30ರಂದು ಆಡು ಸಾಕಣೆ ಕೇಂದ್ರ ಲೋಕಾರ್ಪಣೆ : ಬೇಡಡ್ಕದಲ್ಲಿ ಸಚಿವೆ ಜೆ.ಚಿಂಜು ರಾಣಿ ಉದ್ಘಾಟನೆ : 22.75 ಎಕರೆ ಪ್ರದೇಶದಲ್ಲಿ ನಿರ್ಮಾಣ

ಮುಳ್ಳೇರಿಯ: ಬೇಡಡ್ಕ ಗ್ರಾಪಂ ಕಲ್ಲಳಿಯಲ್ಲಿ ರಾಜ್ಯ ಸರ್ಕಾರ ನಿರ್ಮಿಸಿರುವ ಹೈಟೆಕ್ ಆಡು ಸಾಕಣೆ ಕೇಂದ್ರವನ್ನು ಅ.30ರಂದು ಪಶುಸಂಗೋಪನೆ, ಡೇರಿ ಅಭಿವೃದ್ಧಿ ಮತ್ತು ಮೃಗಾಲಯ ಸಚಿವೆ ಜೆ.ಚಿಂಜು ರಾಣಿ ಲೋಕಾರ್ಪಣೆಗೊಳಿಸುವರು. ಬೇಡಡ್ಕ ಗ್ರಾಪಂ ವ್ಯಾಪ್ತಿಯ ಕಲ್ಲಳ್ಳಿಯಲ್ಲಿ 22.75 ಎಕರೆ ಪ್ರದೇಶದಲ್ಲಿ ಅತ್ಯಾಧುನಿಕ ಸೌಲಭ್ಯಗಳೊಂದಿಗೆ ಮೇಕೆ ಸಾಕಣೆ ಕೇಂದ್ರ ಕಾರ್ಯಾರಂಭಿಸಲಿದೆ.

ಹೈಟೆಕ್ ಮೇಕೆ ಸಾಕಣೆ ಕೇಂದ್ರವನ್ನು ಐದು ಹಂತಗಳಲ್ಲಿ ಪೂರ್ಣಗೊಳಿಸುವ ಗುರಿ ಹೊಂದಿದ್ದು, 2025-26ನೇ ಸಾಲಿನಲ್ಲಿ ಪೂರ್ಣಗೊಳ್ಳಲಿದೆ. ಮೇಕೆಗಳಿಗೆ ಮೇವು ನೀಡುವ ಉದ್ದೇಶದಿಂದ ಬೇಡಡ್ಕ ಗ್ರಾಪಂ ಅಡಿಯಲ್ಲಿ ಮಹಾತ್ಮ ಗಾಂಧಿ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಡಿಯಲ್ಲಿ ಸುಮಾರು ಒಂದು ಸಾವಿರ ಹಲಸಿನ ಸಸಿಗಳು ಮತ್ತು ವಿವಿಧ ರೀತಿಯ ಮೇವಿನ ಹುಲ್ಲುಗಳನ್ನು 7 ಎಕರೆ ಜಾಗದಲ್ಲಿ ಬೆಳೆಸಲಾಗಿದೆ. ಬೆಳೆಗಳಿಗೆ ನೀರಾವರಿಗಾಗಿ ಪಶುಸಂಗೋಪನಾ ಇಲಾಖೆ 90,000 ರೂ. ಮೌಲ್ಯದ ನೀರಾವರಿ ಸೌಲಭ್ಯ ಸಿದ್ಧಪಡಿಸಿದೆ.

ಐದು ಬ್ಲಾಕ್‌ಗಳಲ್ಲಿ ಸಾವಿರ ಮೇಕೆ ಸಾಕಣೆ

2016-17ನೇ ಸಾಲಿನಲ್ಲಿ ಕಂದಾಯ ಇಲಾಖೆಯಡಿಯಲ್ಲಿ 22.75 ಎಕರೆ ವಿಸ್ತೀರ್ಣದ ಭೂಮಿಯಲ್ಲಿ ಆವರಣ ಗೋಡೆ ಮತ್ತು ಕಚೇರಿ ಕಟ್ಟಡ ನಿರ್ಮಾಣ ಸೇರಿದಂತೆ ನಿರ್ಮಾಣವನ್ನು ಪಶುಸಂಗೋಪನಾ ಇಲಾಖೆ ವಹಿಸಿಕೊಂಡಿತ್ತು. ವಿವಿಧ ಯೋಜನೆಗಳ ಮೂಲಕ ಸಿಗಬೇಕಿದ್ದ ಕೇಂದ್ರ ಪಾಲು ಸಿಗದೆ ಚಟುವಟಿಕೆಗಳಿಗೆ ಅಡಚಣೆಯಾಗಿತ್ತು. ಪ್ರಸ್ತುತ ಪಶುಸಂಗೋಪನಾ ಇಲಾಖೆ ಮತ್ತು ಕಾಸರಗೋಡು ಅಭಿವೃದ್ಧಿ ಪ್ಯಾಕೇಜ್ ಜಂಟಿಯಾಗಿ ಅನುಷ್ಠಾನಗೊಳಿಸುತ್ತಿವೆ. ಐದು ಬ್ಲಾಕ್‌ಗಳಲ್ಲಿ ಸಾವಿರ ಮೇಕೆ ಸಾಕಬಹುದಾದ ಹೈಟೆಕ್ ಮೇಕೆ ಸಾಕಣೆ ಕೇಂದ್ರದ ಮೊದಲ ಹಂತವಾಗಿ, ಕಾಸರಗೋಡು ಅಭಿವೃದ್ಧಿ ಪ್ಯಾಕೇಜ್ ಸಹಾಯದಿಂದ 200 ಮೇಕೆಗಳಿಗೆ ಒಂದು ಬ್ಲಾಕ್ ಪೂರ್ಣಗೊಂಡಿದೆ. 10 ಅಡಿ ಎತ್ತರದ ಶೆಡ್‌ನಲ್ಲಿ 190 ಹೆಣ್ಣು ಮೇಕೆಗಳು ಮತ್ತು 10 ಗಂಡು ಮೇಕೆಗಳನ್ನು ಸಾಕಣೆ ಮಾಡುವ ವ್ಯವಸ್ಥೆ ಪೂರ್ಣಗೊಂಡಿವೆ.

https://www.vijayavani.net/kasaragod-gidda-brings-in-revenue-bela-cattle-breeding-center-earns-rs-16-lakh

https://www.vijayavani.net/symposium-4