ಗೂಗಲ್ನಲ್ಲಿ ಸೂರಿನ ಲೆಕ್ಕ: ಒಬ್ಬ ವ್ಯಕ್ತಿಗೆ ಕನಿಷ್ಠ 55 ಲೀಟರ್ನಂತೆ 365 ದಿನವೂ ನೀರು ಒದಗಿಸುವುದು ಯೋಜನೆಯ ಉದ್ದೇಶವಾಗಿದೆ. ಯೋಜನೆಯ ಶೇ. 37.5 ಕೇಂದ್ರದ ಪಾಲಾಗಿದ್ದು, ಶೇ. 37 ರಾಜ್ಯ ಸರ್ಕಾರ ನೀಡಲಿದೆ. ಶೇ. 15ರಷ್ಟನ್ನು ಗ್ರಾಮ ಪಂಚಾಯಿತಿ ಭರಣ ಮಾಡಬೇಕಿದ್ದು, ಇನ್ನುಳಿದ ಶೇ. 10ರಷ್ಟನ್ನು ಫಲಾನುಭವಿ ನೀಡಬೇಕು. ಈ ಹಿನ್ನೆಲೆಯಲ್ಲಿ ಮನೆಮನೆ ಸಮೀಕ್ಷೆ ನಡೆಸುವಂತೆ ಪುಣೆ ಮೂಲದ ಖಾಸಗಿ ಸಂಸ್ಥೆಯೊಂದಕ್ಕೆ ಗುತ್ತಿಗೆ ನೀಡಲಾಗಿತ್ತು. ಆದರೆ, ಖಾಸಗಿ ಸಂಸ್ಥೆಯ ಸಿಬ್ಬಂದಿ ಮನೆಮನೆಗೆ ಭೇಟಿ ನೀಡದೆ, ಗೂಗಲ್ ಮ್ಯಾಪ್ ಮೂಲಕ ಗ್ರಾಮದಲ್ಲಿ ಕಾಣುವ ಪ್ರತಿ ಸೂರಿನ ಲೆಕ್ಕ ಹಾಕಿ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಿದ್ದಾರೆ. ಇದರಲ್ಲಿ ಮನೆಗಳ ಜತೆಗೆ ಕೊಟ್ಟಿಗೆ, ಬಚ್ಚಲುಮನೆ, ಹುಲ್ಲಿನಮನೆ, ವಾಹನ ಶೆಡ್ಗಳನ್ನೂ ಮನೆ ಎಂದೇ ವರದಿಯಲ್ಲಿ ದಾಖಲಿಸಲಾಗಿದೆ. ಇದರಿಂದ ಗ್ರಾಮದಲ್ಲಿರುವ ವಾಸ್ತವಿಕ ಮನೆಗಳ ಸಂಖ್ಯೆ ಹಾಗೂ ಸಂಸ್ಥೆ ನೀಡಿದ ಮಾಹಿತಿ ನಡುವೆ ಅಜಗಜಾಂತರ ವ್ಯತ್ಯಾಸ ಕಾಣುತ್ತಿದೆ.
