ ಮತ್ತು ಸತ್ಯ ಗ್ಯಾಸ್ ಏಜೆನ್ಸಿಯವರ ಕಿತ್ತಾಟದಿಂದ ಗ್ರಾಹಕರಿಗೆ ಸಮಸ್ಯೆ ಉಂಟು ಮಾಡುತ್ತಿದ್ದಾರೆ. ಇವರಿಂದ ಕೂಲಿ ಕಾರ್ಮಿಕರು ಕೆಲಸ ಬಿಟ್ಟು ಸಿಲಿಂಡರ್‌ಗಾಗಿ ದಿನವಿಡೀ ಕಾಯುವಂತಾಗಿದೆ. ಈ ಬಗ್ಗೆ ಅಧಿಕಾರಿಗಳು ಗಮನ ಹರಿಸಿ ಸರಿಯಾದ ಕ್ರಮಕ್ಕೆ ಮುಂದಾಗಬೇಕು ಎಂದು ಒತ್ತಾಯಿಸಿದರು.

ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಅಧಿಕಾರಿ ಇಂಪಾ ಮಾತನಾಡಿ, ಗೃಹಲಕ್ಷ್ಮಿ ಯೋಜನೆ ಫೆಬ್ರವರಿ ತಿಂಗಳ ಹಣ ಹಾಕಲು ಸಿದ್ಧತೆ ನಡೆದಿದೆ. ಮತ್ತು ನಮ್ಮ ಇಲಾಖೆಯ 250 ಜನರಿಗೆ ಹಣ ಬರುತ್ತಿದ್ದು, ಉಳಿದಂತೆ 65 ಜನರಿಗೆ ಬರುತ್ತಿಲ್ಲ. ಜತೆಗೆ ಪಡಿತರ ಚೀಟಿಯ ಗೊಂದಲದಿಂದಾಗಿ ಕೆಲವರಿಗೆ ಹಣ ಸಂದಾಯವಾಗಿತ್ತಿಲ್ಲ ಎಂದರು.

ಆಹಾರ ನಿರೀಕ್ಷಕ ಪುರುಷೋತ್ತಮ್ ಮಾತನಾಡಿ, ಪಡಿತರದಾರರು ತಮ್ಮ ಆಧಾರ್ ಕಾರ್ಡ್‌ಗೆ ಬೇರೆಯವರ ಫೋನ್ ನಂಬರ್ ಕೊಟ್ಟಿದ್ದು, ಇ-ಕೆವೈಸಿ ಮಾಡಿಸದ ಕಾರಣ ಗೃಹಲಕ್ಷ್ಮಿ ಹಣ ಸಿಗುತ್ತಿಲ್ಲ ಅವರು ಇ-ಕೆವೈಸಿ ಮಾಡಿಸಿದ್ದರೆ ಏನಾಗಿದೆ ಎಂಬುದು ನಮಗೆ ತಿಳಿಯುತ್ತದೆ. ಮತ್ತು ಗ್ಯಾಸ್ ಸರಬರಾಜಿನ ವ್ಯತ್ಯಯದಿಂದ ಸಮಸ್ಯೆಯಾಗಿದೆ. ಹಳೇಬೀಡಿನಲ್ಲಿ ಏಜೆನ್ಸಿಯವರ ಕಿತ್ತಾಟವನ್ನು ಹಿರಿಯ ಅಧಿಕಾರಿಗಳ ಗಮನಕ್ಕೆ ತಂದು ಸರಿಪಡಿಸಲಾಗುವುದು ಎಂದರು.

ಸದಸ್ಯ ಸತೀಶ್ ಮಾತನಾಡಿ, ತಾಲೂಕಿನ ಹಗರೆಯಲ್ಲಿ ಕೆಎಸ್‌ಆರ್‌ಟಿಸಿ ಬಸ್‌ನವರು ಬೆಳಗ್ಗೆ 8ರಿಂದ 9 ಗಂಟೆ ಸಮಯದಲ್ಲಿ ಶಾಲಾ, ಕಾಲೇಜು ಶಿಕ್ಷಣಕ್ಕೆ ಹಾಸನಕ್ಕೆ ತೆರಳುವ ವಿದ್ಯಾರ್ಥಿಗಳನ್ನು ಹತ್ತಿಸಿಕೊಳ್ಳದೆ ಹಾಗೆಯೇ ಹೋಗುತ್ತಿರುವುದರಿಂದ ತೊಂದರೆಯಾಗುತ್ತಿದೆ. ಈ ಬಗ್ಗೆ ಗಮನ ಹರಿಸಬೇಕು ಎಂದು ಒತ್ತಾಯಿಸಿದರು.

ಸದಸ್ಯ ಸುರೇಶ್ ಮಾತನಾಡಿ, ತಾಲೂಕಿನ ಹಳೇಬೀಡು ಭಾಗದಲ್ಲಿ ಮಳೆ ಬಂದ ಸಂದರ್ಭ ಮನೆ ಮುಂದಿನ ವಿದ್ಯುತ್ ಲೈನ್ ಮೇಲೆ ಮರ ಬಿದ್ದಿತ್ತು. ತೆಗೆಯಲು ಸೆಸ್ಕ್ ಜೆಇಗೆ ಫೋನ್ ಮಾಡಿದರೆ ಅವರು ತೆಗೆಯೋದಿಲ್ಲ. ಏನಾದರೂ ಅನಾಹುತವಾದರೆ ಯಾರು ಹೊಣೆ. ಇವರ ಹತ್ತಿರ ಏನೇ ಕೆಲಸ ಮಾಡಿಸಬೇಕೆಂದರೂ ಬ್ರೋಕರ್‌ಗಳಿಂದ ಮಾಡಿಸಬೇಕು. ನೇರವಾಗಿ ಹೋದರೆ ಏನೂ ಆಗುವುದಿಲ್ಲ ಎಂದು ಆರೋಪಿಸಿದರು.

ಸಭೆಯಲ್ಲಿ ತಾಪಂ ಇಒ ಸತೀಶ್ ಕುಮಾರ್ ಹಾಗೂ ಗ್ಯಾರಂಟಿ ಸಮಿತಿ ಸದಸ್ಯರು, ಅಧಿಕಾರಿಗಳಿದ್ದರು.