ನೈತಿಕ ಪೊಲೀಸ್​ಗಿರಿ ಮಹಿಳೆ ಸೇರಿ ಐವರ ಬಂಧನ

ಕನಕಪುರ: ಅನ್ಯಕೋಮಿನ ಪುರುಷನೊಂದಿಗೆ ತೆರಳುತ್ತಿದ್ದಳೆಂದು ಮಹಿಳೆ ಹಾಗೂ ಪುರುಷನ ತಲೆ ಬೋಳಿಸಿ, ಹಲ್ಲೆ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಗರ ಪೊಲೀಸರು ಮಹಿಳೆ ಸೇರಿ ಐವರನ್ನು ವಶಕ್ಕೆ ಪಡೆದು, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.

ಇಲ್ಲಿನ ಕಾಲಕ್​ ನಗರದ ನಿವಾಸಿಗಳಾದ ಸುಹೇಲ್​ಶರೀಫ್ (28), ಶೇಕ್​ ಖಲೀಲ್​ (24) ಸೈಯದ್​ ನವಾಬ್​(38) ನಯಾಜ್​(20) ಹಾಗೂ ಶಮೀನ್​(40) ಬಂಧಿತರು.

ಇಂದಿರಾ ನಗರದಲ್ಲಿ ಅನ್ಯಕೋಮಿನ ಪುರುಷನೊಂದಿಗೆ ಅನೈತಿಕ ಸಂಬಂಧ ಇಟ್ಟುಕೊಂಡಿದ್ದಾಳೆಂದು ಹಲವಾರು ಬಾರಿ ಗಲಾಟೆ, ನ್ಯಾಯ ಪಂಚಾಯಿತಿಗಳು ನಡೆದಿದ್ದವಾದರೂ ಶನಿವಾರ ಸಂಜೆ ಕಾಲಕ್​ ನಗರದಲ್ಲಿ ಮಹಿಳೆ ಹಾಗೂ ಪುರುಷ ಇಬ್ಬರೂ ತೆರಳುತ್ತಿದ್ದ ವೇಳೆ ಅವರನ್ನು ತಡೆದ ಸುಹೇಲ್​ ಶರೀಫ್, ಶೇಕ್​ ಖಲೀಲ್​, ಸೈಯದ್​ ನವಾಬ್​, ನಯಾಜ್​ ಹಾಗೂ ಶಮೀನ್​ ಸಾರ್ವಜನಿಕವಾಗಿ ಹಲ್ಲೆ ನಡೆಸಿದ್ದಲ್ಲದೆ, ತಲೆ ಬೋಳಿಸಿ ನೈತಿಕ ಪೊಲೀಸ್​ಗಿರಿ ಪ್ರದರ್ಶಿಸಿ ಪರಾರಿಯಾಗಿದ್ದರು. ಈ ಸಂಬಂಧ ನಗರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದರು. ಸದ್ಯ ಆರೋಪಿಗಳನ್ನು ನ್ಯಾಯಾಲಯ ಬಂಧನಕ್ಕೆ ಒಪ್ಪಿಸಿದ್ದಾರೆ.