ಕ್ಯಾಲಗೊಂಡ ಗ್ರಾಮದ ಕೃಷಿಕ ಕುಟುಂಬದಲ್ಲಿ 1964ರಲ್ಲಿ ಜನಿಸಿದ ಬಸವರಾಜ, ಗ್ರಾಮದಲ್ಲಿ ಪ್ರಾಥಮಿಕ ಶಿಕ್ಷಣ ಹಾಗೂ ಹುಬ್ಬಳ್ಳಿಯ ನೆಹರು ಕಾಲೇಜಿನಲ್ಲಿ ಪದವಿ ಪಡೆದಿದ್ದಾರೆ. ಬಸವರಾಜ ಅವರ ಪಾಲಕರೂ ಜಾನಪದ ಕಲಾವಿದರು. ಸೋಬಾನ ಪದ ಹಾಡುವುದಲ್ಲಿ ತಾಯಿ ಗೌರಮ್ಮ ಗ್ರಾಮದಲ್ಲಿ ಹೆಸರುವಾಸಿಯಾಗಿದ್ದರು. ತಂದೆ ತಿರಕಪ್ಪ ಅವರು ಕೃಷಿ ಕೆಲಸದ ಜತೆಗೆ ಬಿಡುವಿನ ವೇಳೆಯಲ್ಲಿ ಗ್ರಾಮದ ಎಲ್ಲಮ್ಮ, ಉಡಚಮ್ಮ ದೇವಸ್ಥಾನದಲ್ಲಿ ಭಜನೆ ಪದಗಳನ್ನು ಹಾಡುತ್ತಿದ್ದರು. ತಂದೆಯ ಜತೆಗೆ ಭಜನೆಗೆ ಹೋಗುತ್ತಿದ್ದ ಬಸವರಾಜ, ಆಗಿನಿಂದಲೇ ತತ್ವಪದಗಳ ಬಗ್ಗೆ ಆಸಕ್ತಿ ಬೆಳೆಸಿಕೊಂಡಿದ್ದರು. ಪ್ರಾಥಮಿಕ ಶಿಕ್ಷಣ ಹಂತದಲ್ಲೇ ಶರೀಫರ ಮತ್ತು ಕನಕದಾಸರ ತತ್ವಪದಗಳನ್ನು ಹಾಡಲು ಆರಂಭಿಸಿದ ಬಸವರಾಜ, ಪದವಿಯ ನಂತರ ಕೃಷಿ ಜತೆಗೆ ಹಾಡುಗಾರಿಕೆಯನ್ನು ಪ್ರವೃತ್ತಿಯಾಗಿ ಬೆಳೆಸಿಕೊಂಡರು. ಅಲ್ಲದೆ, ಜಾನಪದ ಕಲಾ ತಂಡ ಕಟ್ಟಿಕೊಂಡು ನಾಡಿನಾದ್ಯಂತ ಹಾಡುಗಾರಿಕೆ ಮುಂದುವರಿಸಿದ್ದಾರೆ.
