ಸಾಮಾಜಿಕ ಜಾಲತಾಣದಲ್ಲಿ ವೈಯಕ್ತಿಕ ಮಾಹಿತಿ ಹಂಚಿಕೊಳ್ಳಬೇಡಿ: ಶಾಸಕ ರವಿಸುಬ್ರಹ್ಮಣ್ಯ ಸಲಹೆ

ಬೆಂಗಳೂರು: ಸಾಮಾಜಿಕ ಜಾಲತಾಣಗಳಲ್ಲಿ ಅನಗತ್ಯವಾಗಿ ವೈಯಕ್ತಿಕ ಮಾಹಿತಿ ಹಂಚಿಕೊಳ್ಳಬಾರದು ಎಂದು ಶಾಸಕ ರವಿಸುಬ್ರಹ್ಮಣ್ಯ ಸಲಹೆ ನೀಡಿದರು.

ಶ್ರೀ ತ್ಯಾಗರಾಜ ಕೋ ಆಪರೇಟಿವ್​ ಬ್ಯಾಂಕ್​ ನಗರದಲ್ಲಿ ಶನಿವಾರ ಸೈಬರ್​ ಅಪರಾಧ ತಡೆಗಟ್ಟುವ ಕುರಿತು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದರು. ವಿದ್ಯಾವಂತರು, ಹಿರಿಯ ನಾಗರಿಕರು, ಹೆಣ್ಣಮಕ್ಕಳು ಸೈಬರ್​ ಅಪರಾಧಿಗಳಿಗೆ ಗುರಿಯಾಗುತ್ತಿದ್ದಾರೆ. ಯಾವುದೇ ಬ್ಯಾಂಕಿನಲ್ಲಿ 2 ಖಾತೆ ನಿರ್ವಹಿಸಿ ಒಂದು ಖಾತೆಯಲ್ಲಿ ಕನಿಷ್ಠ ಮೊತ್ತದಲ್ಲಿ ವ್ಯವಹರಿಸಬೇಕು. ಇನ್ನೊಂದು ಖಾತೆ ವ್ಯವಹಾರದ ಬಗ್ಗೆ ಗೌಪ್ಯತೆ ಕಾಪಾಡಿಕೊಳ್ಳಬೇಕು. ಅನರಕ್ಷಸ್ಥ ವ್ಯಕ್ತಿ ಸುಲಭವಾಗಿ ಬಳಸುವ ಯುಪಿಐನ್ನು ನಮ್ಮ ದೇಶ ಪರಿಚಯಿಸಿದೆ. ವಿದೇಶಿಗರೂ ಸಹ ಇದನ್ನು ಶ್ಲಾಘಿಸಿದ್ದಾರೆ ಎಂದರು.

ಬ್ಯಾಂಕ್​ ಅಧ್ಯಕ್ಷ ಎಂ.ಆರ್​.ವೆಂಕಟೇಶ್​ ಮಾತನಾಡಿ, ಆಧುನಿಕ ತಂತ್ರಜ್ಞಾನದ ಯುಗದಲ್ಲಿ ಸೈಬರ್​ ಅಪರಾಧಗಳನ್ನು ಪರಿಣಾಮಕಾರಿ ತಡೆಗೆ ಸರ್ಕಾರ ಪಾತ್ರ ಪ್ರಮುಖವಾಗಿದೆ. ಈ ನಿಟ್ಟಿನಲ್ಲಿ ಪೊಲೀಸ್​ ಇಲಾಖೆಯ ಸೈಬರ್​ ಅಪರಾಧ ವಿಭಾಗವನ್ನು ಆಧುನೀಕರಣಗೊಳಿಸಿ ಮೋಸ ಮತ್ತು ವಂಚನೆ ತಡೆಗಟ್ಟಬೇಕು. ಈ ಬಗ್ಗೆ ಸಾರ್ವಜನಿಕರಿಗೆ ಹೆಚ್ಚಿನ ಅರಿವು ಮೂಡಿಸಬೇಕು. ಸಹಕಾರ ಬ್ಯಾಂಕ್​ಗಳ ಡಿಜಿಟಲ್​ ವ್ಯವಹಾರ ಪ್ರೋತ್ಸಾಹಿಸುವಂತೆ ಸರ್ಕಾರ ಸಹಕಾರ ನೀಡಬೇಕಿದೆ ಎಂದರು.

ಬನಶಂಕರಿ ಸೈಬರ್​ ಅಪರಾಧ ವಿಭಾಗದ ಸಹಾಯಕ ಪೊಲೀಸ್​ ಆಯುಕ್ತ ವಿಜಯ್​ಹಡಗಲಿ, ಸಿಐಡಿ ಟಕದ ಉಪ ಅಧೀಕ್ಷಕ ಕೆ.ಎನ್​.ಯಶವಂತ್​ಕುಮಾರ್​ ಸೈಬರ್​ ಅಪರಾಧ ತಡೆಗೆ ಜನರು ವಹಿಸಬೇಕಾದ ಮುಂಜಾಗ್ರತಾ ಕ್ರಮಗಳ ಕುರಿತು ಮಾತನಾಡಿದರು. ಪಟ್ಟಣ ಸಹಕಾರ ಬ್ಯಾಂಕ್​ಗಳ ಅಧ್ಯಕ್ಷರು, ಸೊಸೈಟಿಗಳ ನಿದೇಶಕರು ಮತ್ತಿತರರಿದ್ದರು.

https://www.vijayavani.net/demand-for-ayodhya-balarams-pendent-2-thousand-crore-turnover-expected