ನಾಲ್ಕರ ಕ್ರಾಸ್ ಅಪಘಾತದ ಸ್ಪಾಟ್

ಅಕ್ಕಿಆಲೂರ: ಉತ್ತರ ಕನ್ನಡ ಜಿಲ್ಲೆ, ಶಿವಮೊಗ್ಗಕ್ಕೆ ಸಂಪರ್ಕ ಕಲ್ಪಿಸುವ ಅಕ್ಕಿಆಲೂರ ಸಮೀಪದ ನಾಲ್ಕರ ಕ್ರಾಸ್​ನಲ್ಲಿ ಅಪಘಾತ ಹೆಚ್ಚುತ್ತಿದೆ. ವಾಹನಗಳ ವೇಗ ತಡೆಗೆ ವೈಜ್ಞಾನಿಕ ಹಂಪ್ಸ್, ಅಕ್ರಮಕ್ಕೆ ಬ್ರೇಕ್ ಹಾಕಲು ಚೆಕ್​ಪೊಸ್ಟ್ ಸೇರಿ ಸೌಲಭ್ಯ ಒದಗಿಸಲು ಸಾರ್ವಜನಿಕರಿಂದ ತೀವ್ರ ಒತ್ತಾಯ ಕೇಳಿಬರುತ್ತಿದೆ.

ಹಾವೇರಿ, ಧಾರವಾಡ, ಶಿವಮೊಗ್ಗ ಮತ್ತು ಉತ್ತರ ಕನ್ನಡ ಜಿಲ್ಲೆಗಳಿಗೆ ತೆರಳುವ ನಾಲ್ಕು ರಸ್ತೆಗಳು ಅಕ್ಕಿಆಲೂರ ಸಮೀಪದಲ್ಲಿ ಕೂಡಿವೆ. ಈ ಕ್ರಾಸ್​ನಲ್ಲಿ ಹಾವೇರಿಯಿಂದ ಶಿರಸಿಗೆ, ಹುಬ್ಬಳ್ಳಿಯಿಂದ ಶಿವಮೊಗ್ಗಕ್ಕೆ ವಾಹನಗಳು ವೇಗವಾಗಿ ಸಂಚರಿಸುತ್ತವೆ. ಆದರೆ, ವಾಹನಗಳ ವೇಗಕ್ಕೆ ತಡೆ ನೀಡಲು ಹಂಪ್ಸ್ ಇಲ್ಲದ ಕಾರಣ ನಿತ್ಯ ಅಪಘಾತ ಸಂಭವಿಸುತ್ತಿದೆ.

ನಾಲ್ಕರ ಕ್ರಾಸ್​ನಲ್ಲಿ ಕಳೆದ 15 ದಿನಗಳಲ್ಲಿ 10ಕ್ಕೂ ಹೆಚ್ಚು ಅಪಘಾತಗಳು ಸಂಭವಿಸಿವೆ. ಟ್ರ್ಯಾಕ್ಟರ್- ಬೈಕ್, ಲಾರಿ- ಕಾರ್ ಮತ್ತು ಬೈಕ್​ಗಳ ನಡುವೆ ಜರುಗಿದ ಅಪಘಾತಗಳಲ್ಲಿ ನಾಲ್ವರು ಮೃತಪಟ್ಟಿದ್ದಾರೆ.

ಬಸ್ ನಿಲ್ದಾಣ ನಿರ್ವಿುಸಲು ಆಗ್ರಹ

ಬಸ್​ಗಳನ್ನು ಬದಲಿಸುವ ಪ್ರಯಾಣಿಕರೇ ಅಧಿಕ ಸಂಖ್ಯೆಯಲ್ಲಿ ನಾಲ್ಕರ್ ಕ್ರಾಸ್​ಗೆ ಆಗಮಿಸುತ್ತಾರೆ. ಈ ಹಿನ್ನೆಲೆಯಲ್ಲಿ ಬಸ್​ಗಾಗಿ ಕಾಯುತ್ತಿರುವ ಪ್ರಯಾಣಿಕರಿಗೆ ಕುಳಿತುಕೊಳ್ಳಲು ಇದುವರೆಗೂ ಬಸ್ ನಿಲ್ದಾಣ ನಿರ್ವಿುಸಿಲ್ಲ. ಇದರಿಂದ ಪ್ರಯಾಣಿಕರು ಬೀಡಾ ಮತ್ತು ಚಹಾದಂಗಡಿಗಳಲ್ಲಿ ಕಾಯುವ ಪರಿಸ್ಥಿತಿ ನಿರ್ವಣವಾಗಿದೆ. ಮಾಜಿ ಸಿಎಂ ದಿ. ಎಸ್. ಬಂಗಾರಪ್ಪ ಹೆಸರಿನಲ್ಲಿರುವ ನಾಲ್ಕರ ಕ್ರಾಸ್​ನಲ್ಲಿ ಸುಸಜ್ಜಿತ ಬಸ್ ನಿಲ್ದಾಣ ನಿರ್ವಿುಸಲು ಅಧಿಕಾರಿಗಳ ಗಮನಹರಿಸಬೇಕು ಎಂದು ಪ್ರಯಾಣಿಕರು ಆಗ್ರಹಿಸಿದ್ದಾರೆ.

ಅಕ್ರಮ ತಡೆಗೆ ಚೆಕ್​ಪೋಸ್ಟ್ ಅಗತ್ಯ: ಅಕ್ಕಿಆಲೂರಿನಿಂದ 12 ಕಿಲೋ ಮೀಟರ್ ಶಿರಸಿ ರಸ್ತೆಯಲ್ಲಿ ಸಂಚರಿಸಿದರೆ ಉತ್ತರ ಕನ್ನಡ ಜಿಲ್ಲೆ, 15 ಕಿಲೋ ಮೀಟರ್ ಮರಕೊಳ್ಳಿ ಕಡೆಗೆ ಪ್ರಯಾಣ ಬೆಳೆಸಿದರೆ ಶಿವಮೊಗ್ಗ ಜಿಲ್ಲೆಯ ಪ್ರವೇಶವಾಗುತ್ತದೆ. ಈ ಭಾಗದಲ್ಲಿ ಅರಣ್ಯ ಪ್ರದೇಶವಿರುವುದರಿಂದ ಅಕ್ರಮ ಮತ್ತು ಅನೈತಿಕ ಚಟುವಟಿಕೆಗೆ ಹೇಳಿ ಮಾಡಿಸಿದ ತಾಣದಂತಾಗಿದೆ. ಅಕ್ರಮ ತಡೆಯಲು ನಾಲ್ಕರ ಕ್ರಾಸ್​ನಲ್ಲಿ ಪೊಲೀಸ್ ಇಲಾಖೆಯಿಂದ ಚೆಕ್​ಪೋಸ್ಟ್ ನಿರ್ವಣವಾಗಬೇಕಿದೆ.