ದಸರಾ ಹಿನ್ನೆಲೆಯಲ್ಲಿ ಮೈಸೂರು ದಸರಾ ಗಜಪಡೆಯ ಸದಸ್ಯರಾದ ಗೋಪಾಲಸ್ವಾಮಿ ಮತ್ತು ಕಾವೇರಿ ಆನೆಗಳನ್ನು ಜಂಬೂಸವಾರಿಗೆಂದು ಶ್ರೀರಂಗಪಟ್ಟಣಕ್ಕೆ ಶನಿವಾರ ಕರೆತರಲಾಗಿತ್ತು. ಆನೆಗಳಿಗೆ ವಿಶೇಷವಾಗಿ ಅಲಂಕಾರ ಮಾಡಿ, ಸ್ವರ್ಣಲೇಪಿತ ಪಂಚಲೋಹದ 350 ಕೆ.ಜಿ. ತೂಕದ ಚಾಮುಂಡೇಶ್ವರಿ ಮೂರ್ತಿಯನ್ನು ಮರದ ಅಂಬಾರಿಯಲ್ಲಿ ಇರಿಸಿ ಗೋಪಾಲಸ್ವಾಮಿ ಆನೆ ಮೇಲೆ ಹೊರಿಸಲಾಗಿತ್ತು. ಮಧ್ಯಾಹ್ನ 3.10ಕ್ಕೆ ಆದಿಚುಂಚನಗಿರಿ ಮಠದ ಪೀಠಾಧ್ಯಕ್ಷ ಡಾ.ನಿರ್ಮಲಾನಂದನಾಥ ಸ್ವಾಮೀಜಿ ನಾಡದೇವತೆಗೆ ಪುಷ್ಪಾರ್ಚನೆ ಸಲ್ಲಿಸುವ ಮೂಲಕ ದಸರಾಗೆ ಚಾಲನೆ ನೀಡಿದರು. ಆನೆಗಳು ಕಿರಂಗೂರು ಮತ್ತು ಬಾಬುರಾಯನಕೊಪ್ಪಲಿಗೆ ಹೋಗಿ ವಾಪಸ್ ಬರುವುದು ವಾಡಿಕೆ. ಅದರಂತೆ ಈ ಬಾರಿಯೂ ಪುಷ್ಪಾರ್ಚನೆ ಬಳಿಕ ಮೆರವಣಿಗೆ ಹೊರಟಾಗ ಪಟಾಕಿ ಸಿಡಿಸಲಾಯಿತು. ಈ ಶಬ್ದದಿಂದ ಬೆಚ್ಚಿದ ‘ಗೋಪಾಲಸ್ವಾಮಿ’ ದಿಢೀರ್ ಹಿಂದಕ್ಕೆ ಬಂದು, ಒಂದು ಸುತ್ತು ಸುತ್ತಿತು. ಇದರಿಂದ ಅಕ್ಕಪಕ್ಕದಲ್ಲಿದ್ದ ಜನ ಹೆದರಿ ದಿಕ್ಕಾಪಾಲಾಗಿ ಓಡಿದರು. ಈ ವೇಳೆ ಕೆಲವರು ನೆಲಕ್ಕೆ ಬಿದ್ದರಾದರೂ ಯಾರಿಗೂ ತೊಂದರೆಯಾಗಲಿಲ್ಲ. ಕೂಡಲೇ ಎಚ್ಚೆತ್ತ ಆನೆ ವೈದ್ಯ ಡಾ.ರಮೇಶ್, ಸಹಾಯಕ ಅಕ್ರಂ ಮತ್ತು ಮಾವುತರು ಆನೆ ಕಾಲಿಗೆ ಸರಪಳಿ ಹಾಕಿ ನಿಯಂತ್ರಿಸುವಲ್ಲಿ ಯಶಸ್ವಿಯಾದರು. ಈ ವೇಳೆ ಪಕ್ಕದಲ್ಲೇ ಇದ್ದ ಕಾವೇರಿ ಆನೆ ಗೋಪಾಲಸ್ವಾಮಿಯನ್ನು ನಿಯಂತ್ರಣಕ್ಕೆ ತರಲು ಸಹಕರಿಸಿತು. ಈ ಮೂಲಕ ದೊಡ್ಡ ಅನಾಹುತ ತಪ್ಪಿತು. ಕೊನೆಗೆ ಪೊಲೀಸರು ಜನರನ್ನು ದೂರ ಕಳಿಸಿದರು.
