ಅರಸೀಕೆರೆ ತಾಲೂಕು ಸಾಧು, ಸಂತರು, ಸಿದ್ಧರು, ಆಧ್ಯಾತ್ಮಿಕ ದಾರ್ಶನಿಕರು ನೆಲೆಸಿರುವ ತಪೋಭೂಮಿಯಾಗಿದ್ದು, ಈ ಕ್ಷೇತ್ರದಲ್ಲಿ ಪಂಚ ಪೀಠಾಧೀಶರು ನಡೆದಾಡುವ ಮೂಲಕ ಈ ತಪೋಭೂಮಿಗೆ ಮತ್ತಷ್ಟು ಧಾರ್ಮಿಕ ಶಕ್ತಿ ತುಂಬಿದ್ದಾರೆ. ಜತೆಗೆ ಪಂಚ ಪೀಠಾಧೀಶರೊಂದಿಗೆ ಧಾರ್ಮಿಕ ಅವಿನಾಭಾವ ಸಂಬಂಧ ಹೊಂದಿರುವ ಜನರು ಪುಣ್ಯವಂತರಾಗಿದ್ದಾರೆ. ಇಷ್ಟಲಿಂಗ ಪೂಜೆಗೆ ಯಾವುದೇ ಜಾತಿ ತಾರತಮ್ಯವಿಲ್ಲ. ಲಿಂಗಧಾರಣೆಯೇ ನಮ್ಮ ಧರ್ಮಾಚರಣೆಯಾಗಿದ್ದು, ಸದಾ ದೇವರೊಂದಿಗೆ ಸಂಪರ್ಕ ಇಟ್ಟುಕೊಳ್ಳುವುದೇ ವೀರಶೈವ ಸಿದ್ದಾಂತದ ಮೂಲವಾಗಿದೆ. ಪಂಚಪೀಠಗಳಾದ ಬಾಳೆಹೊನ್ನೂರು, ಉಜ್ಜೈನಿ, ಕೇದಾರ, ಶ್ರೀಶೈಲ ಹಾಗು ಕಾಶಿ ಕ್ಷೇತ್ರಗಳೊಂದಿಗೆ ಗುರುತಿಸಿಕೊಂಡಿರುವ ಐತಿಹಾಸಿಕ ಪುಣ್ಯ ಕ್ಷೇತ್ರಗಳಾಗಿವೆ. ಐದು ಪೀಠಗಳು ಅಷ್ಟಾವರಣಗಳಾದ ಗುರು, ಲಿಂಗ, ಜಂಗಮ, ವಿಭೂತಿ, ರುದ್ರಾಕ್ಷಿ, ಮಂತ್ರ, ಪಾದೋದಕ ಮತ್ತು ಪ್ರಸಾದಗಳೊಂದಿಗೆ ಪರಮೇಶ್ವರನ ಐದು ಮುಖಗಳಾದ ಸದ್ಯೋಜಾತ, ವಾಮದೇವ, ಅಘೋರ, ತತ್ಪುರುಷ, ಈಶಾನ ಮುಖಗಳನ್ನು ಹೊಂದಿದ ಪೀಠಗಳಾಗಿವೆ ಎಂದು ಹೇಳಿದರು.
