ನನ್ನ ಹೆಂಡ್ತಿ ಮೊಬೈಲ್​ಗೆ ಯಾಕಪ್ಪಾ ಫೋನ್ ಮಾಡ್ತೀಯಾ? ಎಂದವನ ಕತೆ ಏನಾಯ್ತು ನೋಡಿ

ಬೆಂಗಳೂರು: 'ನನ್ನ ಹೆಂಡತಿ ಮೊಬೈಲ್​ಗೆ ಯಾಕಪ್ಪಾ ಫೋನ್ ಮಾಡ್ತೀಯಾ?' ಎಂದು ಪ್ರಶ್ನಿಸಿದ ಸ್ನೇಹಿತನ್ನು ಮನೆಗೆ ಕರೆಸಿಕೊಂಡ ದುಷ್ಕರ್ಮಿ, ಆತನನ್ನು ಬರ್ಬರವಾಗಿ ಕೊಂದು ಮೂಟೆಕಟ್ಟಿ ಕಾಂಪೌಂಡ್​ ಬಳಿಯೇ ಎಸೆದು ಹೋದ ಭೀಕರ ಘಟನೆ ರಾಜ್ಯ ರಾಜಧಾನಿಯಲ್ಲಿ ಸಂಭವಿಸಿದೆ.

ಅಂದ್ರಹಳ್ಳಿಯ ಪ್ರಸನ್ನ ಬಡಾವಣೆಯ ನಿವಾಸಿ ಕೇದಾರ್ ಸಹಾನಿ ಕೊಲೆಯಾದ ದುರ್ದೈವಿ. ಪೇಂಟಿಂಗ್​ ಕೆಲಸ ಮಾಡಿಕೊಂಡಿದ್ದ ಕೇದಾರ್​ ಮತ್ತು ರಾಹುಲ್ ಅಲಿಯಾಸ್​ ಚೋಟಾ ಲಾಲ್ ಇಬ್ಬರೂ ಸ್ನೇಹಿತರು. ಕೇದಾರ್​ ಪತ್ನಿ ಕುಸುಮಾ ಮೊಬೈಲ್​ಗೆ ರಾಹುಲ್​ ಕರೆ ಮಾಡುತ್ತಿದ್ದ. ಇದನ್ನು ಪ್ರಶ್ನಿಸಿದ್ದ ಕೇದಾರ್​, ಸ್ನೇಹಿತನೊಂದಿಗೆ ಜಗಳ‌ ಮಾಡಿದ್ದ. ಇದೇ ವಿಚಾರವಾಗಿ ಮಾತನಾಡುವ ಬಾ ಎಂದು ಸೆ.5ರ ರಾತ್ರಿ ಎನ್ಕ್ಲೇವ್ ಅಪಾರ್ಟ್​ಮೆಂಟ್​ಗೆ ಸ್ನೇಹಿತನನ್ನು ರಾಹುಲ್​ ಕರೆಸಿಕೊಂಡಿದ್ದ.

ಎನ್ಕ್ಲೇವ್ ಅಪಾರ್ಟ್​ಮೆಂಟ್​ನ ರಾಹುಲ್​ ಮನೆಗೆ ಹೋದ ಕೇದಾರ್​ಗೆ ಕಂಠಪೂರ್ತಿ ಎಣ್ಣೆ ಕುಡಿಸಿ ಸಿಲಿಂಡರ್​ನಿಂದ ತಲೆ ಜಜ್ಜಿದ್ದ ಕೊಂದಿದ್ದ. ಕೃತ್ಯ ಎಸಗಿ ಮೃತದೇಹವನ್ನು ಅದೇ ಅಪಾರ್ಟ್ಮೆಂಟ್​ನ ಒಳಗೆ ಮೂಟೆ‌ಕಟ್ಟಿ ಎಸೆದು ಬಿಹಾರಕ್ಕೆ ಎಸ್ಕೇಪ್ ಆಗಿದ್ದ.

ತನಿಖೆ ಕೈಗೊಂಡ ಬ್ಯಾಡರಹಳ್ಳಿ ಇನ್​ಸ್ಪೆಕ್ಟರ್​ ರಾಜೀವ್ ನೇತೃತ್ವದ ತಂಡ ಬಿಹಾರದಲ್ಲಿ ತಲೆಮರೆಸಿಕೊಂಡಿದ್ದ ಆರೋಪಿ ರಾಹುಲ್​ನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ. ಬ್ಯಾಡರಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

https://www.vijayavani.net/magadi-love-case-young-woman-death-three-people-arrest/

https://www.vijayavani.net/dead-body-railway-track-bangalore-majestic/