ಫಲ ನೀಡದ ಬೋರ್ಡೋ ದ್ರಾವಣ! : ನಿರಂತರ ಮಳೆಗೆ ಕೊಳೆರೋಗ ಉಲ್ಬಣ : ಅಡಕೆ ಕೃಷಿಕರು ಅತಂತ್ರ

ಸಂದೀಪ್ ಸಾಲ್ಯಾನ್ ಬಂಟ್ವಾಳ

ಈ ವರ್ಷ ಅವಧಿಗಿಂತ ಮುಂಚೆಯೇ ಮಳೆ ಆರಂಭವಾಗಿ ಬಳಿಕ ಎಡೆಬಿಡದೆ ಒಂದೂವರೆ ತಿಂಗಳ ಕಾಲ ಸುರಿದ ಪರಿಣಾಮ ರೈತರು ವಾಣಿಜ್ಯ ಬೆಳೆಯಾಗಿ ಅವಲಂಬಿಸಿಕೊಂಡಿರುವ ಅಡಕೆಗೆ ಕೆಲವೆಡೆ ಕೊಳೆರೋಗ ಬಾಧಿಸಿದೆ. ಉರುವೆಯೊಂದಿಗೆ ಫಸಲಿಗೆ ಬರುವ ಹಂತದ ದೊಡ್ಡ ಅಡಕೆಗಳು ಮರದಿಂದ ಉದುರಿ ಬೀಳುತ್ತಿರುವುದು ಹಾಗೂ ಮಳೆ ಆರಂಭವಾದ ಬಳಿಕ ಅರಳಿದ ಹಿಂಗಾರಗಳೆಲ್ಲಾ ಕೊಳೆಯುತ್ತಿರುವುದು ರೈತರ ಆತಂಕವನ್ನು ಹೆಚ್ಚಿಸಿದೆ.

ಬಿಸಿಲಿನಿಂದ ಬಿಸಿಯೇರುವ ಮೇ ತಿಂಗಳಿನ ಮಧ್ಯದಿಂದಲೇ ಈ ವರ್ಷದ ಮಳೆಗಾಲ ಆರಂಭಗೊಂಡು ನಿರಂತರವಾಗಿ ಒಂದೂವರೆ ತಿಂಗಳ ಕಾಲ ಸುರಿದಿದೆ. ಬಿಸಿಲಿನ ತಾಪಕ್ಕೆ ಅಡಕೆ ಮರಗಳಿಗೆ ನೀರು ಕಡಿಮೆಯಾಗುವ ಸಮಯದಲ್ಲಿ ಉತ್ತಮ ಮಳೆಯಾದಾಗ ಕೆಲ ಭಾಗದಲ್ಲಿ ಕೃಷಿಕರು ಖುಷಿಪಟ್ಟಿದ್ದರು. ಆದರೆ ಅಕಾಲಿಕ ಮಳೆಯ ದುಷ್ಪರಿಣಾಮ ಈಗ ಕೃಷಿಕರನ್ನು ಕಾಡುತ್ತಿದೆ. ಬಂಟ್ವಾಳ ತಾಲೂಕಿನ ಕೆಲ ಭಾಗದ ಅಡಕೆ ತೋಟಗಳಲ್ಲಿ ಅಡಕೆ ಉದುರಿ ಬುಡ ಸೇರಿದೆ

ದ್ರಾವಣ ಸಿಂಪಡಣೆಗೆ ಬಿಸಿಲಿನ ಕೊರತೆ: ಅಡಕೆ ಉದುರುವ ರೋಗದಿಂದ ಫಸಲನ್ನು ರಕ್ಷಿಸಲು ರೈತರು ಬೋರ್ಡೋ ದ್ರಾವಣ ಸಿಂಪಡಿಸುವುದು ಸಾಮಾನ್ಯ. ಮೈಲುತುತ್ತು ಹಾಗೂ ಸುಣ್ಣ ಮಿಶ್ರಣದ ಬೋರ್ಡೋ ದ್ರಾವಣ ಸಿಂಪಡಿಸಬೇಕಾದರೆ ಬಿಸಿಲಿನ ಅಗತ್ಯವಿದೆ. ಆದರೆ ಈ ಸಾಲಿನಲ್ಲಿ ಮಳೆ ಆರಂಭವಾದ ಬಳಿಕ ಸರಿಯಾದ ಬಿಸಿಲು ಕಾಣಿಸದೆ ಹೆಚ್ಚಿನ ರೈತರಿಗೆ ಸಕಾಲದಲ್ಲಿ ಬೋರ್ಡೋ ದ್ರಾವಣ ಸಿಂಪಡಿಸಲು ಸಾಧ್ಯವಾಗಿಲ್ಲ. ಸ್ವಲ್ಪ ಬಿಸಿಲು ಬಂತೆಂದು ಬೋರ್ಡೋ ಸಿಂಪಡಿಸಿದರೆ ಸ್ವಲ್ಪ ಹೊತ್ತಿನಲ್ಲಿಯೇ ಕಾರ್ಮೋಡ ಕವಿದು ಮಳೆ ಸುರಿದು ಸಿಂಪಡಿಸಿದ ದ್ರಾವಣವೆಲ್ಲಾ ನೀರಿನಲ್ಲಿ ಹರಿದು ಹೋಗಿದೆ. ಸಕಾಲದಲ್ಲಿ ಕಾರ್ಮಿಕರು ಸಿಗದೆಯೂ ದೊಡ್ಡ ದೊಡ್ಡ ತೋಟಗಳಿಗೆ ಔಷಧ ಸಿಂಪಡಿಸಲು ಸಾಧ್ಯವಾಗದೆ ಅಡಕೆ ಉದುರಲಾರಂಭಿಸಿದೆ. ಕೊಳೆರೋಗ ವ್ಯಾಪಕವಾಗಿ ಹರಡಿದ್ದಲ್ಲಿ ಅದು ಫಸಲನ್ನು ಮಾತ್ರವಲ್ಲದೆ ಮರವನ್ನು ಆಪೋಶನಗೈಯ್ಯುವ ಸಾಧ್ಯತೆ ಇದೆ. ಇದು ಮತ್ತಷ್ಟು ಕೃಷಿಕರಿಗೆ ನಷ್ಟ ಉಂಟು ಮಾಡಲಿದೆ.

https://www.vijayavani.net/mrpl-toxic-gas-leak-kills-two-employees

https://www.vijayavani.net/puttur-loka-adalath