ಶ್ರೀಕ್ಷೇತ್ರ ಕೋಡಿಮಠದ ದೈವಾಂಶ ಸಂಭೂತ ಶಿವಲಿಂಗಜ್ಜಯ್ಯ ಅವರು ಕ್ರಿ.ಶ.1859ರಲ್ಲಿ ತುಮಕೂರು ಜಿಲ್ಲೆಯ ಸಂಪಿಗೆ ಗ್ರಾಮಕ್ಕೆ ಭೇಟಿ ನೀಡಿ ರಾತ್ರಿ ಹಿಂದಿರುಗುವಾಗ ‘ನಾನು ನಿಮ್ಮೊಡನೆ ಬರುವೆ’ಎಂದು ಅಶರೀರವಾಣಿ ಕೇಳಿಸಿತು. ಆಗ ಶ್ರೀ ಶಿವಲಿಂಗಜ್ಜಯ್ಯ ಸ್ವಾಮೀಜಿ ಅವರು ದಿವ್ಯ ದೃಷ್ಟಿಯಿಂದ ನೋಡಿದಾಗ ಲೋಕ ಕಲ್ಯಾಣಾರ್ಥವಾಗಿ ಈ ಭಾಗಕ್ಕೆ ಬಂದು ನೆಲೆಸುವ ಬಯಕೆಯಂತೆ ಶ್ರೀದೇವಿ ಸಾಕ್ಷಾತ್ ಪಾರ್ವತಿಯಂತೆ ಕಂಗೊಳಿಸುತ್ತಿದ್ದುದು ಗೋಚರಿಸಿತು.ಆ ದೇವತೆ ನೆರಳಿನಂತೆ ಹಿಂಬಾಲಿಸಿ ಸುಕ್ಷೇತ್ರ ಮಾಡಾಳಿಗೆ ಬಂದಾಗ ದೇವಿಯನ್ನು ಯಾರ ಮನೆಯಲ್ಲೂ ಇರಿಸಲು ಇಷ್ಟಪಡದ ಶಿವಲಿಂಗಜ್ಜಯ್ಯ, ಮುದ್ದೇಗೌಡ ವಂಶಸ್ಥರ ಈಗ ಗಂಗಮ್ಮನವರ ಬಾವಿ ಎಂದೇ ಖ್ಯಾತಿಯಾಗಿರುವ ಬಾವಿಯಲ್ಲಿ ಇರು. ಮುಂದೆ ಎಲ್ಲಿ ನೆಲೆಯೂರಬೇಕು ಎಂಬುದನ್ನು ಸಮಯ ಬಂದಾಗ ಆಲೋಚಿಸೋಣ ಎಂದರು. ನಂತರ ಆಕೆಯನ್ನು ಮೃತ್ತಿಕೆಯಲ್ಲಿ ಪ್ರತಿಷ್ಠಾಪಿಸಿ, ಚಿನ್ನದ ಮೂಗುತಿ ಧರಿಸಿ ಪೂಜಿಸಿದರು.
