ಸ್ಪೆಷಲ್ ಇನ್ವೆಸ್ಟ್ಮೆಂಟ್ ರೀಜನ್ (ಎಸ್ಐಆರ್) ಮಾಡುವುದಕ್ಕೆ ಜಗದೀಶ್ ಶೆಟ್ಟರ್ ಕೈಗಾರಿಕಾ ಸಚಿವರಾಗಿದ್ದ ಸಂದರ್ಭದಲ್ಲಿ ಕಾಯ್ದೆಯ ಕರಡು ಸಿದ್ಧಪಡಿಸಲಾಗಿತ್ತು. ಈ ಕಾಯ್ದೆ ತಂದರೆ ಕೈಗಾರಿಕಾ ಬೆಳವಣಿಗೆಗೆ ಅನುಕೂಲವಾಗಲಿದೆ ಎಂದು ವಿನಂತಿಸಲಾಯಿತು. ಫಾಸ್ಟ್ ಮೂವಿಂಗ್ ಕ್ಲಸ್ಟರ್ ಗೂಡ್ಸ್ (ಎಫ್ಎಂಸಿಜಿ)ಮಾಡಬೇಕು ಎನ್ನುವ ನಿಟ್ಟಿನಲ್ಲಿ ಈ ಹಿಂದೆಯೇ ನಿರ್ಣಯವಾಗಿದೆ. ಉಲ್ಲಾಸ್ ಕಾಮತ್ ಸಮಿತಿ ನೀಡಿರುವ ಶಿಫಾರಸು ಪ್ರಕಾರ ತೆರಿಗೆ ವಿನಾಯಿತಿ ಸೇರಿ ಹಲವು ಸೌಲಭ್ಯ ನೀಡುವ ಕಡತ ಆರ್ಥಿಕ ಇಲಾಖೆಯಲ್ಲಿ ಬಾಕಿಯಾಗಿದೆ ಎನ್ನುವುದನ್ನು ಸಿಎಂ ಗಮನಕ್ಕೆ ತರಲಾಯಿತು. ಲಂಚ್ ಪಾರ್ಕ್ಗೆ 100 ಎಕರೆ ಭೂಮಿಯನ್ನು ಮೀಸಲಿಡಬೇಕು. ಫುಡ್ ಮತ್ತು ಟೆಕ್ಸ್ಟೈಲ್ ಪಾರ್ಕ್ಗಾಗಿ 500 ಎಕರೆ ಜಾಗ ನೀಡಬೇಕು. ಲ್ಯಾಂಡ್ ಬ್ಯಾಂಕ್ನಲ್ಲಿ ಹೂಡಿಕೆದಾರರಿಗೆ ಭೂಮಿ ಕಾಯ್ದಿರಿಸಬೇಕು. ಬಜೆಟ್ನಲ್ಲಿ ಈ ವಿಷಯಕ್ಕೆ ಆದ್ಯತೆ ನೀಡಬೇಕು ಎಂದು ವಿನಂತಿಸಿಕೊಳ್ಳಲಾಯಿತು. ಹುಬ್ಬಳ್ಳಿ-ಅಂಕೋಲಾ ನಡುವೆ ರೈಲ್ವೆ ಮಾರ್ಗಕ್ಕೆ ವನ್ಯಜೀವಿ ಮಂಡಳಿ ಒಪ್ಪಿಗೆ ಪಡೆದು ಅಭಿವೃದ್ಧಿಪಡಿಸಬೇಕು. ಬೇಲಿಕೇರಿ ಪೋರ್ಟ್ ಅಭಿವೃದ್ಧಿಪಡಿಸಿದರೆ ಹುಬ್ಬಳ್ಳಿ ಭಾಗದ ಬೆಳವಣಿಗೆಗೆ ಅನುಕೂಲವಾಗಲಿದೆ ಎನ್ನುವುದನ್ನು ತಿಳಿಸಲಾಯಿತು. ಕೂಡಲೆ ಈ ಬಗ್ಗೆ ಗಮನ ಹರಿಸಿ ಕ್ರಮ ವಹಿಸುವುದಾಗಿ ಸಿಎಂ ತಿಳಿಸಿದರು. ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ, ಮಾಜಿ ಸಿಎಂ ಜಗದೀಶ ಶೆಟ್ಟರ್, ಸಚಿವರಾದ ಶಂಕರ ಮುನೇನಕೊಪ್ಪ, ಹಾಲಪ್ಪ ಆಚಾರ್, ಶಾಸಕರಾದ ಅರವಿಂದ ಬೆಲ್ಲದ್, ಸಿ.ಎಂ. ನಿಂಬಣ್ಣವರ್, ಕೆಎಲ್ಇ ವಿವಿ ವಿಸಿ ಡಾ.ಅಶೋಕ್ ಶೆಟ್ಟರ್, ಉದ್ಯಮಿ ನಂದಕುಮಾರ್, ರಾಜಣ್ಣ ಕೊರವಿ, ಗೋವಿಂದ ಜೋಶಿ ಉಪಸ್ಥಿತರಿದ್ದರು.
