ನೀರಿನ ಬರ ತಲೆದೋರಿದಾಗ ಪಂಚಾಯಿತಿ ಆಡಳಿತ ಕೃಷಿಕರ ಮೊರೆ ಹೋಯಿತು. ರಂಜಾನ್ ತಿಂಗಳಲ್ಲಿ ಮಸೀದಿ ಮತ್ತು ಆಸುಪಾಸಿನ ಮನೆಗಳಿಗೆ ಲೀಲಾಧರ ಪೂಜಾರಿ ಮಜಿಕಟ್ಟ ಮತ್ತು ವಿಲಿಯಂ ಡಿಸೋಜ ಹಳೆಕೋಟೆ ತಮ್ಮ ಕೊಳವೆ ಬಾವಿ ಸಂಪರ್ಕವನ್ನು ಪಂಚಾಯಿತಿ ಪೈಪ್ಲೈನ್ಗೆ ನೀಡಿ ಸಹಕರಿಸಿದರು.
ಇತರ ಭಾಗದಲ್ಲೂ ನೀರಿನ ಸಮಸ್ಯೆ ಎದುರಾದಾಗ ಪಂಚಾಯಿತಿ ಸದಸ್ಯ ವಲೇರಿಯನ್ ಡಿಸೋಜ ತೋಟಕ್ಕೆ ಕೊಳವೆ ಬಾವಿ ನೀರು ಕಡಿತಗೊಳಿಸಿ ಪಂಚಾಯಿತಿ ಪೈಪ್ಲೈನ್ಗೆ ಸಂಪರ್ಕ ಕಲ್ಪಿಸಿದರು. ಆದರೂ ಎಲ್ಲ ಕಡೆ ನೀರು ಸರಬರಾಜು ಅಸಾಧ್ಯವೆನಿಸಿತು.
ಈ ಸಂದರ್ಭ ವಲೇರಿಯನ್ ಅವರೊಂದಿಗೆ ಇನ್ನೋರ್ವ ಸದಸ್ಯೆ ಚಂದ್ರಾವತಿ, ಪಂಚಾಯಿತಿ ಅಧ್ಯಕ್ಷೆ ಖಮರುನ್ನಿಸಾ, ಉಪಾಧ್ಯಕ್ಷ ಮಹಮ್ಮದ್ ಅನ್ಸಾರ್ ನೀರಿಗಾಗಿ ಪ್ರಯತ್ನಪಟ್ಟರು. ಅವರ ಮನವಿ ಮೇರೆಗೆ ವಿಲ್ಸನ್ ಲೋಬೊ ಕಂಬಳಪದವು, ಕಿರಣ್ ಶೆಟ್ಟಿ ಕಿಲ್ಲೂರು ತಮ್ಮ ಮನೆ ಮತ್ತು ಕೃಷಿಗೆ ಬಳಸುವ ಕೊಳವೆ ಬಾವಿಗಳಿಂದ ಅಗತ್ಯಕ್ಕಿಂತಲೂ ಹೆಚ್ಚು ನೀರು ಒದಗಿಸಿ ನೀರಿನ ಸಮಸ್ಯೆಗೆ ಪರಿಹಾರ ಕಲ್ಪಿಸಿದರು. ಸರಿಯಾಗಿ ಮಳೆಯಾಗದಿರುವುದರಿಂದ ಈ ಸಂಪರ್ಕ ಇನ್ನೂ ಕೆಲಕಾಲ ಮುಂದುವರಿಯುವ ಸಾಧ್ಯತೆ ಇದೆ. ಈ ಕೃಷಿಕರ ಸಕಾಲ ಸ್ಪಂದನೆಯನ್ನು ಜನರು ಶ್ಲಾಘಿಸುತ್ತಿದ್ದಾರೆ.
