ದೇಶದ ತಾಯಂದಿರಿಗೆ ಮಾಡಿದ ಅಪಮಾನ

ಜನಧನ ಬ್ಯಾಂಕ್ ಖಾತೆ ತೆರೆದು ಗ್ರಾಮೀಣ ಮಹಿಳೆಯರೂ ಆರ್ಥಿಕ ವ್ಯವಹಾರ ನಡೆಸಲು ಕಾರಣವಾಗಿದ್ದು ಮೋದಿ ಅವರು, ಹಾಗೆಯೇ ಹೊಗೆಮುಕ್ತ ಮಾಡಲು ಉಜ್ವಲ ಯೋಜನೆ ತಂದು ಮಹಿಳಾ ಸಂಕಷ್ಟಗಳಿಗೆ ಸ್ಪಂದಿಸಿದರು. ಮಹಿಳಾ ಮೀಸಲು ಮಸೂದೆ ಜಾರಿಯಲ್ಲಿ ರಾಜಕೀಯ ಬೇಡ ಎಂದು ಮೇಲ್ಪಂಕ್ತಿ ಹಾಕಲು ಪ್ರಧಾನಿ ಅವರು ಮುಂದಾದರೆ, ರಾಹುಲ್ ಗಾಂಧಿ ಹಾಗೂ ಮಿತ್ರರು ಸೇರಿ ಸೋಲಿಸಿದ್ದಾರೆ ಎಂದು ಅಸಮಾಧಾನ ಹೊರಹಾಕಿದರು.

ಪ್ರಾತಿನಿಧ್ಯ ಸಿಕ್ಕಾಗ ಧ್ವನಿ ಸಿಗಲಿದೆ, ಮಹಿಳೆಯರಿಗೆ ಶಕ್ತಿ ತುಂಬಲು ಮೀಸಲು ಮಸೂದೆ ಮಂಡಿಸಲಾಯಿತು. ಆದರೆ ಇಂಡಿಕೂಟ, ಸುಮಾರು 70 ಕೋಟಿ ತಾಯಂದಿರ ಹಕ್ಕು ಕಸಿದು ಅನ್ಯಾಯ ಮಾಡಿದೆ. ಇದರ ವಿರುದ್ಧ ನಾವು ನಿರಂತರವಾಗಿ ಹೋರಾಟ ಮಾಡುವ ಮೂಲಕ ಕಾಂಗ್ರೆಸ್ ಹಗೆತನವನ್ನು ಮನೆ ಮನೆಗೆ ತಲುಪಿಸುವುದರ ಜತೆಗೆ ನಿರಂತರ ಹೋರಾಟ ಮಾಡಲಾಗುವುದು ಎಂದು ಎಚ್ಚರಿಸಿದರು.

ಬಿಜೆಪಿ ಅವಕಾಶ ಸಿಕ್ಕಾಗಲೆಲ್ಲ ಮಹಿಳೆಯರಿಗೆ ಅವಕಾಶ, ಅಧಿಕಾರ ನೀಡಿದೆ. ದೇಶದಲ್ಲಿ ರಕ್ಷಣಾಮಂತ್ರಿ ಮಹಿಳೆಯಾಗಿದ್ದರು. ಹಾಲಿ ಹಣಕಾಸು ಸಚಿವರು ಮಹಿಳೆಯರೇ ಆಗಿದ್ದಾರೆ. ದೇಶದ ಪ್ರಥಮ ಪ್ರಜೆ ಮಹಿಳೆಯೇ ಆಗಿದ್ದಾರೆ. ಸುಷ್ಮಾ ಸ್ವರಾಜ್ ವಿದೇಶಾಂಗ ಖಾತೆ ನಿಭಾಯಿಸಿದ್ದರು. ಮತ್ತೊಮ್ಮೆ ಕಾಂಗ್ರೆಸ್‌ನವರು ಆತ್ಮ ವಿಮರ್ಶೆ ಮಾಡಿಕೊಳ್ಳಬೇಕು, ಈ ವಿಚಾರದಲ್ಲಿ ಅವರಿಗೆ ಸದ್ಬುದ್ಧಿ ಕೊಡಲಿ ಎಂದು ವಿನಂತಿ ಮಾಡಿದರು.

ಹಿಂದೆಯೂ ನಾವು ಮಹಿಳೆಯರಿಗಾಗಿ ಅನೇಕ ಯೋಜನೆ ಜಾರಿ ಮಾಡಿದ್ದೇವೆ. ಜೆಜೆಂಎಂ, 12 ಕೋಟಿ ಶೌಚಗೃಹ, ನಾಲ್ಕೂವರೆ ಕೋಟಿ ಮನೆ ನಿರ್ಮಾಣ ಮಾಡಿದ್ದೇವೆ. ಅಂಥ ಯೋಜನೆಗಳಲ್ಲಿ ಇದೂ ಒಂದು ಅಂದುಕೊಂಡಿದ್ದೆವು. ಆದರೀಗ ಎಲ್ಲದಕ್ಕೂ ತಡೆ ಆಗಿದೆ. ಇದಕ್ಕೆ ಕಾರಣರಾದ ತಾಯಂದಿರ ಕಣ್ಣೀರ ಶಾಪ ತಟ್ಟುವುದರಲ್ಲಿ ಸಂದೇಹ ಇಲ್ಲ ಎಂದು ಭವಿಷ್ಯ ನುಡಿದರು.

ಬಿಜೆಪಿ-ಜೆಡಿಎಸ್ ಮೈತ್ರಿ ಕುರಿತು ನಿಖಿಲ್ ಕುಮಾರಸ್ವಾಮಿ ಅವರ ಸಿದ್ಧಾಂತ ಹೇಳಿಕೆಗೆ ಪ್ರತಿಕ್ರಿಯಿಸಿದ ಪ್ರೀತಂ, ಅವರ ಸಿದ್ಧಾಂತ ಅವರದು, ನಮ್ಮ ಸಿದ್ಧಾಂತ ನಮ್ಮದು ಎಂದಷ್ಟೇ ಉತ್ತರಿಸಿದರು. ಇದೇ ವೇಳೆ ಮುಂದಿನ ಸಿಎಂ ಕುಮಾರಣ್ಣ ಎಂಬ ಮಾತಿಗೆ ಎನ್‌ಡಿಎ ನೇತೃತ್ವದಲ್ಲಿ ಸಿಎಂ ಆಗೋದು ಖಚಿತ, ಆದರೆ ಸಿಎಂ ಯಾರು ಎಂಬುದನ್ನು ರಾಷ್ಟ್ರೀಯ ನಾಯಕರು ತೀರ್ಮಾನ ಮಾಡಲಿದ್ದಾರೆ. ಅವರ ಮನಸ್ಸಿನ ಇಚ್ಛೆಯನ್ನು ಅವರು ಹೇಳಿದ್ದಾರೆ ಎಂದರು.

ಇದೇ ವೇಳೆ ಮುಂದಿನ ವಿಧಾನಸಭೆ ಚುನಾವಣೆಯಲ್ಲಿ ಹಾಸನದಿಂದ ನಾನೇ ಅಭ್ಯರ್ಥಿ, ಅನುಮಾನ ಬೇಡ ಎಂದು ಸ್ಪಷ್ಟನೆ ನೀಡಿದರು.

ರಾಜ್ಯ ಬಿಜೆಪಿ ಮಹಿಳಾ ಘಟಕದ ಮಾಜಿ ಉಪಾಧ್ಯಕ್ಷೆ ಸುಲೋಚನಾ ಭಟ್ ಮಾತನಾಡಿ, ಮಹಿಳೆಯರಿಗೆ ಎಲ್ಲ ರೀತಿಯಲ್ಲೂ ಶಕ್ತಿ ತುಂಬುವ ಮಸೂದೆ ಜಾರಿಗೊಳಿಸುವುದು ಪ್ರಧಾನಿ ಅವರ ಆಶಯವಾಗಿತ್ತು. ಸೋಲಲು ಕಾಂಗ್ರೆಸ್ ಮತ್ತದರ ಮಿತ್ರ ಪಕ್ಷಗಳೇ ಕಾರಣ, ವಿರೋಧಕ್ಕಾಗಿ ವಿರೋಧ ಮಾಡಿದರು.

ಸುದ್ದಿಗೋಷ್ಠಿಯಲ್ಲಿ ಆಲೂರು-ಸಕಲೇಶಪುರ ಶಾಸಕ ಸಿಮೆಂಟ್ ಮಂಜು, ಜಿಲ್ಲಾಧ್ಯಕ್ಷ ಸಿದ್ದೇಶ್ ನಾಗೇಂದ್ರ, ಮಹಿಳಾ ಮೋರ್ಚಾ ಜಿಲ್ಲಾಧ್ಯಕ್ಷೆ ನೇತ್ರಾವತಿ ಮಂಜುನಾಥ್, ಮಾಧ್ಯಮ ಪ್ರಮುಖ್ ಬಿ.ವೇದಾವತಿ ಇದ್ದರು.