ವೈದ್ಯರು ಹೇಳಿದರೂ ಕದಲದ ರೋಗಿಗಳು: ತಿಂಗಳು ಕಳೆದು, ವೈದ್ಯರು ಸಲಹೆ ನೀಡಿದ ನಂತರವೂ 337 ರೋಗಿಗಳು ಆಸ್ಪತ್ರೆ ಬಿಟ್ಟು ಕದಲಿಲ್ಲ. 20 ದಿನಗಳು ಕಳೆದ ಮೇಲೂ 503 ರೋಗಿಗಳು ಇನ್ನೂ ಆಸ್ಪತ್ರೆಯಲ್ಲಿ ಉಳಿದುಕೊಂಡಿದ್ದಾರೆ. ಈ ಕುರಿತ ಅಂಕಿ-ಅಂಶಗಳನ್ನು ಬಹಿರಂಗಪಡಿಸಿದ ಯಡಿಯೂರಪ್ಪ, ವಾರ್ ರೂಂ ದಕ್ಷತೆಯಿಂದ ಕೆಲಸ ಮಾಡುತ್ತಿರುವುದಕ್ಕೆ ನಿದರ್ಶನವಿದು ಎಂದರು. 20 ದಿನಗಳು, ತಿಂಗಳು ಕಳೆದ ರೋಗಿಗಳಿಗೆ ಇನ್ನು ಆಸ್ಪತ್ರೆ ಸಾಕಪ್ಪಾ, ಮನೆಯಲ್ಲೇ ಚಿಕಿತ್ಸೆ ಪಡೆಯಿರಿ. ಬೇರೆ ಗಂಭೀರ ಪರಿಸ್ಥಿತಿ ಎದುರಿಸುತ್ತಿರುವ ರೋಗಿಗಳ ಚಿಕಿತ್ಸೆಗೆ ಅವಕಾಶ ಮಾಡಿ ಕೊಡಿ ಎಂದು ತಿಳಿಹೇಳಿ, ಆಸ್ಪತ್ರೆಯಿಂದ ತೆರವು ಮಾಡಲು ಸೂಚಿಸಿರುವೆ ಎಂದು ಸಿಎಂ ತಿಳಿಸಿದರು. ವಿವಿಧ ಆಸ್ಪತ್ರೆಗಳಲ್ಲಿರುವ ಒಟ್ಟು 9,242 ರೋಗಿಗಳ ಪೈಕಿ 1ರಿಂದ 10 ದಿನಗಳಾದವರು 6,500, 11ರಿಂದ 20 ದಿನಗಳಾದವರು 1,900, 20 ದಿನಗಳಿಗಿಂತ ಮೇಲ್ಪಟ್ಟವರು 503 ಮತ್ತು 30 ದಿನಗಳಾದವರು 337 ರೋಗಿಗಳು ಸೇರಿದ್ದಾರೆ. ಏ.1ರಂದು 3,000 ಇದ್ದ ಹಾಸಿಗೆಗಳ ಸಂಖ್ಯೆ 12,299ಕ್ಕೆ ಏರಿವೆ. ಅನಗತ್ಯವಾಗಿ ಆಸ್ಪತ್ರೆಗಳಲ್ಲಿ ಇರುವವರನ್ನು ಹೊರಗೆ ಕಳುಹಿಸಿದರೆ ಅಗತ್ಯವುಳ್ಳವರಿಗೆ ಸಕಾಲಕ್ಕೆ ಬೆಡ್ ಹಂಚಿಕೆ ಸಾಧ್ಯವಿದೆ ಎಂದು ಬಿಎಸ್ವೈ ಪರಿಹಾರ ಸೂಚಿಸಿದರು.
