ಜಾನುವಾರುಗಳಿಗೆ ಕಿವಿಯೊಲೆ ಹಾಗೂ ವಿಮೆ ಮಾಡಿಸುವಂತೆ ಅಧಿಕಾರಿಗಳು ರೈತರಿಗೆ ಸೂಚನೆ ನೀಡಿದ್ದಾರೆ. ಪಶು ಸಂಗೋಪನಾ ಇಲಾಖೆಯಿಂದ ನೀಡಲಾಗುವ ಕಿವಿಯೊಲೆಯಿಂದ ಹಸು ಎಲ್ಲೇ ಇದ್ದರೂ ಪತ್ತೆ ಮಾಡಬಹುದು. ಅದರಲ್ಲಿ 12 ಡಿಜಿಟ್ ಸಂಖ್ಯೆ, ಬಾರ್ ಕೋಡ್ ಇರುವುದರಿಂದ ರಾಸು ಎಲ್ಲೇ ಇದ್ದರೂ ಪತ್ತೆಯಾಗುತ್ತದೆ. ಆದ್ದರಿಂದ ಎಲ್ಲರೂ ಕಡ್ಡಾಯವಾಗಿ ಓಲೆ ಹಾಕಿಸಬೇಕೆಂದು ಅಧಿಕಾರಿಗಳು ಮನವಿ ಮಾಡಿದ್ದಾರೆ. ಜತೆಗೆ ವಿಮೆ ಇದ್ದರೂ ಅನುಕೂಲವಾಗುತ್ತದೆ. ಹಸು ಕಳುವಾದರೆ ವಿಮೆ ಮೊತ್ತ ಪಾವತಿಯಾಗುವುದಿಲ್ಲ. ಒಂದು ವೇಳೆ ಅನಾರೋಗ್ಯ ಅಥವಾ ಮತ್ತಿತರ ಕಾರಣಗಳಿಂದ ಮೃತಪಟ್ಟರೆ 15 ಸಾವಿರ ರೂ. ವರೆಗೆ ಪರಿಹಾರ ದೊರೆಯುತ್ತದೆ. ಕುರಿ, ಮೇಕೆಗಳಿಗೆ 7 ಸಾವಿರ ರೂ. ಹಾಗೂ ಹುಟ್ಟಿನಿಂದ 6 ತಿಂಗಳ ಒಳಗಿನ ಪ್ರಾಣಿಗಳಿಗೆ 5 ಸಾವಿರ ರೂ.ತನಕ ಪರಿಹಾರ ದೊರೆಯಲಿದೆ. ರಾಸುಗಳಿಗೆ ವಿಮೆ ಹಾಗೂ ಕಿವಿಯೊಲೆ ಎರಡೂ ಇದ್ದರೆ ಅದರ ಮಾರುಕಟ್ಟೆ ಮೌಲ್ಯ ಎಷ್ಟಿರುತ್ತದೋ ಅಷ್ಟು ಹಣವನ್ನು ಸರ್ಕಾರದಿಂದ ಕೊಡಿಸುವ ಅವಕಾಶವಿದೆ.
