ಪ್ರಕೃತಿ ಸಮತೋಲನಕ್ಕೆ ಅರಣ್ಯ ಕೃಷಿಗೆ ಒತ್ತು

ವಿಭೂತಿಕೆರೆ ಶಿವಲಿಂಗಯ್ಯ ರಾಮನಗರ

ತಾಲೂಕಿನ ಸಾಮಾಜಿಕ ವಲಯ ಅರಣ್ಯ ಇಲಾಖೆ, ಅರಣ್ಯ ಕೃಷಿ ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ರೈತರಿಗೆ ನರೇಗಾ ಯೋಜನೆ ಮತ್ತು ರಾಷ್ಟ್ರೀಯ ಕೃಷಿ ವಿಕಾಸ ಯೋಜನೆ ಹಾಗೂ ಮತ್ತಿತರ ಯೋಜನೆಗಳ ಮೂಲಕ ಗಿಡ ಬೆಳೆಸಿ ರೈತರಿಗೆ ವಿತರಿಸಲು ಸಿದ್ಧವಾಗಿದೆ.

ಸರ್ಕಾರ, ಅರಣ್ಯ ಪ್ರದೇಶ ವಿಸ್ತರಿಸುವ ಜತೆಗೆ ಪ್ರಕೃತಿ ಸಮತೋಲನ ಕಾಯ್ದುಕೊಳ್ಳಲು ಪೂರಕವಾಗುವಂತೆ ಪ್ರತಿವರ್ಷ ಗಿಡ ಬೆಳೆಸಲು ಹಲವು ಯೋಜನೆ ಹಮ್ಮಿಕೊತ್ತಿದೆ. ನರೇಗಾ ಯೋಜನೆಯಿಂದ ರೈತರಿಗೆ ಪ್ರೋತ್ಸಾಹ ನೀಡುತ್ತಿದೆ. ಯೋಜನೆ ಲಾಭ ರೈತರಿಗೆ ತಲುಪುವ ವ್ಯವಸ್ಥೆ ಮತ್ತು ಗಿಡ ಬೆಳೆಸಲು ಪ್ರೇರೇಪಿಸಲು ಇಲಾಖೆ ಮುಂದಡಿ ಇಟ್ಟಿದೆ.

ಮೇ ಕೊನೇ ವಾರದಿಂದ ಜಿಲ್ಲೆಯಲ್ಲಿ ಮುಂಗಾರು ಪ್ರಾರಂಭವಾಗಿದ್ದು, ರೈತರು ಭೂಮಿ ಹದ ಮಾಡುವತ್ತ ಮುಖ ಮಾಡಿದ್ದಾರೆ. ಗಿಡ ಬೆಳೆಸುವ ರೈತರಿಗೆ ನರೇಗಾ ಯೋಜನೆಯಲ್ಲಿ ಸಹಾಯಧನ ಸಿಗುತ್ತದೆ. ಅರಣ್ಯ ಕೃಷಿ ಮಾಡುವ ರೈತರಿಗೆ ಬೇಕಾದ ಗಿಡ ಬೆಳೆಸಿ ಅಗತ್ಯಕ್ಕೆ ತಕ್ಕಂತೆ ಯೋಜನೆಯಲ್ಲಿನ ಲಾಭ ತಲುಪಿಸುತ್ತಿದೆ.

ಸಾಮಾಜಿಕ ಅರಣ್ಯ ವಲಯ ರಾಮನಗರದ ಹುಲಿ ಮುತ್ತಿಗೆ ನರ್ಸರಿಯಲ್ಲಿ ರೈತರಿಗೆ ನರೇಗಾ ಯೋಜನೆಯಲ್ಲಿ ಉಚಿತವಾಗಿ ಗಿಡ ನೀಡಲಾಗುತ್ತದೆ. ಜತೆಗೆ ಗಿಡಗಳ ಬೆಳವಣಿಗೆಗೂ ಸಹಾಯಧನ ಸಿಗುತ್ತದೆ. ಸಾರ್ವಜನಿಕರಿಗೂ ರಿಯಾಯಿತಿ ದರದಲ್ಲಿ ಗಿಡಗಳನ್ನು ನೀಡಲಾಗುತ್ತದೆ ಎಂದು ಸಾಮಾಜಿಕ ವಲಯ ಅರಣ್ಯಾಧಿಕಾರಿ ಮಲ್ಲೇಶ್ ತಿಳಿಸಿದ್ದಾರೆ.

ಉಚಿತವಾಗಿ ಸಿಗುವ ಗಿಡಗಳು

8*12 ಅಳತೆ ಚೀಲದಲ್ಲಿ 30 ಸಾವಿರ ಗಿಡ ಬೆಳೆಸಲಾಗಿದೆ. ಮಹಾಗನಿ 10 ಸಾವಿರ, ಸಿಲ್ವರ್ ವಕ್ 5 ಸಾವಿರ, ಹೆಬ್ಬೇವು 5 ಸಾವಿರ, ಹುಣಸೆ, ಬೇವು, ಬಿದಿರು, ಹೆಬ್ಬೇವು ಇತರ 10 ಸಾವಿರ ಗಿಡ ಬೆಳೆಸಲಾಗಿದೆ. ಮರ ಆಧಾರಿತ ಕೃಷಿ ಬೇಸಾಯಕ್ಕೆ ರೈತರಿಗೆ ಒಂದು ಎಕರೆಗೆ 40 ಗಿಡ ಉಚಿತವಾಗಿ ನರೇಗಾ ಯೋಜನೆ ಮುಖಾಂತರ ಸಂಬಂಧಿಸಿದ ದಾಖಲಾತಿ ಪಡೆದು ನೀಡಲಾಗುತ್ತದೆ. ಬೆಳೆದ ಒಂದು ಗಿಡಕ್ಕೆ ಕೂಲಿ ಮೊತ್ತ, ಸಾಮಗ್ರಿ ಮೊತ್ತ ಸೇರಿ 107 ರೂಪಾಯಿಗಳನ್ನು ರೈತರಿಗೆ ಪ್ರೋತ್ಸಾಹಧನ ನೀಡಲಾಗುವುದು.

ಪಡೆಯುವುದು ಹೇಗೆ?

ಈ ಯೋಜನೆಯ ಲಾಭ ಪಡೆಯುವ ರೈತರು ಗ್ರಾಮ ಪಂಚಾಯಿಯಲ್ಲಿ ಜಾಬ್‌ಕಾರ್ಡ್ ಹೊಂದಿರಬೇಕು. ಜಮೀನಿನ ಪಹಣಿ ಹೊಂದಿರಬೇಕು. ಆಧಾರ್ ಕಾರ್ಡ್ ಲಿಂಕ್ ಆಗಿರುವ ಬ್ಯಾಂಕ್ ಖಾತೆ ನೀಡಬೇಕು. ಗಿಡ ಬೇಕು ಎಂದು ಗ್ರಾಪಂನಲ್ಲಿ ನೋಂದಣಿ ಮಾಡಿದರೆ ಜಿಲ್ಲಾ ಪಂಚಾಯಿತಿಯಲ್ಲಿ ಅನುಮೋದನೆಗೊಂಡು ರೈತರಿಗೆ ನರೇಗಾ ಯೋಜನೆಯಲ್ಲಿ ಉಚಿತ ಗಿಡಗಳು ಸಿಗುತ್ತವೆ.

ರಾಷ್ಟ್ರೀಯ ಕೃಷಿ ವಿಕಾಸ ಯೋಜನೆ

ಈ ಯೋಜನೆಯಲ್ಲಿ 8*12 ಅಳತೆ ಚೀಲದಲ್ಲಿ ರಕ್ತಚಂದನ 5 ಸಾವಿರ, ಬೀಟೆ 5 ಸಾವಿರ, ಹೊನ್ನೆ 5 ಸಾವಿರ, ಮಹಾಗನಿ, ಸಿಲ್ವರ್, ಹುಣಸೆ, ಇತರ 5 ಸಾವಿರ ಸೇರಿ 20 ಸಾವಿರ ಗಿಡ ಬೆಳೆಸಲಾಗಿದೆ. ನರೇಗಾ ಯೋಜನೆಯಲ್ಲೂ ನೊಂದಾಯಿಸಿಕೊಂಡರೆ ಈ ಯೊಜನೆಯ ಲಾಭ ಪಡೆಯಲು ಅವಕಾಶ ಇದೆ. ಒಂದು ಗಿಡಕ್ಕೆ ರಿಯಾಯಿತಿ ದರದಲ್ಲಿ 6 ರೂ. ಗೆ ಸಿಗಲಿದೆ. ಪೋಷಣೆಗೆ ಮೊದಲವರ್ಷ 1 ಗಿಡಕ್ಕೆ 14 ರೂ., ಎರಡನೇ ವರ್ಷ 1 ಗಿಡಕ್ಕೆ 7 ರೂ., 3 ನೇ ವರ್ಷ 7 ರೂ. ದೊರೆಯುತ್ತದೆ.

ಸಾರ್ವಜನಿಕ ವಿತರಣೆ ಗಿಡಗಳು

ಆರ್‌ಎಸ್‌ಪಿಡಿ ಯೋಜನೆಯಲ್ಲಿ 8*12 ಅಳತೆ ಚೀಲದಲ್ಲಿ 5 ಸಾವಿರ ಶ್ರೀಗಂಧ, 6*9 ಅಳತೆ ಚೀಲದಲ್ಲಿ 5 ಸಾವಿರ ಸಿಲ್ವರ್ ಬೆಳೆಸಲಾಗಿದೆ. 8*12 ಅಳತೆಗೆ 6 ರೂ. 6*9 ಅಳತೆಗೆ 3 ರೂ. ಅಲ್ಲದೆ ಪ್ರಾದೇಶಿಕ ಅರಣ್ಯ ವಲಯದಲ್ಲಿ ನೋಂದಾಯಿಸಿಕೊಂಡು ಕೃಷಿ ಪ್ರೋತ್ಸಾಹ ಯೋಜನೆ ಲಾಭ ಪಡೆಯಬಹುದು. ಪ್ರತಿ ಗಿಡದ ಪೋಷಣೆಗೆ ಮೊದಲ ವರ್ಷ 35 ರೂ., ಎರಡನೇ ವರ್ಷ 40 ರೂ., 3 ನೇ ವರ್ಷ 50 ರೂ. ಪಡೆಯಬಹದು. ಪ್ರತಿ ರೈತನಿಗೆ 400 ಗಿಡಗಳವರೆಗೆ ಪ್ರೋತ್ಸಾಹಧನ ಸಿಗಲಿದೆ.