ವಿದ್ಯಾರ್ಥಿನಿಯರ ನೆರವಿಗೆ ದೂರು ಪೆಟ್ಟಿಗೆ

ನಗರದ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕಚೇರಿಯಲ್ಲಿ ಮಂಗಳವಾರ ದೂರು/ಸಲಹಾ ಪೆಟ್ಟಿಗೆ ಬಿಡುಗಡೆಗೊಳಿಸಿ ಮಾತನಾಡಿದ ದಕ್ಷಿಣ ವಲಯ ಐಜಿ ಬೋರಲಿಂಗಯ್ಯ ಅವರು, ಜನಸ್ನೇಹಿ ಪೊಲೀಸ್ ವಾತಾವರಣ ಸೃಷ್ಟಿಗಾಗಿ ಹತ್ತು ಹಲವು ಕಾರ್ಯಕ್ರಮ ಹಮಿಕೊಳ್ಳಲಾಗಿದೆ. ಗ್ರಾಮೀಣ ಭಾಗದ ಹೆಣ್ಣು ಮಕ್ಕಳನ್ನು ಕೇಂದ್ರೀಕರಿಸಿ ಸಲಹಾ ಪೆಟ್ಟಿಗೆ ಸ್ಥಾಪಿಸಲಾಗುತ್ತಿದೆ. ಜಿಲ್ಲೆಯ 51 ಪ್ರಾಥಮಿಕ ಹಾಗು ಪ್ರೌಢ ಶಾಲೆಯಲ್ಲಿ ಪ್ರಾಯೋಗಿಕವಾಗಿ ಪೆಟ್ಟಿಗೆ ಅಳವಡಿಸಲಾಗುವುದು. ಪ್ರತಿ 15 ದಿನಕ್ಕೊಮೆ ಶಾಲೆಯ ವ್ಯಾಪ್ತಿಯ ಪೊಲೀಸ್ ಠಾಣೆಯ ಸಿಬ್ಬಂದಿ ಅದನ್ನು ತೆರೆದು ಪತ್ರಗಳನ್ನು ತರುತ್ತಾರೆ. ಪೆಟ್ಟಿಗೆಯ ಕೀ ಇನ್ಸಪೆಕ್ಟರ್ ಬಳಿ ಇರುತ್ತದೆ. ಏನೇ ಸಮಸ್ಯೆಯಿದ್ದರೂ ಮಕ್ಕಳು ದೂರು ಹೇಳಿಕೊಳ್ಳಬಹುದೆಂದರು.

ಸಮಸ್ಯೆ ಇದ್ದರೆ ಮಾತ್ರ ಪತ್ರ ಬರೆಯುವುದಲ್ಲ. ಏನೇ ಸಲಹೆ-ಸೂಚನೆ ನೀಡಲು ಪೆಟ್ಟಿಗೆಯನ್ನು ಉಪಯೋಗಿಸಬಹುದು. ಮಲೆನಾಡು ಭಾಗದಲ್ಲಿ ಶಾಲೆಗೆ ಬರಲು ಅನೇಕ ಸಮಸ್ಯೆಗಳಿರುತ್ತವೆ. ಅಧಿಕಾರಿ ಹಾಗೂ ಪಾಲಕರ ವಿವೇಚನೆಗೆ ಬಾರದ ಪರಿಹಾರೋಪಾಯಗಳು ಮಕ್ಕಳಲ್ಲಿ ಇರಬಹುದು. ಅಂತಹ ವಿಷಯಗಳಿದ್ದರೆ ಸಲಹಾ ಪೆಟ್ಟಿಗೆ ಮೂಲಕ ಹೇಳಬಹುದೆಂದರು.

ಪ್ರಾಯೋಗಿಕವಾಗಿ ಜಿಲ್ಲೆಯ 51 ಶಾಲೆಗಳಲ್ಲಿ ಅದರಲ್ಲೂ ಪ್ರೌಢಶಾಲೆಗಳಲ್ಲಿ ಪೆಟ್ಟಿಗೆ ಅಳವಡಿಸಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಖಾಸಗಿ ಶಿಕ್ಷಣ ಸಂಸ್ಥೆಯಲ್ಲೂ ಇಡುವ ವ್ಯವಸ್ಥೆ ಮಾಡಲಾಗುವುದೆಂದರು.

ಜಿಲ್ಲಾ ಪೊಲೀಸ್ ವರಿಷ್ಟಾಧಿಕಾರಿ ಶುಭನ್ವಿತಾ, ಹೆಚ್ಚುವರಿ ಪೊಲೀಸ್ ವರಿಷ್ಟಾಧಿಕಾರಿ ಎಂ.ಕೆ.ತಮಯ್ಯ, ಸಾರ್ವಜನಿಕ ಶಿಕ್ಷಣ ಇಲಾಖೆ ಉಪನಿರ್ದೆಶಕ ಕೆ.ಎನ್.ಬಲರಾಮ್, ಡಿವೈಎಸ್ಪಿ ಗಂಗಾಧರ್ ಇತರರಿದ್ದರು.