ಗ್ರಾಪಂ ಮಾಜಿ ಸದಸ್ಯ ಡಿ.ಡಿ.ಸತ್ಯನಾರಾಯಣ ಮಾತನಾಡಿ, ದೊಡ್ಡ ಕುರುಗೋಡು, ಹಾಲಗಾನಹಳ್ಳಿ, ಕದಿರೇನಹಳ್ಳಿ, ನಾಗಸಂದ್ರ, ಹುದೂತಿ, ಗೌಡಸಂದ್ರ, ವಿದುರಾಶ್ವತ್ಥ ಭಾಗಗಳಲ್ಲಿ ವಾಸವಿರುವ ನಾವು ಪುಣ್ಯ ಸ್ಥಳದಲ್ಲಿ ಹುಟ್ಟಿದ್ದು ಮಾಜಿ ಶಾಸಕರ ಅವಧಿಯಲ್ಲಿ ಚೆಕ್ಡ್ಯಾಂ ನಿರ್ಮಾಣ ಮಾಡಲಾಗಿತ್ತು. ಆದರೆ, ಅದು ಕಳಪೆ ಕಾಮಗಾರಿಯಾಗಿ ನೀರಿನಲ್ಲಿ ಕೊಚ್ಚಿ ಹೋಗಿ 10 ಅಡಿಯಷ್ಟು ಗುಂಡಿ ಬಿದ್ದು ಡ್ಯಾಂ ದುಸ್ಥಿತಿ ತಲುಪಿದೆ. ಇದರ ಬಗ್ಗೆ ದಾಖಲೆ ಸಮೇತ ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳ ಗಮನಕ್ಕೆ ತಂದರೂ ಪ್ರಯೋಜನವಿಲ್ಲ. ನದಿ ಪಾತ್ರದಲ್ಲಿ ಗಿಡಗಂಟಿ ಬೆಳೆದು ನಿಂತಿವೆ. ರೈತರ ಹೊಲಕ್ಕೆ ಹೋಗಲು ರಸ್ತೆ ಕಲ್ಪಿಸಿ ಕೊಡಬೇಕು ಮತ್ತು ಶಾಸಕರಾಗಲೀ, ಜಿಲ್ಲಾಧಿಕಾರಿಗಳಾಗಲೀ, ತಹಸೀಲ್ದಾರ್ ಆಗಲೀ ಸ್ಥಳಕ್ಕೆ ಭೇಟಿ ನೀಡಿ ರೈತರ ಕಷ್ಟ ವೀಕ್ಷಿಸಬೇಕು ಹಾಗೂ ಚೆಕ್ ಡ್ಯಾಂ ಮತ್ತು ಜಮೀನುಗಳಿಗೆ ಹೋಗಲು ರಸ್ತೆ ವ್ಯವಸ್ಥೆ ಮಾಡಿಕೊಡಬೇಕು ಎಂದು ಮನವಿ ಮಾಡಿದರು.
