ಸಾಂಪ್ರದಾಯಿಕ ಬಿತ್ತನೆ ಬೀಜ: ರಾಜ್ಯದಲ್ಲಿ ಈಗ ಬಿತ್ತನೆ ಬೀಜಕ್ಕೆ ಖಾಸಗಿ ಕಂಪನಿಗಳ ಮೇಲೆ ಅವಲಂಬನೆಯೇ ಹೆಚ್ಚಾಗಿದೆ. ಆ ಕಂಪನಿಗಳು ಸರ್ಕಾರದ ಸಬ್ಸಿಡಿಯನ್ನು ನುಂಗುವುದರ ಜತೆಗೆ ರೈತರಿಗೆ ಆಗುವ ನಷ್ಟಕ್ಕೆ ಉತ್ತರದಾಯಿಗಳಾಗಿರುವುದಿಲ್ಲ. ಔಷಧ ಮಾಫಿಯಾದ ರೀತಿಯಲ್ಲಿಯೇ ಬೀಜ ಮಾಫಿಯಾ ಸದ್ದಿಲ್ಲದೇ ಬೀಡು ಬಿಟ್ಟಿದೆ. ರಾಜ್ಯಕ್ಕೆ ಪ್ರತಿವರ್ಷ ಅಂದಾಜು 24 ಲಕ್ಷ ಟನ್ ಬಿತ್ತನೆ ಬೀಜ ಬೇಕು. ಅದರಲ್ಲಿ 3 ಲಕ್ಷ ಬೀಜ ನಿಗಮ ಉತ್ಪಾದನೆ ಮಾಡಿದರೆ, 5 ಲಕ್ಷ ಟನ್ ಸಬ್ಸಿಡಿಯಿಂದ ಬರುತ್ತದೆ. ಉಳಿದ 16 ಲಕ್ಷ ಟನ್ ಖಾಸಗಿ ಕಂಪನಿಗಳ ಮೇಲೆ ಅವಲಂಬಿಸಿರುತ್ತೇವೆ. ಸರ್ಕಾರದಿಂದಲೇ ಪ್ರಮಾಣೀಕೃತ ಬೀಜ ಸರಬರಾಜು ಮಾಡದಿರುವುದೇ ಕುಲಾಂತರಿ ಬೀಜಗಳ ಹಾವಳಿಗೆ ಕಾರಣವಾಗಿದೆ. ಬೇರೆ ಬೇರೆ ರಾಜ್ಯಗಳಲ್ಲಿ ಆಯಾ ರಾಜ್ಯದ ಸಂಸ್ಥೆಗಳೇ ಬಿತ್ತನೆ ಬೀಜ ಉತ್ಪಾದನೆ ಮಾಡುತ್ತಿರುವಾಗ ಕೃಷಿ ವಿವಿಗಳು, ಇಲಾಖೆಗೆ ಸೇರಿದ ಸಾವಿರಾರು ಎಕರೆ ಫಾರಂಗಳಲ್ಲಿ ಖುದ್ದಾಗಿ ಉತ್ತಮ ಬಿತ್ತನೆ ಬೀಜ ಉತ್ಪಾದನೆ ಏಕೆ ಸಾಧ್ಯವಿಲ್ಲವೆಂಬ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳಲು ಸರ್ಕಾರ ಮುಂದಾಗಿದೆ. ಸರ್ಕಾರ ಏನು ಮಾಡಲಿದೆ?: ನಾಗಮಂಗಲ ತಾಲೂಕಿನಲ್ಲಿ 780 ಎಕರೆ, ದಾವಣಗೆರೆ ಜಿಲ್ಲೆಯ ಕತ್ತಲಗೆರೆಯಲ್ಲಿ 300 ಎಕರೆ ಹೀಗೆ ಬಹುತೇಕ ತಾಲೂಕುಗಳಲ್ಲಿ ಇಲಾಖೆಯ ಭೂಮಿ ಪಾಳು ಬಿದ್ದಿದೆ. ವಾರ್ಷಿಕ 2 ಸಾವಿರ ಕೋಟಿ ರೂ.ಗಳನ್ನು ವೆಚ್ಚ ಮಾಡುವ ಮೂಲಕ ವಿಶ್ವವಿದ್ಯಾಲಯಗಳ ಸಂಶೋಧನೆಯನ್ನು ಬಳಸಿಕೊಂಡು 16 ಲಕ್ಷ ಟನ್ ಬಿತ್ತನೆ ಬೀಜವನ್ನು ಉತ್ಪಾದನೆ ಮಾಡಿ ರೈತರಿಗೆ ನೀಡುವುದು ಸರ್ಕಾರದ ಉದ್ದೇಶವಾಗಿದೆ. ಇದಕ್ಕಾಗಿ ಪಂಚ ವಾರ್ಷಿಕ ಯೋಜನೆಯನ್ನು ರೂಪಿಸಲಾಗುತ್ತದೆ. ಒಂದೇ ವರ್ಷಕ್ಕೆ 16 ಲಕ್ಷ ಟನ್ ಉತ್ಪಾದನೆ ಆಗುವುದಿಲ್ಲ. ಪ್ರತಿ ವರ್ಷ ಇಂತಿಷ್ಟು ಎಂಬಂತೆ ಉತ್ಪಾದನೆ ಮಾಡಲಾಗುತ್ತದೆ. ಆ ಮೂಲಕ ಖಾಸಗಿ ಲಾಬಿಯನ್ನು ಮಟ್ಟ ಹಾಕುವ ಉದ್ದೇಶವನ್ನು ಸರ್ಕಾರ ಹೊಂದಿದೆ.
