ತೇವಾಂಶ ಹೆಚ್ಚಳದಿಂದ ಅಳಿದುಳಿದ ಹೆಸರು ಹಾಳು

ನರೇಗಲ್ಲ:ಪಟ್ಟಣ ಸೇರಿ ಹೋಬಳಿಯಾದ್ಯಂತ ಕಳೆದೆರಡು ದಿನಗಳಿಂದ ಸುರಿಯುತ್ತಿರುವ ಜಿಟಿಜಿಟಿ ಮಳೆಗೆ ಜನಜೀವನ ಅಸ್ತವ್ಯಸ್ತವಾಗಿದೆ.

ಜಿಟಿಜಿಟಿ ಮಳೆಯ ಕಾರಣ ಜನರು ಮನೆಯಿಂದ ಹೊರಗೆ ಬಾರದ ಸ್ಥಿತಿ ನಿರ್ವಣವಾಗಿದೆ. ಪಟ್ಟಣ ಸೇರಿ ಗ್ರಾಮೀಣ ಭಾಗದ ರಸ್ತೆಗಳು ಕೆಸರುಮಯವಾಗಿ ಸಂಚಾರಕ್ಕೆ ತೊಂದರೆ ಉಂಟಾಗಿದೆ.

2 ಕೋಟಿ ಮೊತ್ತದ ದ್ವಿಪಥ ರಸ್ತೆ ನೀರಿನಲ್ಲಿ ಹೋಮ:
ಪಟ್ಟಣದ ಬಸ್ ನಿಲ್ದಾಣದಿಂದ ಶ್ರೀ ಅನ್ನದಾನ ವಿಜಯ ಕಾಲೇಜ್​ವರೆಗೆ ಲೋಕೋಪಯೋಗಿ ಇಲಾಖೆಯಿಂದ ನಿರ್ವಣವಾದ 2 ಕೋಟಿ ರೂ. ಗಳ ರಸ್ತೆ ಸಂಪೂರ್ಣ ಹಾಳಾಗಿದೆ. ಹೆಸರಿಗೆ ಮಾತ್ರ ದ್ವಿಪಥ ಇದಾಗಿದ್ದು, ಹಿರೇಕೆರೆಯ ಭಾಗದ ರಸ್ತೆಯು ತಗ್ಗು ಬಿದ್ದು ಕೆರೆಯಂತಾಗಿದೆ.
ನೆಗಡಿ, ಕೆಮ್ಮು, ಜ್ವರ ಉಲ್ಬಣ:
ಎರಡು ದಿನದಿಂದ ತಂಪಾದ ವಾತಾವರಣ ನಿರ್ವಣವಾಗಿದ್ದು, ನೆಗಡಿ, ಕೆಮ್ಮು ಮತ್ತು ಜ್ವರಗಳು ಸಾಮಾನ್ಯವಾಗಿದೆ. ಸರ್ಕಾರಿ ಆಸ್ಪತ್ರೆ ಸೇರಿ ಖಾಸಗಿ ಆಸ್ಪತ್ರೆಗಳು ರೋಗಿಗಳಿಂದ ತುಂಬಿ ತುಳುಕುತ್ತಿವೆ.
ಅಳಿದುಳಿದ ಹೆಸರು ಕೈ ಸೇರದ ಸ್ಥಿತಿ:
ಹೋಬಳಿಯ ಪ್ರಮುಖ ಮುಂಗಾರಿನ ವಾಣಿಜ್ಯ ಬೆಳೆ ಹೆಸರು ಬೆಳೆಗೆ ಸಕಾಲಕ್ಕೆ ಮಳೆಯಾಗದೇ ಸಾಕಷ್ಟು ಪ್ರಮಾಣದಲ್ಲಿ ನಾಶವಾಗಿದೆ. ಅಳಿದುಳಿದ ಬೆಳೆಯಾದರೂ ಕೈ ಹಿಡಿಬಹುದೆಂಬ ಆಸೆಯಲ್ಲಿದ್ದ ರೈತರಿಗೆ ಜಿಟಿಜಿಟಿ ಮಳೆ ಶಾಪವಾಗಿ ಪರಿಣಮಿಸಿದೆ. ತೇವಾಂಶದ ಹೆಚ್ಚಳದಿಂದಾಗಿ ಹೆಸರು ಬೆಳೆಗೆ ಹಳದಿ ರೋಗ ಕಾಣಿಸಿಕೊಂಡಿದ್ದು, ಪ್ರಸಕ್ತ ಸಾಲಿನ ಮುಂಗಾರಿನ ಸಂಪೂರ್ಣ ಬೆಳೆ ಹಾಳಾದಂತಾಗಿದೆ.