ಪ್ಲಾಸ್ಟಿಕ್​ ಬಿಡಿ ಬಟ್ಟೆ ಬ್ಯಾಗ್​ ಹಿಡಿ

ರಾಮನಗರ: ಪ್ಲಾಸ್ಟಿಕ್​ ಕವರ್​ಗಳ ಬಳಕೆ ಕಡಿವಾಣ ಹಾಕುವ ಮೂಲಕ ಸ್ವಚ್ಛ ರಾಮನಗರ ಕನಸು ಕಂಡಿರುವ ನಗರಸಭೆ, ಮನೆ ಮನೆಗೆ ಬಟ್ಟೆ ಬ್ಯಾಗ್​ ವಿತರಿಸಿ ಜನರಿಗೆ ಜಾಗೃತಿ ಮೂಡಿಸಲು ಮುಂದಾಗಿದೆ.

ಹಲವಾರು ಪ್ರಯತ್ನಗಳ ಹೊರತಾಗಿಯೂ ಪ್ಲಾಸ್ಟಿಕ್​ ಬಳಕೆಗೆ ಕಡಿವಾಣ ಬಿದ್ದಿಲ್ಲ, ಈ ಹಿನ್ನೆಲೆಯಲ್ಲಿ ಬಟ್ಟೆ ಬ್ಯಾಗ್​ ವಿತರಿಸಿ ಜಾಗೃತಿ ಮೂಡಿಸಿದರೆ ಇದಕ್ಕೆ ಅಂತ್ಯವಾಡಬಹುದು ಎನ್ನುವ ಲೆಕ್ಕಾಚಾರದಲ್ಲಿ ಬಟ್ಟೆ ಬ್ಯಾಗ್​ ನೀಡಲು ನಗರಸಭೆ ಮುಂದಾಗಿದೆ. ನಗರಸಭೆ ವ್ಯಾಪ್ತಿಯಲ್ಲಿ ಸುಮಾರು 25 ಸಾವಿರ ಮನೆಗಳಿದ್ದು, ಪ್ರಥಮ ಹಂತದಲ್ಲಿ 15 ಸಾವಿರ ಮನೆಗಳಿಗೆ, ಎರಡನೇ ಹಂತದಲ್ಲಿ 10 ಸಾವಿರ ಮನೆಗಳಿಗೆ ಬ್ಯಾಗ್​ ವಿತರಣೆ ಗುರಿ ಹೊಂದಲಾಗಿದೆ.

ಮರುಬಳಕೆ ಸಾಧ್ಯ ಬಟ್ಟೆ ಬ್ಯಾಗ್​ ಮರುಬಳಕೆ ಮತ್ತು ಪ್ರಕೃತಿಯಲ್ಲಿ ಕರಗುವುದರಿಂದ ಇದರ ಬಗ್ಗೆ ಮಹಿಳೆಯರು ಮತ್ತು ಮಕ್ಕಳಲ್ಲಿ ಅರಿವು ಮೂಡಿಸುವುದರ ಜತೆಗೆ ಪ್ಲಾಸ್ಟಿಕ್​ ಬಳಕೆಯಿಂದ ಏನೆಲ್ಲಾ ತೊಂದರೆಗಳು ಆಗುತ್ತವೆ ಎನ್ನುವ ಬಗ್ಗೆಯೂ ಜಾಗೃತಿ ಮೂಡಿಸಲಾಗುತ್ತಿದೆ. ಇದಕ್ಕಾಗಿ 3 ವರ್ಷಗಳ ಅವಧಿಗೆ ಸ್ವಯಂ ಸೇವಾ ಸಮುದಾಯದ 16 ಮಹಿಳಾ ಕಾರ್ಯಕರ್ತರನ್ನು ನಗರಸಭೆ ನೇಮಕ ಮಾಡಿಕೊಂಡು, ಯಾರೂ ಪ್ಲಾಸ್ಟಿಕ್​ ಬಳಕೆಗೆ ಮುಖ ಮಾಡದಂತೆ ಬಟ್ಟೆ ಬ್ಯಾಗ್​ಗಳ ಉಪಯೋಗಗಳ ಬಗ್ಗೆ ಸಂಪೂರ್ಣ ಮಾತಿಯುಳ್ಳ ಕರಪತ್ರದ ಮೂಲಕ ತಿಳಿಹೇಳುವ ಪ್ರಯತ್ನ ಮಾಡಲಾಗುತ್ತಿದೆ ಎನ್ನುತ್ತಾರೆ ಪರಿಸರ ಇಂಜಿನಿಯರ್​ ಸುಬ್ರಹ್ಮಣಿ.

ದಾಳಿ, ದಂಡ ವಸೂಲಿ ಪ್ಲಾಸ್ಟಿಕ್​ ಬಳಕೆ ನಿಷೇಧದ ಹೊರತಾಗಿಯೂ ಚಾಲ್ತಿಯಲ್ಲಿದ್ದ ಪ್ಲಾಸ್ಟಿಕ್​ಅನ್ನು ಮುಟ್ಟುಗೋಲು ಹಾಕಿಕೊಂಡು ದಂಡ ವಿಧಿಸಲಾಗುತ್ತಿದೆ. ಕಳೆದ ಎರಡು ವರ್ಷಗಳಿಂದ ಸುಮಾರು 2 ಸಾವಿರ ಕೆ.ಜಿ. ಏಕಬಳಕೆ ಪ್ಲಾಸ್ಟಿಕ್​ ವಶಪಡಿಸಿಕೊಂಡು 2.62 ಲಕ್ಷ ರೂ. ದಂಡ ವಸೂಲಿ ಮಾಡಲಾಗಿದೆ ಎಂದು ನಗರಸಭೆ ಆರೋಗ್ಯ ಅಧಿಕಾರಿ ವಿಜಯಕುಮಾರ್​ ಮಾಹಿತಿ ನೀಡಿದ್ದಾರೆ. ಜತೆಗೆ ಒಂದು ಕೆ.ಜಿ.ಗಿಂತ ಕಡಿಮೆ ಪ್ಲಾಸ್ಟಿಕ್​ ದಾಸ್ತಾನು ಮಾಡಿದವರಿಗೆ 500, 10 ಕೆ.ಜಿ.ವರೆಗೆ 2 ಸಾವಿರ ರೂ., 50&100 ಕೆಜಿವರೆಗೆ 10 ಸಾವಿರ ರೂ., 100 ಕೆಜಿ ಮೇಲ್ಪಟ್ಟ ಪ್ಲಾಸ್ಟಿಕ್​ ದಾಸ್ತಾನಿಗೆ 40 ಸಾವಿರ ರೂ., ದಂಡ ವಿಧಿಸಲು ನಗರಸಭೆ ಮುಂದಾಗಿದೆ. ಇದರೊಂದಿಗೆ ಕಳೆದ 3 ತಿಂಗಳಿಂದ ರಾಮನಗರದಲ್ಲಿ ಉತ್ಪತ್ತಿಯಾದ 17 ಟನ್​ ಪ್ಲಾಸ್ಟಿಕ್​ ತ್ಯಾಜ್ಯವನ್ನು ಬಿಡದಿಯ ಕರ್ನಾಟಕ ಪವರ್​ ಕಾರ್ಪೋರೇಷನ್​ಗೆ ಕಳುಸಿದೆ.