ಕಬ್ಬಿನ ಕಾರ್ಖಾನೆಗಳಲ್ಲಿ ಹಾಗೂ ಜೋಳದ ಕಾರ್ಖಾನೆಗಳಲ್ಲಿ ಎಥೆನಾಲ್ ಉತ್ಪತ್ತಿಯಾಗುತ್ತದೆ. ಅದನ್ನು ಮದ್ಯ ತಯಾರಿಕೆಗೆ ಬಳಸಬಹುದು. ಆದರೆ, ಅದರ ಸಾಗಣೆಗೆ ಅಬಕಾರಿ ಇಲಾಖೆಯ ಅನುಮತಿ ಬೇಕು. ಅದರ ಸಾಗಣೆಯಿಂದ ಹಿಡಿದು ಮದ್ಯ ತಯಾರಿಕೆಯವರೆಗೆ ನಿಗಾ ಇರುತ್ತದೆ. ಅದರಿಂದ ಇಂತಿಷ್ಟೇ, ಇಂಥದ್ದೇ ಮದ್ಯ ತಯಾರು ಮಾಡಲಾಗಿದೆ ಎಂದು ಘೋಷಣೆ ಮಾಡಬೇಕು. ಇದರಿಂದ ಮದ್ಯ ಕಂಪನಿಗಳಿಗೆ ಆ ಮೂಲಕ ಎಥೆನಾಲ್ ಪೂರೈಕೆದಾರರಿಗೆ ಸೀಮಿತ ಲಾಭವಾಗುತ್ತದೆ. ಆದರೆ, ವಿಕೃತಗೊಳಿಸಿದ ಎಂದರೆ ಮದ್ಯ ತಯಾರಿಕೆಗೆ ಯೋಗ್ಯವಲ್ಲದ (ನಾನ್ ಪೋಟೆಬಲ್) ಡಿ-ನ್ಯಾಚರ್ಡ್ ಸ್ಪಿರಿಟ್ ಎಂದರೆ ಅಬಕಾರಿ ಇಲಾಖೆಯ ವ್ಯಾಪ್ತಿಗೆ ಬರುವುದಿಲ್ಲ. ಅದನ್ನು ನೇಲ್ ಪಾಲೀಶ್, ಸೆನಿಟೈಸರ್ ಸೇರಿ ಇತರ ವಿವಿಧ ಕೈಗಾರಿಕೆಗಳಿಗೆ ಬಳಸಲಾಗುತ್ತದೆ. ಹಾಗೆ ಕೈಗಾರಿಕೆಗೆ ಎಂಬ ದಾಖಲೆಯೊಂದಿಗೆ ಕೊಂಡೊಯ್ದು, ಅದನ್ನು ಮದ್ಯ ತಯಾರಿಕೆಗೆ ಬಳಸಲಾಗುತ್ತಿದೆ. ನಕಲಿ ಮದ್ಯಗಳನ್ನು ತಯಾರಿಸಿ ದುಬಾರಿ ಬೆಲೆಗೆ ಮಾರಾಟ ಮಾಡಬಹುದಾಗಿದೆ ಎಂದು ಅಬಕಾರಿ ಜಂಟಿ ಆಯುಕ್ತ ಎ.ಎಲ್.ನಾಗೇಶ ತಿಳಿಸಿದರು.
