ಬಿಹಾರಿ ಮಕ್ಕಳಿಗೆ ಬೆಳಕಾದ ಶಿಕ್ಷಕಿ

19 ವರ್ಷಗಳಿಂದ ಪ್ರಮೀಳಾ ಅವರು ಪಿರುಮನಹಳ್ಳಿ ಶಾಲೆಯಲ್ಲಿ ಶಿಕ್ಷಕಿಯಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ನಾಲ್ಕೈದು ವರ್ಷಗಳ ಹಿಂದೆ ಶಾಲೆಗೆ ಹೋಗುತ್ತಿದ್ದಾಗ ಮಕ್ಕಳು ಚನ್ನಪಟ್ಟಣದ ಖಾಲಿ ಪ್ರದೇಶದಲ್ಲಿ ಬಿಸಿಲು, ಗಾಳಿಗೆ ಮೈಯೊಡ್ಡಿ ಆಟವಾಡುತ್ತಾ, ತಂದೆ-ತಾಯಿಯೊಂದಿಗೆ ಕೆಲಸ ಮಾಡಿಕೊಂಡಿರುವುದನ್ನು ನೋಡಿದ ಪ್ರಮೀಳಾ ಅವರು ಹತ್ತಿರಕ್ಕೆ ಹೋಗಿ ವಿಚಾರಿಸಿದ್ದಾರೆ. ಮಕ್ಕಳ ಪಾಲಕರಿಗೆ ಕನ್ನಡ ಬರುವುದಿಲ್ಲ, ಶಿಕ್ಷಕಿಗೆ ಹಿಂದಿ ಗೊತ್ತಿಲ್ಲ. ಮಾರನೇ ದಿನ ಹಿಂದಿ ಹಾಗೂ ಕನ್ನಡ ಭಾಷೆ ಬಲ್ಲ ವ್ಯಕ್ತಿಯೊಂದಿಗೆ ಹೋದಾಗ ಅವರ ಕಷ್ಟ ಸುಖಗಳನ್ನು ಆಲಿಸಿದ್ದಾರೆ. ನಿಮ್ಮ ಮಕ್ಕಳಿಗೆ ಶಿಕ್ಷಣ ಕೊಡಿಸಿ ಇಲ್ಲವಾದರೆ ಅವರು ನಿಮ್ಮಂತೆ ಚಿಂದಿ ಆಯಬೇಕಾಗುತ್ತದೆಂದು ತಿಳಿ ಹೇಳಿದಾಗ ಪಾಲಕರು ಶಾಲೆಗೆ ಕಳುಹಿಸಲು ಒಪ್ಪಿದರು. ಹತ್ತಿರದ ಸರ್ಕಾರಿ ಶಾಲೆಗಳಿಗೆ ಮಕ್ಕಳನ್ನು ಸೇರಿಸಬಹುದಿತ್ತಾದರೂ ಪಾಲಕರ ಹಾಗೂ ಮಕ್ಕಳ ಅಗತ್ಯ ದಾಖಲೆಗಳಿಲ್ಲದ ಕಾರಣ ಪ್ರಮೀಳಾ ಅವರೇ ಮುತುವರ್ಜಿ ವಹಿಸಿ ತಮ್ಮ ಶಾಲೆಗೆ ಸೇರಿಸಿಕೊಂಡಿದ್ದಾರೆ.

ಶಾಲೆ ತಲುಪಲು ಸಮಯಕ್ಕೆ ಸರಿಯಾಗಿ ಸಾರಿಗೆ ಬಸ್‌ನ ವ್ಯವಸ್ಥೆಯಿಲ್ಲದ ಕಾರಣ ಅವರು ಆಟೋದಲ್ಲಿ ತೆರಳುತ್ತಾರೆ. ಆರಂಭದಲ್ಲಿ ಎರಡು ಮಕ್ಕಳನ್ನು ತಮ್ಮೊಂದಿಗೆ ಕರೆದುಕೊಂಡು ಮಕ್ಕಳಿಗೆ ಕನ್ನಡ ಕಲಿಸಲು ಆರಂಭಿಸಿದ ಪ್ರಮೀಳಾ ಅವರು ಸದ್ಯ 8 ಮಕ್ಕಳಿಗೆ ಆಸರೆಯಾಗಿದ್ದಾರೆ.

ಪ್ರಸ್ತುತ 6 ಹೆಣ್ಣು ಹಾಗೂ ಇಬ್ಬರು ಗಂಡು ಮಕ್ಕಳು ಶಾಲೆಯಲ್ಲಿ ವ್ಯಾಸಂಗ ಮಾಡುತ್ತಿದ್ದು, ಎಲ್ಲರೂ ಸುಲಲಿತವಾಗಿ ಕನ್ನಡ ಮಾತನಾಡುತ್ತಾರೆ. ವಚನಗಳ ಓದುವಿಕೆ, ಕಥೆ, ಕವನ ಹೇಳುವುದು. ಪ್ರಾರ್ಥನಾ ಗೀತೆಗೆ ಬಿಹಾರದ ಮಕ್ಕಳೇ ಮೊದಲ ಸಾಲಿನಲ್ಲಿರುತ್ತಾರೆ. ನಮ್ಮ ಅಪ್ಪ-ಅಮ್ಮ ಚಿಂದಿ ಆಯುತ್ತಾರೆ, ನಾವು ಸೈನಿಕರಾಗುತ್ತೇವೆ, ವೈದ್ಯ, ಶಿಕ್ಷಕ ಹೀಗೆ ತಮ್ಮದೇ ಕನಸುಗಳನ್ನು ಬಿಚ್ಚಿಡುತ್ತಾರೆ. ಆರ್ಥಿಕವಾಗಿ ತೀರಾ ದುರ್ಬಲರಾಗಿರುವ ವಿದ್ಯಾರ್ಥಿಗಳಿಗೆ ಗ್ರಾಮಸ್ಥರೇ ಯೂನಿಫಾರ್ಮ್, ನೋಟ್‌ಬುಕ್ ಸೇರಿದಂತೆ ಅಗತ್ಯ ಸೌಕರ್ಯ ಕಲ್ಪಿಸುತ್ತಿದ್ದಾರೆ. ತಿಂಗಳಿಗೆ 8 ಸಾವಿರ ರೂ. ಆಟೋ ಬಾಡಿಗೆಯನ್ನು ಶಿಕ್ಷಕಿ ಪ್ರಮೀಳಾ ಭರಿಸುತ್ತಿದ್ದಾರೆ. ಮಾಡುವ ಕೆಲಸದಲ್ಲಿ ಶ್ರದ್ಧೆ ಇದ್ದರೆ ಇಂತಹ ಸಕಾರಾತ್ಮಕ ಬದಲಾವಣೆಗಳು ಸಾಧ್ಯ ಎಂಬುದಕ್ಕೆ ಶಿಕ್ಷಕಿ ಪ್ರಮೀಳಾ ಅವರು ಸಾಕ್ಷಿಯಾಗಿದ್ದಾರೆ.