ಅಡವಿಯಲ್ಲಿಲ್ಲ ದನ-ಕರುಗಳಿಗೆ ಹಿಡಿ ಮೇವು | ಬರಿದಾದ ಕೆರೆ-ಕಾಲುವೆಗಳು : ಕುಡಿವ ನೀರಿಗೆ ಎಲ್ಲಡೆ ತತ್ವಾರ
ಬಾಬುರಾವ ಯಡ್ರಾಮಿ ಯಾದಗಿರಿ
ಎಲ್ಲಿ ನೋಡಿದರಲ್ಲಿ ಸುಟ್ಟು ಮರುಭೂಮಿಯಂತಾದ ಜಮೀನು. ಕುಡಿಯಲು ಹನಿ ನೀರಿಲ್ಲದೆ ಬಿರುಕು ಬಿಟ್ಟ ಕೆರೆ, ಹಳ್ಳ, ಕೊಳ್ಳಗಳು. ಇಂತಹ ಭೀಕರ ಬರಕ್ಕೆ ಜಾನುವಾರುಗಳು ತತ್ತರಿಸುವಂತಾಗಿದೆ.
ಯಾದಗಿರಿ ಜಿಲ್ಲೆಯಾದ ಮೊದಲ ಬಾರಿ ಭೀಕರ ಬರಗಾಲ ಎದುರಿಸುತ್ತಿದ್ದು, ಜಿಲ್ಲೆಯಲ್ಲಿ ಯಾದಗಿರಿ, ಗುರುಮಠಕಲ್, ವಡಗೇರಾ, ಶಹಾಪುರ, ಹುಣಸಗಿ ಮತ್ತು ಸುರಪುರ ಸೇರಿ ಒಟ್ಟು ಆರು ತಾಲೂಕುಗಳಿವೆ. ಈ ಆರು ಬರ ಪೀಡಿತ ಎಂದು ಘೋಷಣೆಯಾಗಿವೆ.
ಭೀಕರ ಬರಗಾಲಕ್ಕೆ ಜನರು, ಜಾನುವಾರುಗಳು ಕೂಡ ಅಕ್ಷರಶಃ ವಿಲ ವಿಲ ಒದ್ದಾಡುವ ಸ್ಥಿತಿ ನಿರ್ಮಾಣವಾಗಿದೆ. ಪ್ರತಿವರ್ಷ ಮಾರ್ಚ್ ಏಪ್ರಿಲ್ವರೆಗೆ ಬೆಳೆ, ಹಸಿ ಮೇವು, ಕಾಲುವೆ, ಕೆರೆ, ಹಳ್ಳದ ನೀರು ಸಿಗುತ್ತಿತ್ತು. ಆದರೆ ಈ ಬಾರಿ ಇದಾವುದು ಇಲ್ಲದ ಕಾರಣ ಮೂಕ ಪ್ರಾಣಿಗಳ ರೋಧನೆ ಹೇಳ ತೀರದಾಗಿದೆ.
ದನ-ಕರು, ಎಮ್ಮೆ, ಎತ್ತು, ಕುರಿ ಮತ್ತು ಆಡುಗಳಿಗೆ ತಿನ್ನಲು ಹಿಡಿ ಮೇವು, ಗುಟುಕು ನೀರು ಅಡವಿಯಲ್ಲಿ ಸಿಗುತ್ತಿಲ್ಲ. ಕಾರಣ ಈ ಬಾರಿ ಮಳೆ ಸಂಪೂರ್ಣ ವಿಫಲವಾಗಿದ್ದರಿಂದ. ಅವಶ್ಯಕತೆಗೆ ಇರುವಷ್ಟು ನೀರು ಸಂಗ್ರಹವಾಗದ ಕಾರಣ ಕಾಲುವೆ ನೀರು ನಿಲ್ಲಿಸಲಾಯಿತು. ಡಿಸೆಂಬರ್ ವೇಳೆಗೆ ಬೆಳೆಗಳು ನೆಲಕಚ್ಚಿದವು. ನೀರಿಲ್ಲದೆ ಹೊಲ, ಬದು ಮತ್ತು ಮುಳ್ಳಿನ ಗಿಡ-ಗಂಟಿ ಎಲ್ಲವೂ ಒಣಗಿ ನಿಂತಿವೆ. ರೈತರು ಇವುಗಳ ಸ್ವಚ್ಛತೆಗಾಗಿ ಬೆಂಕಿ ಹಚ್ಚುತ್ತಿರುವುದರಿಂದ ಅಲ್ಪಸ್ವಲ್ಪ ಮೇವು ಕೂಡ ಬೆಂಕಿಗಾಹುತಿಯಾಗುತ್ತಿದೆ. ಇದರಿಂದ ದನ-ಕರುಗಳು ಮಮ್ಮಲು ಮರಗುವಂತಾಗಿದೆ.
