ಸೌರಶಕ್ತಿ ಉತ್ತೇಜನಕ್ಕೆ ಜಾಗತಿಕ ಸಮಾವೇಶ: ಮಾರಿಷಸ್​ನಲ್ಲಿ ಆಯೋಜನೆ, ಏಷ್ಯಾ -ಅಪಾಕ್ ವಲಯದ 35 ಸ್ಟಾರ್ಟಪ್​ಗಳು ಭಾಗಿ | Solar energy

ಮೋಕಾ (ಮಾರಿಷಸ್): ಸೌರಶಕ್ತಿ ( Solar energy ) ಮತ್ತು ನವೀಕರಿಸಬಹುದಾದ ಇಂಧನ ಕ್ಷೇತ್ರಕ್ಕೆ ಬಲ ತುಂಬುವ ಉದ್ದೇಶದಿಂದ ಮಾರಿಷಸ್​ನಲ್ಲಿ ಇತ್ತೀಚೆಗೆ ಜಾಗತಿಕ ಮಟ್ಟದ ಸಮಾವೇಶ ನಡೆಯಿತು. ಇಂಟರ್​ನ್ಯಾಷನಲ್ ಸೋಲಾರ್ ಅಲಯನ್ಸ್ (ಐಎಸ್​ಎ) ಮತ್ತು ಮಾರಿಷಸ್​ನ ಉದ್ಯಮ ರಂಗದ ಪ್ರಾತಿನಿಧಿಕ ಸಂಸ್ಥೆಯಾದ ಬಿಜಿನೆಸ್ ಮಾರಿಷಸ್ (ಬಿಎಂ) ಸಹಯೋಗದಲ್ಲಿ ನಡೆದ ಸೋಲಾರ್​ಎಕ್ಸ್ ಆಕ್ಸಲೇಟರ್ ಪ್ರೋಗ್ರಾಂ ಎಂಬ ಹೆಸರಿನ ಈ ಕಾರ್ಯಕ್ರಮದಲ್ಲಿ ಏಷ್ಯಾ ಮತ್ತು ಎಪಿಎಸಿ (ಅಪಾಕ್) ವಲಯದ 35 ಸ್ಟಾರ್ಟಪ್​ಗಳು ಭಾಗವಹಿಸಿದ್ದವು.

ಸೌರಶಕ್ತಿ ಮತ್ತು ನವೀಕರಿಸಬಹುದಾದ ಇಂಧನ ತಂತ್ರಜ್ಞಾನಗಳ ಮೇಲೆ ಗಮನ ಕೇಂದ್ರೀಕರಿಸಿ ಸ್ಟಾರ್ಟಪ್​ಗಳ ಬೆಂಬಲ, ಸಬಲೀಕರಣ ಮತ್ತು ಮಾರ್ಗದರ್ಶನ ಈ ಕಾರ್ಯಕ್ರಮದ ಗುರಿಯಾಗಿದೆ. ಸೌರ ಇಂಧನ ಕ್ಷೇತ್ರದಲ್ಲಿ ಆವಿಷ್ಕಾರಕ ಮತ್ತು ಕಡಿಮೆ ವೆಚ್ಚದ ಪರಿಹಾರಗಳನ್ನು ಕಂಡುಕೊಳ್ಳುವ ಸ್ಟಾರ್ಟಪ್​ಗಳನ್ನು ಗುರುತಿಸಿ ಅವುಗಳಿಗೆ ಬೆಂಬಲ ನೀಡುವಂತೆ ಈ ಕಾರ್ಯಕ್ರಮವನ್ನು ವಿನ್ಯಾಸಗೊಳಿಸಲಾಗಿದೆ.

ಕಾರ್ಬನ್- ತಟಸ್ಥ ಆರ್ಥಿಕತೆ: ಪರಿಸರ ರಕ್ಷಣೆಗಾಗಿ ಹಾಗೂ ಕಾರ್ಬನ್-ತಟಸ್ಥ ಆರ್ಥಿಕತೆಯತ್ತ ಜಗತ್ತನ್ನು ಪರಿವರ್ತಿಸುವುದು ಐಎಸ್​ಎ ಮತ್ತು ಬಿಎಂ ನಡುವಿನ ಸಹಕಾರದ ಉದ್ದೇಶವಾಗಿದೆ. ನವೀಕರಿಸಬಹುದಾದ ಇಂಧನವನ್ನು ಅಳವಡಿಸಿಕೊಂಡು ಜಾಗತಿಕ ಸುಸ್ಥಿರತೆ ಗುರಿಗಳನ್ನು (ಜಿಎಸ್​ಡಿ) ಸಾಧಿಸಲು ನಿರ್ಣಾಯಕವಾದ ಆವಿಷ್ಕಾರಗಳ ಮೇಲೆ ಗಮನ ಕೇಂದ್ರೀಕರಿಸಲಾಗುತ್ತದೆ.

ಭಾರತ-ಫ್ರಾನ್ಸ್​ನಿಂದ ಆರಂಭ

2015ರಲ್ಲಿ ಪ್ಯಾರಿಸ್​ನಲ್ಲಿ ನಡೆದ ಸಿಒಪಿ21 ಶೃಂಗಸಭೆಯಲ್ಲಿ ಭಾರತ ಮತ್ತು ಫ್ರಾನ್ಸ್ ಜತೆಯಾಗಿ ಜಾಗತಿಕ ಉಪಕ್ರಮವಾದ ಇಂಟರ್​ನ್ಯಾಷನಲ್ ಸೋಲಾರ್ ಅಲಯನ್ಸ್ (ಐಎಸ್​ಎ) ಅನ್ನು ಆರಂಭಿಸಿದ್ದವು. 123 ದೇಶಗಳು ಅದಕ್ಕೆ ಸಹಿ ಹಾಕಿವೆ.

ಇದನ್ನೂ ಓದಿ: ನಿಮ್ಮ ಮನೆಯಿಂದ ಈ 3 ವಾಸನೆ ಬಂದ್ರೆ ಹಾವುಗಳು ಅಲ್ಲಿಗೆ ಬರುವುದು ಖಚಿತ: ಹೀಗಾಗಿ ಎಚ್ಚರವಿರಲಿ! Snakes

ಐಎಸ್​ಎ ಬದ್ಧತೆ

ಸೌರ ಇಂಧನವನ್ನು ಹರಡುವ ತನ್ನ ಯೋಜನೆ ಭಾಗವಾಗಿ ಯುವಜನರ ಸಬಲೀಕರಣ, ಆವಿಷ್ಕಾರಕ್ಕೆ ಉತ್ತೇಜನ ನೀಡಿಕೆ ಹಾಗೂ ಉದ್ಯೋಗಗಳ ಸೃಷ್ಟಿಗೆ ಐಎಸ್​ಎ ಬದ್ಧವಾಗಿದೆ ಎಂದು ಮಹಾ ನಿರ್ದೇಶಕ ಆಶಿಶ್ ಖನ್ನಾ ಹೇಳಿದರು. ಆಫ್ರಿಕಾ ಮತ್ತು ಏಷ್ಯಾ ಪೆಸಿಫಿಕ್ ವಲಯಗಳ ಉದ್ಯಮಿಗಳು ಅಮೂಲ್ಯ ತಂತ್ರಜ್ಞಾನಗಳ ವರ್ಗಾವಣೆಗೆ ಮಹತ್ವದ ಕೊಡುಗೆ ನೀಡುವ ವಿಶ್ವಾಸವಿದೆ. ಇದರಿಂದ ನಾನಾ ದೇಶಗಳಲ್ಲಿ ಇಂಧನ ಪರಿವರ್ತನೆಗೆ ಸಹಾಯವಾಗಲಿದೆ. ನೈಜೀರಿಯಾದಲ್ಲಿ ಅಭಿವೃದ್ಧಿಪಡಿಸಿದ ಪರಿಹಾರವೊಂದನ್ನು ಭಾರತದಲ್ಲಿ ಅಳವಡಿಸಿಕೊಳ್ಳಬಹುದು. ಫಿಜಿಯ ಒಂದು ಸೌರ ಅಪ್ಲಿಕೇಶನ್ ಪೆಸಿಫಿಕ್ ವಲಯದ ಎಲ್ಲ ದ್ವೀಪಗಳಲ್ಲಿ ಅಳವಡಿಸಲು ಅರ್ಹವಾಗಿವೆ ಎಂದರು.

ಭಾರತದಲ್ಲಿ ಕೇಂದ್ರ ಕಚೇರಿ

2017ರ ಡಿ.6ರಂದು 15 ದೇಶಗಳು ಐಎಸ್​ಎ ಚೌಕಟ್ಟು ಒಡಂಬಡಿಕೆಗೆ ಸಹಿ ಹಾಕುವ ಮೂಲಕ, ಐಎಸ್​ಎ ಭಾರತದಲ್ಲಿ ಕೇಂದ್ರ ಕಚೇರಿ ಹೊಂದಿದ ಪ್ರಥಮ ಅಂತಾರಾಷ್ಟ್ರೀಯ ಅಂತರ್​ಸರ್ಕಾರಿ ಸಂಸ್ಥೆಯಾಗಿದೆ. ಐಎಸ್​ಎ ಬಹುಪಕ್ಷೀಯ ಅಭಿವೃದ್ಧಿ ಬ್ಯಾಂಕ್​ಗಳು, ಅಭಿವೃದ್ಧಿ ಹಣಕಾಸು ಸಂಸ್ಥೆಗಳು, ಖಾಸಗಿ ಮತ್ತು ಸಾರ್ವಜನಿಕ ವಲಯದ ಸಂಸ್ಥೆಗಳು ಮತ್ತಿತರ ಅಂತಾರಾಷ್ಟ್ರೀಯ ಸಂಸ್ಥೆಗಳ ಜತೆ ಪಾಲುದಾರಿಕೆ ಹೊಂದಿದೆ.

https://www.vijayavani.net/do-you-know-what-happens-inside-your-stomach-if-you-accidentally-eat-a-seed-with-a-watermelon