ಚೆನ್ನಮ್ಮ ಸಮಾಧಿಗೆ ಭಾವಪೂರ್ಣ ನಮನ

ಚೆನ್ನಮ್ಮ ಅವರ ಸಮಾಧಿ ಸ್ಥಳದಲ್ಲಿ ಮಧ್ಯಾಹ್ನ 12 ಗಂಟೆ ನಂತರ ಪೂಜಾ ಕಾರ್ಯ ಶುರುವಾದವು. ಅದಕ್ಕೂ ಮುನ್ನ ಹರದನಹಳ್ಳಿಯ ದೇವೇಗೌಡರ ನಿವಾಸ ಹಾಗೂ ಹೊಳೆನರಸೀಪುರದ ಎಚ್.ಡಿ.ರೇವಣ್ಣ ಅವರ ಮನೆಯಲ್ಲಿ ವಿಶೇಷ ಪೂಜಾ ಕಾರ್ಯ ನೆರವೇರಿದವು. ಬಳಿಕ ಸಮಾಧಿ ಸ್ಥಳಕ್ಕೆ ಆಗಮಿಸಿದ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರು, ಸಮಾಧಿಗೆ ಮೊದಲ ಪೂಜೆ ಸಲ್ಲಿಸಿದರು. ಪತ್ನಿಯ ಸಮಾಧಿಗೆ ದುಂಡು ಮಲ್ಲಿಗೆ ಹೂಗಳನ್ನು ಅರ್ಪಿಸಿ, ನಮಿಸಿದರು. ಬಳಿಕ ಸಮಾಧಿ ಬಳಿಯೇ ಕೆಲ ನಿಮಿಷ ಮೌನವಾಗಿ ಕುಳಿತು ಭಾವುಕರಾದರು. ನಂತರ ಒಬ್ಬೊಬ್ಬರಾಗಿ ಕುಟುಂಬ ಸದಸ್ಯರು ಆಗಮಿಸಿ ಪೂಜೆ ಸಲ್ಲಿಸಿದರು. ಪುತ್ರರಾದ ಕೇಂದ್ರ ಸಚಿವ ಎಚ್.ಡಿ.ಕುಮಾರಸ್ವಾಮಿ, ಮಾಜಿ ಸಚಿವ ಎಚ್.ಡಿ.ರೇವಣ್ಣ, ಬಾಲಕೃಷ್ಣಗೌಡ, ಡಾ.ರಮೇಶ್, ಪುತ್ರಿಯರಾದ ಅನಸೂಯಾ, ಶೈಲಜಾ, ಸೊಸೆಯಂದಿರಾದ ಭವಾನಿ ರೇವಣ್ಣ, ಅನಿತಾ ಕುಮಾರಸ್ವಾಮಿ, ಮೊಮ್ಮಕ್ಕಳಾದ ನಿಖಿಲ್ ಕುಮಾರಸ್ವಾಮಿ, ಡಾ.ಸೂರಜ್ ರೇವಣ್ಣ ಸೇರಿದಂತೆ ಹಲವರು ಪೂಜೆ ಸಲ್ಲಿಸಿದರು.

ಈ ಸಂದರ್ಭದಲ್ಲಿ ಮೈಸೂರಿನ ಸುತ್ತೂರು ಮಠದ ಡಾ.ಶ್ರೀ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಹಾಗೂ ದೇವೇಗೌಡರ ಕುಟುಂಬ ಸದಸ್ಯರು ಹಾಜರಿದ್ದರು.

ಶ್ರೀ ಆದಿಚುಂಚನಗಿರಿ ಮಹಾಸಂಸ್ಥಾನ ಮಠದ ಡಾ. ಶ್ರೀ ನಿರ್ಮಲಾನಂದನಾಥ ಸ್ವಾಮೀಜಿ, ಹಾಸನ ಶಾಖಾ ಮಠದ ಶ್ರೀ ಶಂಭುನಾಥ ಸ್ವಾಮೀಜಿ, ಕೆಂಗೇರಿಯ ವಿಶ್ವ ಒಕ್ಕಲಿಗರ ಮಠದ ಶ್ರೀ ಡಾ.ನಿಶ್ಚಲಾನಂದನಾಥ ಸ್ವಾಮೀಜಿ ಅವರ ದಿನ್ಯ ಸಾನ್ನಿಧ್ಯದಲ್ಲಿ 11 ದಿನದ ಉತ್ತರ ಕ್ರಿಯಾದಿ ಕಾರ್ಯಗಳು ನೆರವೇರಿದವು.

ಸಮಾಧಿ ಸುತ್ತಲೂ ವಿಶೇಷ ಹೂವಿನ ಅಲಂಕಾರ ಜತೆಗೆ ಮಂಟಪ ನಿರ್ಮಾಣ ಮಾಡಲಾಗಿತ್ತು. ಚೆನ್ನಮ್ಮ ಅವರಿಗೆ ಇಷ್ಟವಾದ ತಿಂಡಿ ತಿನಿಸುಗಳನ್ನು ಹೆಣ್ಣು ಮಕ್ಕಳು ಮನೆಯಿಂದಲೇ ತಯಾರಿಸಿಕೊಂಡು ಬಂದು ಎಡೆ ಇಟ್ಟಿದ್ದರು.

ಕೇಂದ್ರ ಸಚಿವ ವಿ.ಸೋಮಣ್ಣ, ವಿಧಾನ ಪರಿಷತ್ ವಿಪಕ್ಷ ನಾಯಕ ಛಲವಾದಿ ನಾರಾಯಣಸ್ವಾಮಿ, ಬಿಜೆಪಿ ರಾಜ್ಯಾಧ್ಯಕ್ಷ ವಿಜಯೇಂದ್ರ, ಮಾಜಿ ಸಿಎಂ ಡಿ.ವಿ.ಸದಾನಂದಗೌಡ, ಎಂಎಲ್ಸಿ ಸಿ.ಟಿ.ರವಿ, ಮಾಜಿ ಸಚಿವರಾದ ಡಾ.ಅಶ್ವತ್ಥನಾರಾಯಣ, ಸಿ.ಎಂ.ಇಬ್ರಾಹಿಂ, ಸುರೇಶ್ ಬಾಬು, ಹಿರಿಯ ನಾಯಕ ಬಿ.ಎಲ್.ಶಂಕರ್, ಸಂಸದ ಮಲ್ಲೇಶಬಾಬು, ಮಾಜಿ ಸಚಿವ ಬಂಡೆಪ್ಪ ಕಾಶೆಂಪೂರ್ ಇತರರು ಆಗಮಿಸಿದ್ದರು. ಶಿವಾರ ಉಮೇಶ್ ಮತ್ತವರ ತಂಡದಿಂದ ನಡೆದ ವಿಶೇಷ ಗಾಯನ ನಮನ ಕಾರ್ಯಕ್ರಮ ಗಮನ ಸೆಳೆಯಿತು.

ಬಂದ ಜನರಿಗೆ ಯಾವುದೇ ತೊಂದರೆ, ನೂಕು ನುಗ್ಗಲು, ಗೊಂದಲ ಆಗದಂತೆ ಒಟ್ಟು **********16 ಊಟದ ಕೌಂಟರ್ ತೆರೆಯಲಾಗಿತ್ತು. ಸಾಮಾನ್ಯ ಜನರು, ಮಹಿಳೆಯರು, ವಿಐಪಿಗಳಿಗೆ ಪ್ರತ್ಯೇಕ ಕೌಂಟರ್ ತೆರೆಯಲಾಗಿತ್ತು. ಇವುಗಳ ಪಕ್ಕದಲ್ಲೇ ಅಡುಗೆ ತಯಾರಿಸಲಾಗಿತ್ತು. ಊಟ ಬಡಿಸಲು, ಸ್ವಚ್ಛತೆಗೆ ಪ್ರತ್ಯೇಕ ಜನರನ್ನು ನೇಮಕ ಮಾಡಿದ್ದರಿಂದ ಬಂದವರೆಲ್ಲ ನೆಮ್ಮದಿ ಯಿಂದ ಊಟಮಾಡಿದರು.

1500 ಬಾಣಸಿಗರು ತರಹೇವಾರಿ ಅಡುಗೆ ತಯಾರಿದ್ದರು. ಕಜ್ಜಾಯ, ಲಾಡು, ಹೋಳಿಗೆ, ಹಲ್ವಾ, ಪಾಯಸ, ವಡೆ, ಪುಳಿಯೊಗರೆ, ಬಿಸಿಬೇಳೆ ಬಾತ್ ಸೇರಿದಂತೆ ವಿವಿಧ ಬಗೆಯ ತಿನಿಸುಗಳ ತಯಾರು ಮಾಡಲಾಗಿತ್ತು. ಒಂದು ಪಂಕ್ತಿಗೆ ಸುಮಾರು 15 ಸಾವಿರ ಜನ ಕೂರಲು ವ್ಯವಸ್ಥೆ ಮಾಡಲಾಗಿತ್ತು.

ಮೈಸೂರಿನ ಕಲಾವಿದ ಪುನೀತ್ ಹಾಗೂ ರವಿ ಸಮಾಧಿ ಬಳಿ ಚೆನ್ನಮ್ಮ ಅವರ ಕಲಾಕೃತಿ ನಿರ್ಮಾಣ ಮಾಡಿದ್ದರು. ಬಣ್ಣ ಬಣ್ಣದ ರಂಗೋಲಿಯಿಂದ ಬಿಡಿಸಿದ ಚಿತ್ರ ಗಮನ ಸೆಳೆಯಿತು.

ಅನಿತಾ ಕುಮಾರಸ್ವಾಮಿ

ಚೆನ್ನಮ್ಮ ಅವರ ಸಮಾಧಿ ಸ್ಥಳ ಈ ಭೂಮಿ ಇರುವವರೆಗೂ ಬೆಳಗಬೇಕು ಎಂದು ಪುತ್ರ, ಕೇಂದ್ರ ಸಚಿವ ಎಚ್.ಡಿ.ಕುಮಾರಸ್ವಾಮಿ ಹೇಳಿದರು.

ಎಚ್.ಡಿ.ಕುಮಾರಸ್ವಾಮಿ ಅವರು ತಾಯಿ ಚಿತ್ರವನ್ನು ಕೈಗೆ ಹಾಕಿಕೊಂಡಿರುವ ಎಚ್‌ಎಂಟಿ ವಾಚಿಗೆ ಹಾಕಿಸಿಕೊಂಡಿದ್ದಾರೆ. ಮಾಧ್ಯಮಕ್ಕೆ ಕೈ ಚಾಚಿ ವಾಚ್ ತೋರಿಸಿದ ಎಚ್‌ಡಿಕೆ, ನಮ್ಮ ಕಾರ್ಯಕರ್ತರು ಬಿಜಿನೆಸ್ ಮಾಡಿದರೆ ಎಚ್‌ಎಂಟಿಯನ್ನು ದೊಡ್ಡ ಮಟ್ಟದಲ್ಲಿ ಬೆಳೆಸುವ ಸಾಧ್ಯತೆ ಇದೆ. ನಾನೇ ಇದನ್ನ ಸ್ಯಾಂಪಲ್ ಮಾಡಿಸಿದ್ದೇನೆ ಎಂದರು.